କଟକ ୧୫।୧: ଚାଇନା ମଞ୍ଜା ସୂତା ଲାଗି କଟକି ପରମ୍ପରା ସିନା ପ୍ରଭାବିତ ହେଲା । କିନ୍ତୁ ମକର ସଂକ୍ରାନ୍ତିରେ କଟକର ପ୍ରସିଦ୍ଧ ଗୁଡ଼ି ଉଡ଼ା ପର୍ବକୁ ବଞ୍ଚାଇ ରଖିଲେ କୁନି କୁନି ପ୍ରତିଭା । ପାଖାପାଖି ୮ ଶହ ସଂଖ୍ୟାରେ ଛାତ୍ରଛାତ୍ରୀ ମଙ୍ଗଳବାର କଟକର ମହାତ୍ମାଗାନ୍ଧୀ ପାର୍କରେ ଏକାଠି ହୋଇ ଆଙ୍କିଛନ୍ତି ଚିତ୍ର । ଯାହାର ଥିମ୍ ଥିଲା- ‘ପରମ୍ପରା ବଞ୍ଚୁ କିନ୍ତୁ ଜୀବନ ବଞ୍ଚି ରହିବା ଦରକାର ।’
ଶତାଧିକ ଶିଶୁ ପ୍ରତିଭା ମାନଙ୍କୁ ମଙ୍ଗଳବାର ଅପରାହ୍ନରେ ଦେଖିବାକୁ ମିଳିଥିଲା କଟକର ବେଲଭ୍ୟୁ ଛକ ନିକଟସ୍ଥ ମହାତ୍ମା ଗାନ୍ଧୀ ପାର୍କ ପରିସରରେ । ଯଦିଓ ମକର ସଂକ୍ରାନ୍ତିରେ ଗୁଡ଼ି ଉଡାଇବା ସମସ୍ତଙ୍କ ପକ୍ଷେ ସମ୍ଭବ ନୁହେଁ, କିନ୍ତୁ କଟକର ଏହି ଗୁଡିଉଡ଼ା ପର୍ବକୁ ନିଜ ନିଜ କାନଭାସରେ ପ୍ରତିଫଳିତ କରିଥିଲେ ପ୍ରାୟ ୮ ଶହରୁ ଅଧିକ ଶିଶୁ ଚିତ୍ରକର ।
ଚାଇନା ମାଞ୍ଜା ସୂତା କାରଣରୁ ଏବେ ଯେମିତି କଟକି ଗୁଡିଉଡ଼ା ପରମ୍ପରା ଉପରେ ଏକ ପ୍ରକାର କଟକଣା ଲାଗୁ ହୋଇଯାଇଛି । କିନ୍ତୁ ସେହି ମହାନ ପରମ୍ପରା ଯେପରି ଲୋପ ପାଇ ନଯିବ, ସେଥିଲାଗି ଓଡ଼ିଶା ଚିତ୍ରକଳା ଏକାଡ଼େମୀ ଏଭଳି ଏକ ଅଭିନବ ପ୍ରୟାସ ଆରମ୍ଭ କରିଛି । ଯାହାଦ୍ୱାରା ସାମାଜିକ ବାର୍ତ୍ତା ଯାଉଛି କି ଜୀବନ ମୂଲ୍ୟବାନ, ଗୁଡ଼ି ଉଡ଼ା ପାଇଁ ମାଞ୍ଜା ସୂତା ଜରୁରୀ ନୁହେଁ । ତେବେ କେବଳ ଚିତ୍ରକଳା ନୁହେଁ ବରଂ ଏହି ଶିଶୁ ଉତ୍ସବରେ କିଛି ଶିଶୁ କଳାକାର ମାନେ ନିଜ ନିଜର କଳା ନୈପୁଣ୍ୟତାକୁ ବିଭିନ୍ନ ବାଦ୍ୟଯନ୍ତ୍ର ଜରିଆରେ ମଧ୍ୟ ପରିପ୍ରକାଶ କରିଛନ୍ତି ।
ମଙ୍ଗଳବାର କଟକ ସହରର ବିଭିନ୍ନ ସ୍ଥାନରେ ଚଢ଼ାଉ କରି ସିଏମସି ପ୍ରଶାସନ ଏବଂ ପୋଲିସ ବିପୁଳ ମାଞ୍ଜା ସୂତା ଜବତ କରିଛି । ବିଭିନ୍ନ ସ୍ଥାନରେ ମାଞ୍ଜାସୂତା ଲାଗି ଅନେକ ଅଘଟଣ ମଧ୍ୟ ଘଟିଛି । ହେଲେ ଗୁଡ଼ି ଉଡ଼ା ସହିତ କଟକିଆ ମାନଙ୍କର ଆବେଗ ଯୋଡି ହୋଇରହିଛି, ଯାହାକୁ ଏହି କୁନି ଚିତ୍ରକର ମାନେ ନିଜ ନିଜ କାନଭାସରେ ପ୍ରତିଫଳିତ କରିବାରେ ସକ୍ଷମ ହୋଇଛନ୍ତି ।
You Can Read:
କେନ୍ଦୁଝରରେ ବର୍ଦ୍ଧିତ ଭତ୍ତା ବିତରଣ ସମାରୋହ, ଯୋଗ୍ୟ ହିତାଧିକାରୀଙ୍କୁ ଭତ୍ତା ବାଣ୍ଟିଲେ ମୁଖ୍ୟମନ୍ତ୍ରୀ
