ନୂଆଦିଲ୍ଲୀ ୨।୪: ଗତ ୪ ଦିନ ହେଲା ରାଜଧାନୀ ଦିଲ୍ଲୀର ବାୟୁ ମଧ୍ୟମ ଶ୍ରେଣୀରେ ରହିବା ପରେ ବୁଧବାର ପୁଣି ପ୍ରଦୂଷିତ ହୋଇଛି। ଏଣୁ ଜାତୀୟ ରାଜଧାନୀରେ ଗ୍ରେଡେଡ ରେସ୍ପନସ ଆକ୍ସନ ପ୍ଲାନ (ଜିଆରଏପି)୧ କଟକଣା ଜାରି କରାଯାଇଛି। ମାର୍ଚ୍ଚ ୨୯ ତାରିଖରେ ଦିଲ୍ଲୀର ବାୟୁମାନରେ ବେଶ ସୁଧାର ଦେଖାଯାଇଥିଲା। ଏଣୁ ଜାରିଥିବା ସମସ୍ତ କଟକଣା ପ୍ରତ୍ୟାହାର କରି ନିଆଯାଇଥିଲା। ତେବେ ପୁଣି ବାୟୁମାନ ଖରାପ ହୋଇଥିବାରୁ ଏୟାର କ୍ୱାଲିଟି ମ୍ୟାନେଜମେଣ୍ଟ କମିଶନ (ସିଏକ୍ୟୁଏମ) କଟକଣା ଲାଗୁ ପାଇଁ ନିଷ୍ପତ୍ତି ନେଇଛନ୍ତି।
ଏହି କଟକଣା ଅନୁସାରେ ଯେଉଁ ଡିଜେଲ ଓ ପେଟ୍ରୋଲ ବାହନଙ୍କ ସମୟସୀମା ଶେଷ ହୋଇସାରିଛି ସେପରି ବାହନ ଚଳାଚଳ ଉପରେ ରୋକ ଲାଗିବ। ସେହିପରି ସହରାଞ୍ଚଳରେ କୌଣିସ ଠାରେ ଆବର୍ଜନା ଜଳାଇବା ଉପରେ ମଧ୍ୟ କଟକଣା ରହିବ। ଏହା ଛଡା ହୋଟେଲ ଓ ରେଷ୍ଟୁରାଣ୍ଟମାନଙ୍କରେ କୋଇଲା ଓ କାଠ ଜଳେଣି ଉପରେ ରୋକ ଲାଗିବ। କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ଅନୁସାରେ ବୁଧବାର ଜାତୀୟ ରାଜଧାନୀର ଏକ୍ୟୁଆଇ ୨୧୭ ରହିଛି। ମାର୍ଚ୍ଚ ୨୯ରେ ଏହା ୧୫୩ ଅର୍ଥାତ ମଧ୍ୟମ ଶ୍ରେଣୀରେ ଥିଲା।
ତେବେ କେବଳ ଦିଲ୍ଲୀ ନୁହେଁ ଏନସିଆର ଅଞ୍ଚଳରେ ବୁଧବାର ବାୟୁର ମାନ ବିଗଡି ଯାଇଛି। ପାଣିପାଗ ଦୃଷ୍ଟିରୁ ଏବେ ଦିଲ୍ଲୀ ବାୟୁମାନରେ ସେପରି କୌଣସି ସୁଧାର ହେବାର ସମ୍ଭାବନା ନାହିଁ। ଏଣୁ ବାୟୁମାନ ଯେପରି ବଦଳିବ ସେହି ଅନୁସାରେ ଜିଆରଏପି ମଧ୍ୟ ବଦଳାଯିବ ଓ ଜାତୀୟ ରାଜଧାନୀରେ ଅଧିକରୁ ଅଧିକ କଟକଣା ଲାଗୁ ହେବ।
