ଭୁବନେଶ୍ବର ୨୪।୩: ରାଜ୍ୟରେ ୭୬୪ ଗ୍ରାମ ପଞ୍ଚାୟତରେ ନାହିଁ ଇଣ୍ଟରନେଟ୍ ଓ ମୋବାଇଲ କମ୍ୟୁନିକେସନ୍ ସେବା । ବିଧାନସଭାରେ ଏଭଳି ଲିଖିତ ଉତ୍ତର ରଖିଛନ୍ତି ସୂଚନା ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଡ. ମୁକେଶ ମହାଲିଙ୍ଗ । ବିଧାନସଭାରେ ବିଜେଡ଼ି ବିଧାୟକ ରମେଶ ଚନ୍ଦ୍ର ବେହେରାଙ୍କ ପ୍ରଶ୍ନରେ ଉତ୍ତର ରଖି ମନ୍ତ୍ରୀ ମହାଲିଙ୍ଗ କହିଛନ୍ତି, ରାଜ୍ୟରେ ୧୬୭ ବ୍ଲକର ୭୬୪ଟି ଗ୍ରାମ ପଞ୍ଚାୟତରେ ଇଣ୍ଟରନେଟ୍ ଓ ମୋବାଇଲ କମ୍ୟୁନିକେସନ୍ ସେବା ଉପଲବ୍ଧ ନାହିଁ । ଏହି ପଞ୍ଚାୟତରେ ଟାୱାର ମଧ୍ୟ ଉପଲବ୍ଧ ନାହିଁ । ସର୍ବାଧିକ କନ୍ଧମାଳ ଜିଲ୍ଲାର ୧୩ଟି ବ୍ଲକର ୧୦୬ ପଞ୍ଚାୟତରେ ଟାୱାର ନାହିଁ ।
ଭାରତ ସରକାର ରାଜ୍ୟର ସମସ୍ତ ଗ୍ରାମକୁ ମୋବାଇଲ ଓ ନେଟଓ୍ବର୍କ ସେବା ଯୋଗାଇବା ପାଇଁ ଡିଜିଟାଲ ଭାରତ ନିଧି ଯୋଜନା ଅନ୍ତର୍ଗତ ଆସପିରେସନାଲ୍ ଆଣ୍ଡ୍ ଏଲଡବ୍ଲୁଇ-II ଓ 4ଜି ସାଚୁରେସନ ପ୍ରକଳ୍ପ ମାଧ୍ୟମରେ ମୋଟ୍ ୪୨୭୭ଟି ଟାଓ୍ବାର ସ୍ଥାପନ ପାଇଁ ଲକ୍ଷ୍ୟ ରଖିଛନ୍ତି । ସେଥିମଧ୍ୟରୁ ୨୦୮୫ଟି ଟାଓ୍ବାର ସମ୍ପୂର୍ଣ୍ଣ କାର୍ଯ୍ୟକ୍ଷମ ହୋଇ ମୋବାଇଲ ଓ ନେଟଓ୍ବର୍କ ସୁବିଧା ଯୋଗାଇ ଦିଆଯାଇଛି । ଜୁନ୍ ୨୦୨୫ ସୁଦ୍ଧା ବଳକା ୨୧୯୨ଟି ଟାୱାର କାର୍ଯ୍ୟକ୍ଷମ ହୋଇଗଲେ ରାଜ୍ୟର ପ୍ରାୟ ସମସ୍ତ ଗ୍ରାମକୁ ମୋବାଇଲ ଓ ନେଟଓ୍ବର୍କ ସୁବିଧା ଉପଲବ୍ଧ ହୋଇପାରିବ ବୋଲି ମନ୍ତ୍ରୀ କହିଛନ୍ତି ।
ଉଲ୍ଲେଖଯୋଗ୍ୟ ଯେ, ରାଜ୍ୟରେ ଏପର୍ଯ୍ୟନ୍ତ କେତୋଟି ପଞ୍ଚାୟତ କାର୍ଯ୍ୟାଳୟରେ ଇଣ୍ଟରନେଟ୍ ଓ ମୋବାଇଲ ଟେଲିକମ୍ୟୁନିକେସନ ସେବା ଉପଲବ୍ଧ ନାହିଁ ତାର ତଥ୍ୟ ପ୍ରଦାନ କରିବା ସହ ସମ୍ପୃକ୍ତ ଗ୍ରାମପଞ୍ଚାୟତ ଗୁଡିକୁ କେବେସୁଦ୍ଧା ଉକ୍ତ ସେବା ଯୋଗାଇ ଦିଆଯିବ ପ୍ରଶ୍ନରେ ସୂଚନା ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଡ. ମୁକେଶ ମହାଲିଙ୍ଗ ଏହି ଉତ୍ତର ରଖିଛନ୍ତି ।
You Can Read:
