ଇନ୍ଦୋର: ମଧ୍ୟପ୍ରଦେଶର ଖଣ୍ଡୱା ଜିଲ୍ଲାରେ ଗୁରୁବାର ବଡ଼ ଧରଣର ଦୁର୍ଘଟଣା ଘଟିଛି । କୁଣ୍ଡାଭତ ଗାଁରେ କୂଅର ପଙ୍କରେ ଫସି ୮ ଜଣଙ୍କ ମୃତ୍ୟୁ ହୋଇଛି । ଏଠାରେ ଗଣଗୌର ଦେବୀଙ୍କ ବିସର୍ଜନ ପୂର୍ବରୁ ଏକ ପୁରୁଣା କୂଅର ସଫେଇ କରୁଥିବା ଲୋକଙ୍କୁ ଉଦ୍ଧାର କରିବାକୁ ଯାଇ ଜଣେ ପରେ ଜଣେ ୮ ଜଣ ପଙ୍କରେ ଫସି ଯାଇଥିଲେ । କୂଅର ବିଷାକ୍ତ ଗ୍ୟାସରେ ସମସ୍ତ ୮ ଜଣଙ୍କ ଜୀବନ ଯାଇଛି । ଘଣଟାସ୍ଥଳରେ ଖଣ୍ଡୱା ଏସପି, କଲେକ୍ଟରଙ୍କ ସମେତ ସବୁ ପ୍ରଶାସନିକ ଅଧିକାରୀ ଘଟଣା ସ୍ଥଳରେ ପହଞ୍ଚିଛନ୍ତି ।
ମୃତକମାନେ ହେଲେ ରାକେଶ, ବାସୁଦେବ, ଅର୍ଜୁନ, ଗଜାନନ, ମୋହନ, ଅଜୟ, ଶରଣ ଏବଂ ଅନିଲ୍ । ଖବର ଅନୁସାରେ ନବରାତ୍ରି ପାଇଁ ଗାଁରେ ଗଣଗୌର ମାଆଙ୍କ ମୂର୍ତ୍ତି ସ୍ଥାପନ କରାଯାଇଥିଲା । ନବରାତ୍ରି ଶେଷ ପରେ ମାଆଙ୍କ ମୂର୍ତ୍ତିକୁ ବିସର୍ଜନ କରାଯାଇଥାନ୍ତା । ଏଥିପାଇଁ ଗ୍ରାମବାସୀ କୂଅର ସଫେଇ କାମ କରୁଥିଲେ । ପ୍ରଥମେ ତିନି ଜଣ ଲୋକ କୂଅ ଭିତରକୁ ଯାଇଥିଲେ । କିନ୍ତୁ ହଠାତ୍ ସେମାନଙ୍କ ପାଟି ଶୁଭିବା ବନ୍ଦ ହୋଇଗଲା ।
ଏହାପରେ ସ୍ଥିତି ଦେଖିବା ପାଇଁ ଅନ୍ୟ ୫ ଜଣ କୂଅ ଭିତରକୁ ଯାଇଥିଲେ । କିଛି ସମୟ ପରେ ଏହି ୫ ଜଣଙ୍କ ପାଟି ମଧ୍ୟ ଶୁଣିବାକୁ ମିଳିଲା ନାହିଁ । ଏହା ଦେଖି ଗ୍ରାମବାସୀ ସ୍ଥାନୀୟ ଛଗାଓଁମାଖନ ଥାନା ପୋଲିସକୁ ତତ୍କାଳରେ ଖବର ଦେଇଥିଲେ । ଛଗାଓଁମାଖନ ଥାନା ପୋଲିସ ସହ ପନ୍ଧାନ ଥାନା ପୋଲିସ ଆମ୍ୱୁଲାନ୍ସ ଘଟଣାସ୍ଥଳରେ ପହଞ୍ଚିଥିଲେ । ପୋଲିସ ପ୍ରଶାସନ ତୁରନ୍ତ ଉଦ୍ଧାରକାର୍ଯ୍ୟ ଆରମ୍ଭ କରିଥିଲା । କୁହାଯାଉଛି ଯେ କୂଅରେ ପଙ୍କ ଓ କାଦୁଅରୁ ବାହାରୁଥିବା ବିଷାକ୍ତ ଗ୍ୟାସ ଯୋଗୁଁ ଏହି ଅଘଟଣ ଘଟିଛି । ଖଣ୍ଡୱା ଏସପି ରିଷଭ ଗୁପ୍ତା ଦୁର୍ଘଟଣା ଉପରେ ଶୋକ ବ୍ୟକ୍ତ କରି ମୃତକଙ୍କ ପରିଜନଙ୍କ ପାଇଁ ୪-୪ ଲକ୍ଷ ଟଙ୍କାର ଅନୁକମ୍ପା ରାଶି ଦେବା ପାଇଁ ଘୋଷଣା କରିଛନ୍ତି ।
