ନୂଆଦିଲ୍ଲୀ ୩।୪: ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ଯାଦବଙ୍କର ଦିଲ୍ଲୀ ଏମସ୍ ରେ ଗୁରୁବାର ଅସ୍ତ୍ରୋପଚାର ହୋଇଛି। ଏହି ଅସ୍ତ୍ରୋପଚାର ସଫଳ ହୋଇଥିବା ବେଳେ ତାଙ୍କୁ ଆଇସିୟୁରୁ ୱାର୍ଡକୁ ସିଫ୍ଟ କରାଯାଇଛି। ସୂଚନା ଅନୁସାରେ ଲାଲୁ ଯାଦବ ଗତ ୨ ଦିନ ହେଲା ପିଠିରେ ଗଭୀର ଜଖମ ଯୋଗୁ ଯନ୍ତ୍ରଣାରେ ଥିଲେ। ଏଣୁ ବୁଧବାର ସନ୍ଧ୍ୟାରେ ତାଙ୍କୁ ଏୟାର ଆମ୍ବୁଲାନ୍ସ ଯୋଗେ ପାଟନାରୁ ଦିଲ୍ଲୀ ଏମସକୁ ନିଆଯାଇଥିଲା। ଏମସର ସିନିୟର ଡାକ୍ତରମାନେ ତାଙ୍କ ପିଠିରେ ଅସ୍ତ୍ରୋପଚାର କରିଛନ୍ତି।
ଏହି ଅସ୍ତ୍ରୋପଚାର ସଫଳ ହୋଇଛି ଏଣୁ ତାଙ୍କୁ ଆଇସିୟୁରୁ ଜେନରାଲ ୱାର୍ଡକୁ ସ୍ଥାନାନ୍ତର କରାଯାଇଛି। ତାଙ୍କ ସ୍ୱାସ୍ଥ୍ୟରେ ଏବେ ସୁଧାର ଆସିବ ବୋଲି ଆଶା କରାଯାଉଛି। ଲାଲୁ ଯାଦବଙ୍କ ସହ ହସ୍ପିଟାଲରେ ତାଙ୍କ ପତ୍ନୀ ରାବଡୀ ଦେବୀ ଓ ପରିବାରର ଅନ୍ୟ ସଦସ୍ୟ ମଧ୍ୟ ଅଛନ୍ତି। ଡାକ୍ତର ଲାଲୁଙ୍କ ସ୍ୱାସ୍ଥ୍ୟ ଉପରେ ନଜର ରଖି ରହିଛନ୍ତି। ଡାକ୍ତରଙ୍କ ଅନୁସାରେ ଲାଲୁ ଯାଦବଙ୍କ ସ୍ୱାସ୍ଥ୍ୟରେ ଖୁବ୍ ଶୀଘ୍ର ସୁଧାର ଆସିବ ଓ ସେ ସମ୍ପୂର୍ଣ୍ଣ ସୁସ୍ଥ ହୋଇଯିବେ।
ତେବେ ଏହା ପୂର୍ବରୁ ପାଟନାରେ ତାଙ୍କ ପୁଅ ତଥା ଆରଜେଡି ନେତା ତେଜସ୍ୱୀ ଯାଦବ ଗଣମାଧ୍ୟମ ସହ ଆଲୋଚନାରେ ଲାଲୁଙ୍କ ପିଠି ଓ ହାତରେ ଘା ହୋଇଯାଇଥିବା କହିଥିଲେ। ଦିଲ୍ଲୀ ଏମସରେ ତାଙ୍କର ଅସ୍ତ୍ରୋପଚାର ଦ୍ୱାରା ଚିକିତ୍ସା କରାଯିବ ବୋଲି ସେ କହିଥିଲେ। ଲାଲୁଙ୍କ ଦିଲ୍ଲୀ ନେବା ପାଇଁ ମଧ୍ୟାହ୍ନରେ ଏୟାରପୋର୍ଟ ନିଆଯାଇଥିଲା। ତେବେ ତାଙ୍କ ରକ୍ତଚାପ ହ୍ରାସ ହେବା ଯୋଗୁ ତାଙ୍କୁ ତୁରନ୍ତ ନିକଟସ୍ଥ ହସ୍ପିଟାଲେ ଭର୍ତ୍ତି କରାଯାଇଥିଲା।
