ନୂଆଦିଲ୍ଲୀ: ୱାକଫ୍ ସଂଶୋଧନ ବିଲ୍କୁ ସମର୍ଥନ ଦେବାରୁ ଦଳରୁ ଇସ୍ତଫା ଦେଲେ ୨ ବରିଷ୍ଠ ଜେଡିୟୁ ନେତା ମହମ୍ମଦ କାସିମ୍ ଅନସାରୀ ଓ ମହମ୍ମଦ ନୱାଜ ମଲ୍ଲିକ। ଗୁରୁବାର ୱାକଫ୍ ସଂଶୋଧନ ବିଲ୍ ପ୍ରତି ସମର୍ଥନକୁ ନେଇ ମତଭେଦ ଦର୍ଶାଇ ଦୁଇ ନେତା ଦଳରୁ ଇସ୍ତଫା ଦେଇଛନ୍ତି। ବିଳମ୍ବିତ ରାତିରେ ଲୋକସଭାରେ ଏହି ବିଲ୍ ଗୃହୀତ ହୋଇଥିଲା। ଏକାଧିକ ବିରୋଧୀ ଦଳ ଏହାକୁ ବିରୋଧ କରିବା ସତ୍ତ୍ୱେ ଜେଡିୟୁ ସମର୍ଥନ ଦେଇଥିଲା। ତେଣୁ ଦଳ ପ୍ରତି ତାଙ୍କର ସମସ୍ତ ବିଶ୍ୱାସ ହଟି ଯାଇଛି ବୋଲି ଅନସାରୀ ଓ ନୱାଜ କହିଛନ୍ତି।
"ମୁଁ ମୋ ଜୀବନର କିଛି ବର୍ଷ ଦଳକୁ ଦେଇଥିବାରୁ ନିରାଶ" ଅନସାରି ଲେଖିଛନ୍ତି। ସେହିପରି ମଲିକ କହିଛନ୍ତି ଯେ ୱାକଫ ବିଲ୍ ସମ୍ବିଧାନରେ ଥିବା ଅନେକ ମୌଳିକ ଅଧିକାରକୁ ଉଲ୍ଲଂଘନ କରୁଛି।
ପଢ଼ନ୍ତୁ- ୱକଫ ବିଲ ଗୃହୀତ ହେବା ପରେ ଜାଣନ୍ତୁ ଏବେ କେଉଁଠି ଲାଗିବ ଖଟକା ?
ମହମ୍ମଦ ଅନସାରୀ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି "ମୁଁ ସମ୍ମାନର ସହିତ କହିବାକୁ ଚାହେଁ ଯେ ଆମ ପରି ଲକ୍ଷ ଲକ୍ଷ ଭାରତୀୟ ମୁସଲମାନଙ୍କର ଅଟଳ ବିଶ୍ୱାସ ଥିଲା ଯେ ଆପଣ ଏକ ସମ୍ପୂର୍ଣ୍ଣ ଧର୍ମନିରପେକ୍ଷ ଚିନ୍ତାଧାରାର ଧ୍ୱାଜା ବାହକ। କିନ୍ତୁ ବର୍ତ୍ତମାନ ଏହି ବିଶ୍ୱାସ ଭାଙ୍ଗି ଯାଇଛି। ଆମ ପରି ଲକ୍ଷ ଲକ୍ଷ ସମର୍ପିତ ଭାରତୀୟ ମୁସଲମାନ ଏବଂ କର୍ମୀ ଜେଡି(ୟୁ)ର ଏହି ସ୍ଥିତିରେ ଗଭୀର ଭାବରେ ମର୍ମାହତ।" ଅନସାରୀ କହିଛନ୍ତି ଯେ ୱାକଫ ବିଲ୍ ଭାରତୀୟ ମୁସଲମାନମାନଙ୍କ ବିରୁଦ୍ଧରେ ରହିଛି। ଏହାକୁ କୌଣସି ପରିସ୍ଥିତିରେ ଗ୍ରହଣ କରାଯାଇପାରିବ ନାହିଁ।
"ଏହି ବିଲ୍ ସମ୍ବିଧାନର ଅନେକ ମୌଳିକ ଅଧିକାରକୁ ଉଲ୍ଲଂଘନ କରୁଛି। ଏହି ବିଲ୍ ମାଧ୍ୟମରେ, ଭାରତୀୟ ମୁସଲମାନମାନଙ୍କୁ ଅପମାନିତ ଅପମାନିତ କରାଯାଉଛି। ଆପଣ କିମ୍ବା ଆପଣଙ୍କ ଦଳ ଏହା ଅନୁଭବ କଲେ ନାହିଁ। ମୁଁ ଦୁଃଖିତ ଯେ ମୁଁ ମୋ ଜୀବନର ଅନେକ ବର୍ଷ ଦଳକୁ ଦେଇଥିଲି।
ଅନ୍ୟପକ୍ଷରେ, ଜେଡି(ୟୁ)ର ସଂଖ୍ୟାଲଘୁ ମୋର୍ଚ୍ଚାର ରାଜ୍ୟ ସମ୍ପାଦକ ମହମ୍ମଦ ନୱାଜ ମଲିକ ମଧ୍ୟ ୱାକଫ ବିଲ୍ ପ୍ରତି ଦଳର ସମର୍ଥନ ଉପରେ କ୍ଷୋଭ ପ୍ରକାଶ କରି ଇସ୍ତଫା ଦେଇଛନ୍ତି।
ମଲ୍ଲିକ ନୀତିଶ କୁମାରଙ୍କୁ ଦେଇଥିବା ଇସ୍ତଫା ପତ୍ରରେ ଲେଖିଛନ୍ତି, "ଲକ୍ଷ ଲକ୍ଷ ଭାରତୀୟ ମୁସଲମାନଙ୍କର ଅଟଳ ବିଶ୍ୱାସ ଥିଲା ଯେ ଆପଣ ଏକ ସମ୍ପୂର୍ଣ୍ଣ ଧର୍ମନିରପେକ୍ଷ ଚିନ୍ତାଧାରାର ଧ୍ୱାଜା ବାହକ। କିନ୍ତୁ ବର୍ତ୍ତମାନ ଏହି ବିଶ୍ୱାସ ଭାଙ୍ଗି ଯାଇଛି। ୱାକଫ ସଂଶୋଧନ ବିଲ୍ ଉପରେ ଜେଡି(ୟୁ) ଯେଉଁ ମତ ରଖିଛି ତାହା ସମର୍ପିତ ଭାରତୀୟ ମୁସଲମାନ ଏବଂ ଆମ ପରି ଦଳୀୟ କର୍ମୀଙ୍କୁ ଗଭୀର ଆଘାତ ଦେଇଛି। ଲଲନ ସିଂହ ଲୋକସଭାରେ ଯେଉଁଭଳି ଭାବରେ କହିଥିଲେ ଏବଂ ଏହି ବିଲ୍କୁ ସମର୍ଥନ କରିଥିଲେ, ସେଥିରେ ଆମେ ନିରାଶ।"
