ନୂଆଦିଲ୍ଲୀ ୦୩/୦୪: ଏଣିକି ସୁପ୍ରିମକୋର୍ଟର ସମସ୍ତ ବିଚାରପତି ସାର୍ବଜନୀନ କରିବେ ସେମାନଙ୍କ ସମ୍ପତ୍ତି ତାଲିକା । ସେମାନଙ୍କର ସମ୍ପତ୍ତି ତାଲିକା ଦାଖଲ କରିବାକୁ ନିର୍ଦ୍ଦେଶ ଜାରି ହୋଇଛି । ମୁଖ୍ୟ ବିଚାରପତି ସଞ୍ଜୀବ ଖାନ୍ନାଙ୍କୁ ମଧ୍ୟ ତାଙ୍କ ସମ୍ପତ୍ତିର ବିବରଣୀ ସାର୍ବଜନୀନ କରିବାକୁ ପଡିବ । 

ସୁପ୍ରିମକୋର୍ଟର ପୂର୍ଣ୍ଣ ଅଦାଲତ ନିଷ୍ପତ୍ତି ନେଇଛନ୍ତି ଯେ ବିଚାରପତିମାନେ କାର୍ଯ୍ୟଭାର ଗ୍ରହଣ କରିବା ମାତ୍ରେ ସେମାନଙ୍କର ସମ୍ପତ୍ତିର ସମ୍ପୂର୍ଣ୍ଣ ବିବରଣୀ ସାର୍ବଜନୀନ କରିବା ଉଚିତ । ସିଜେଆଇ ଓ ବିଚାରପତିମାନେ ସ୍ୱେଚ୍ଛାକୃତ ଭାବରେ ସୁପ୍ରିମକୋର୍ଟ ୱେବସାଇଟରେ ସେମାନଙ୍କର ସମ୍ପତ୍ତିର ସମ୍ପୂର୍ଣ୍ଣ ବିବରଣୀ ସାର୍ବଜନୀନ କରିବେ । 

ଏହି ଅବସରରେ ସୁପ୍ରିମକୋର୍ଟର CJIଙ୍କ ସମେତ ମୋଟ ୩୦ ଜଣ ବିଚାରପତି ସେମାନଙ୍କ ସମ୍ପତ୍ତିର ବିବରଣୀ ସାର୍ବଜନୀନ କରିଛନ୍ତି । ଏଥିମଧ୍ୟରେ ସିଜେ ସଞ୍ଜୀବ ଖାନ୍ନା, ଜଷ୍ଟିସ୍ ବି.ଆର ଗବାଇ, ଜଷ୍ଟିସ୍ ସୂର୍ଯ୍ୟକାନ୍ତ, ଜଷ୍ଟିସ୍ ଅଭୟ ଓକ୍, ଜଷ୍ଟିସ୍ ଜେ.କେ ମହେଶ୍ୱରୀ, ଜଷ୍ଟିସ୍ ବି.ଭି ନାଗରାଥନ ଅଛନ୍ତି । 

ସୂଚନା ଥାଉକି, ନିକଟରେ ଜଷ୍ଟିସ୍ ଯଶୱନ୍ତ ବର୍ମାଙ୍କ ଘରୁ ଟଙ୍କା ଜବତ କରାଯାଇଥିଲା । ନଗଦ ଆଦାୟ ମାମଲାର ତଦନ୍ତ ପାଇଁ, CJI ସଞ୍ଜିବ ଖାନ୍ନା ମାର୍ଚ୍ଚ ୨୨ ରେ ଜଷ୍ଟିସ୍ ଯଶୱନ୍ତ ବର୍ମାଙ୍କ ବିରୋଧରେ ତିନି ସଦସ୍ୟ ବିଶିଷ୍ଟ ଆଭ୍ୟନ୍ତରୀଣ ତଦନ୍ତ ଆରମ୍ଭ କରିଥିଲେ । ଅଭିଯୋଗ ହୋଇଥିଲା କି, ଜଷ୍ଟିସ୍ ବର୍ମାଙ୍କ ସରକାରୀ ଆବାସିକ କମ୍ପ୍ଲେକ୍ସରୁ ନୋଟ୍ ବଣ୍ଡଲ୍ ମିଳିଥିଲା । 

ଯେଉଁଠାରେ ମାର୍ଚ୍ଚ ୧୪ରେ ଅଗ୍ନିକାଣ୍ଡ ହୋଇଥିଲା। ନିଆଁ ଲିଭାଇଥିବା ଅଗ୍ନିଶମ ବାହିନୀ ଟିମ୍ ଷ୍ଟୋର ରୁମରେ ଏହି ନୋଟ୍ ବଣ୍ଡଲ୍ ଦେଖିଥିଲା । ଏସବୁ ଘଟଣା ପରେ ଆାକ୍ସନ ମୋଡକୁ ଆସିଛନ୍ତି ସୁପ୍ରିମକୋର୍ଟ ।