ନୂଆଦିଲ୍ଲୀ,୧୫/୦୬: ୟୁଇଏଫଏ ୟୁରୋ ଚାମ୍ପିଅନ୍ସିପ୍ରେ ଆୟୋଜକ ଜର୍ମାନୀ ଚିତ୍ତାକର୍ଷକ ବିଜୟ । ଆଲିଆଞ୍ଜ ଏରେନାରେ ଅନୁଷ୍ଠିତ ଉଦ୍ଘାଟନୀ ମ୍ୟାଚକୁ ସହଜରେ ଜିତି ନେଇ ଅଭିଯାନ ଆରମ୍ଭ କରିଛି ଜର୍ମାନୀ । ଏହି ମୁକାବିଲାରେ ଜର୍ମାନୀ ୫-୧ ଗୋଲ୍ରେ ସ୍କଟଲାଣ୍ଡକୁ ପରାସ୍ତ କରିଛି । ମ୍ୟାଚ୍ ଆରମ୍ଭରୁ ଜର୍ମାନୀ ପ୍ରଭାବ ବିସ୍ତାର କରି ଖେଳିଥିଲା । ଦଶମ ମିନିଟ୍ରେ ଯୁବ ବିସ୍ମୟ ଫ୍ଲୋରିଆନ୍ ରିଜ ପ୍ରଥମ ଗୋଲ ସ୍କୋର କରିଥିଲେ । ଗ୍ରୁପ୍-ଏ’ର ଏହି ମୁକାବିଲା ଏକତରଫା ରହିଥିଲା ।
ଭେଟେରାନ ମିଡ୍ ଫିଲ୍ଡର ଟୋନି କ୍ରୁସ୍ଙ୍କ ଏକ ଲମ୍ବା ପାସ୍କୁ ଜୋଶୁଆ କିମିଚ ସ୍କଟଲାଣ୍ଡ ବକ୍ସ ନିକଟକୁ ପଠାଇଥିଲେ । ରିଜ ତୁରନ୍ତ ସେଠାରେ ପହଞ୍ଚି ବଲ୍କୁ ସ୍କଟଲାଣ୍ଡ ଗୋଲ୍ ପୋଷ୍ଟରେ ପହଞ୍ଚାଇ ଦେଇଥିଲେ । ମ୍ୟାଚ୍କୁ ଫେରିବା ପାଇଁ ପ୍ରସ୍ତୁତ ହେବା ପୂର୍ବରୁ ଜର୍ମାନୀ ଦ୍ୱିତୀୟ ଗୋଲ୍ ସ୍କୋର କରିଥିଲା । ଅନ୍ୟତମ ଯୁବ ଖେଳାଳି ଜମାଲ ମୁସିଆଲ୍ ୧୯ତମ ମିନିଟ୍ରେ ଏହି ଗୋଲ୍ କରି ୨-୦ରେ ଦଳକୁ ଅଗ୍ରଣୀ କରାଇଥିଲେ ।
୪୪ତମ ମିନିଟ୍ରେ ଜର୍ମାନୀ ମିଡ୍ ଫିଲ୍ଡର ଇକଲେ ଗୁଣ୍ଡୋଗାନଙ୍କୁ ଫାଉଲ ମାରି ସ୍କଟଲାଣ୍ଡ ଡିଫେଣ୍ଡର ର୍ୟାନ ପ୍ରିଟୋରିୟସ୍ ରେଡ୍ କାର୍ଡ ପାଇଥିଲେ ଓ ଜର୍ମାନୀକୁ ପେନାଲ୍ଟି ମିଳିଥିଲା । କାଇ ହାଭର୍ଜ ଏହାକୁ ଗୋଲ୍ରେ ପରିଣତ କରିବା ଫଳରେ ସ୍କଟଲାଣ୍ଡର ବିଜୟ ଆଶା ମଉଳି ଯାଇଥିଲା । ବାକି ସମୟ ୧୦ଜଣରେ ଖେଳିବାକୁ ସ୍କଟଲାଣ୍ଡ ବାଧ୍ୟ ହୋଇଥିଲା ।
ଦ୍ୱିତୀୟାର୍ଦ୍ଧରେ ମଧ୍ୟ ଜର୍ମାନୀର ଆଧିପତ୍ୟ ଜାରି ରହିଥିଲା । ମାତ୍ର ସ୍କଟଲାଣ୍ଡ ରକ୍ଷଣାତ୍ମକ ଖେଳ ପ୍ରଦର୍ଶନ କରି ଜର୍ମାନୀକୁ ଗୋଲ୍ କରିବାକୁ ସୁଯୋଗ ଦେଇ ନଥିଲା । ୬୩ତମ ମିନିଟ୍ରେ କାଇ ହାଭର୍ଜଙ୍କ ସ୍ଥାନରେ ବଦଳ ଖେଳାଳି ଭାବେ ଗ୍ରାଉଣ୍ଡକୁ ଓହ୍ଲାଇଥିବା ନିକଲାସ ଫୁଲକ୍ରୁଗ ୬୮ତମ ମିନିଟ୍ରେ ଏକ ଚମତ୍କାର ଗୋଲ କରିବା ଫଳରେ ଜର୍ମାନୀ ୪-୦ ଗୋଲ୍ରେ ଆଗେଇଥିଲା ।
ଶେଷରେ ୮୭ତମ ମିନିଟ୍ରେ ସ୍କଟଲାଣ୍ଡ ଏକ ଗୋଲ୍ ପରିଶୋଧ କରିବାରେ ସଫଳ ହୋଇଥିଲା । ମାତ୍ର ଏହା ଦଳକୁ ପରାଜୟରୁ ଏଡ଼ାଇବା ପାଇଁ ଯଥେଷ୍ଟ ନଥିଲା । ୯୦ + ୩ତମ ମିନିଟ୍ରେ ଥୋମାସ୍ ମୁଲରଙ୍କ ଠାରୁ ଏକ ପାସ୍ ପାଇ ଏମ୍ରେ କାନ୍ ଏହି ଗୋଲ କରିଥିଲେ । ଫଳରେ ଜର୍ମାନୀ ୫-୧ରେ ମ୍ୟାଚ ହାତେଇ ନେଇଥିଲା ।
