ଜଲଗାଓଁ,୨୩/୦୧: ମହାରାଷ୍ଟ୍ରର ଜଲଗାଓଁରେ ବୁଧବାର ଏକ ହୃଦୟବିଦାରକ ରେଳ ଦୁର୍ଘଟଣା ଘଟିଛି । ନିଆଁ ଗୁଜବରୁ ଗୋଟିଏ ଟ୍ରେନର ଯାତ୍ରୀ ବାହାରକୁ ଡେଇଁପଡ଼ିଥିଲେ । ସେମାନଙ୍କ ଉପରେ ଅନ୍ୟ ଏକ ଟ୍ରେନ ମାଡ଼ିଯାଇଛି । ଫଳରେ ୧୩ ଜଣ ଯାତ୍ରୀ ପ୍ରାଣ ହରାଇଥିବା ବେଳେ ୪୦ ଜଣ ଆହତ ହୋଇଛନ୍ତି । ମହାରାଷ୍ଟ୍ରର ଜଲଗାଓଁସ୍ଥିତ ପାଚୋରା ଷ୍ଟେସନ ନିକଟବର୍ତ୍ତୀ ମାହେଜି ଓ ପରଧାଡ଼େ ମଝିରେ ଏହି ଦୁର୍ଘଟଣା ବୁଧବାର ସନ୍ଧ୍ୟା ୪ଟା ୫୦ରେ ଘଟିଛି ।
ଲକ୍ଷ୍ନୌ-ମୁମ୍ବାଇ ପୁଷ୍ପକ ଏକ୍ସପ୍ରେସ ଅଚାନକ ରହିଯିବାରୁ ଏଥିରେ ନିଆଁ ଲାଗିଥିବା ନେଇ ଗୁଜବ ସୃଷ୍ଟି ହୋଇଥିଲା । ଏହାପରେ କିଛି ଯାତ୍ରୀ ଚେନ୍ ଟାଣି ପ୍ରାଣ ବିକଳରେ ବାହାରକୁ ଡେଇଁଥିଲେ । ଠିକ୍ ଏତିକି ବେଳେ ବିପରୀତ ଦିଗରୁ ଦ୍ରୁତ ବେଗରେ ଆସୁଥିବା ବେଙ୍ଗାଲୁରୁ-ନୂଆଦିଲ୍ଲୀ କର୍ଣ୍ଣାଟକ ଏକ୍ସପ୍ରେସ ସେମାନଙ୍କ ଉପରେ ମାଡ଼ିଯାଇଥିଲା ।
ରେଳ ଅଧିକାରୀଙ୍କ ଅନୁସାରେ, କର୍ଣ୍ଣାଟକ ଏକ୍ସପ୍ରେସ ଅଚାନକ ବୁଲାଣି ଟ୍ରାକ୍ (ସାର୍ପ ଟର୍ନ)ରେ ଗତି କରୁଥିବା ବେଳେ ଡ୍ରାଇଭର ରେଳ ଧାରଣା ଉପରେ ଲୋକଙ୍କୁ ଦେଖିପାରି ନ ଥିଲେ । ବୁଲାଣି ଶେଷ ହେବା କ୍ଷଣି ଏତେ ଲୋକଙ୍କୁ ଦେଖି ହତବାକ୍ ହୋଇଯାଇଥିଲେ । କ’ଣ କରିବେ ତାଙ୍କୁ ବୁଦ୍ଧି ଦିଶି ନ ଥିଲା । ଜୋରରେ ହର୍ନ ବଜାଇବା ସହ ବ୍ରେକ୍ କଷିବାକୁ ଲାଗିଥିଲେ । କିନ୍ତୁ ଦ୍ରୁତ ଗତି ଯୋଗୁ ଟ୍ରେନ୍କୁ ସେ ରୋକିପାରି ନ ଥିଲେ, ଯାହାଦ୍ୱାରା ଏହି ଦୁର୍ଘଟଣା ଘଟିଥିଲା ।
ପ୍ରତ୍ୟକ୍ଷଦର୍ଶୀଙ୍କ ମୁତାବକ, ଯାତ୍ରୀମାନେ ପୁଷ୍ପକ ଏକ୍ସପ୍ରେସରୁ ଡେଇଁବା ପରେ କର୍ଣ୍ଣାଟକ ଏକ୍ସପ୍ରେସକୁ ଦେଖିନେଇଥିଲେ । କିନ୍ତୁ ଗହଳି ଅଧିକ ଥିବାରୁ ସେମାନେ ନିଜକୁ ଧାରଣାରୁ ଏତେଶୀଘ୍ର ହଟାଇ ପାରି ନ ଥିଲେ । ଖବର ପାଇ ରେଳ କର୍ତ୍ତୃପକ୍ଷ ଓ ସ୍ଥାନୀୟ ଜରୁରି ସେବା ବିଭାଗ ଦୁର୍ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜୋରଦାର କରିଥିଲେ । ସ୍ଥାନୀୟ ଲୋକମାନେ ମଧ୍ୟ ଉଦ୍ଧାର କାର୍ଯ୍ୟରେ ସହଯୋଗ କରିଥିଲେ । ୮ଟି ଆମ୍ବୁଲାନ୍ସରେ ମେଡିକାଲ ଟିମ୍ ଆହତ ଯାତ୍ରୀଙ୍କୁ ତୁରନ୍ତ ଚିକିତ୍ସା ଯୋଗାଇଥିଲେ ।
ମୃତ ଯାତ୍ରୀଙ୍କ ଶବଗୁଡ଼ିକୁ ଉଦ୍ଧାର ପରେ ଜଲଗାଓଁସ୍ଥିତ ହସ୍ପିଟାଲରେ ରଖାଯାଇଛି । କେନ୍ଦ୍ରୀୟ ରେଳପଥ ଓ ପଶ୍ଚିମ କେନ୍ଦ୍ରୀୟ ରେଳପଥ ତରଫରୁ ହେଲ୍ପଲାଇନ ନମ୍ବର ଜାରି ହୋଇଛି । ମୁମ୍ବାଇଠାରୁ ୪୦୦ କିଲୋମିଟର ଓ ଜଲଗାଓଁରୁ ୨୦ କିଲୋମିଟର ଦୂରରେ ଏହି ଦୁର୍ଘଟଣା ଘଟିଛି ।
ଜଣେ ବରିଷ୍ଠ ରେଳ ଅଧିକାରୀ କହିଛନ୍ତି, କର୍ଣ୍ଣାଟକ ଏକ୍ସପ୍ରେସ (୧୨୬୨୭) ଯଶୋୱନ୍ତପୁରରୁ ହଜରତ ନିଜାମୁଦ୍ଦିନ ଅଭିମୁଖେ ଯାଉଥିଲା । ଏହି ସମୟରେ ପୁଷ୍ପକ ଏକ୍ସପ୍ରେସ (୧୨୫୩୩) ଲକ୍ଷ୍ନୌରୁ ମୁମ୍ବାଇ ଯାଉଥିଲା । ପୁଷ୍ପକ ଏକ୍ସପ୍ରେସର ଏକ ବଗି ଭିତରେ ‘ହଟ୍ ଏକ୍ସେଲ’ ବା ‘ବ୍ରେକ୍-ବାଇଣ୍ଡିଙ୍ଗ୍ (ଜାମିଙ୍ଗ୍)’ ଯୋଗୁ ଧୂଆଁ ବାହାରିଥିଲା । ଏହାକୁ ଦେଖି କିଛି ଯାତ୍ରୀ ଭୟଭୀତ ହୋଇପଡ଼ିଥିଲେ । ସେମାନେ ଭୟରେ ଚେନ୍ ଟାଣିଥିଲେ । ଏହାପରେ ବଗିରେ ଥିବା ଅନ୍ୟମାନେ ତଳକୁ ଡେଇଁଥିଲେ ।
ରେଳ ଦୁର୍ଘଟଣାକୁ ନେଇ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ, ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନବିସ ଶୋକବ୍ୟକ୍ତ କରିଛନ୍ତି । ମହାରାଷ୍ଟ୍ର ସରକାର ମୃତ ଯାତ୍ରୀଙ୍କ ପରିବାରକୁ ୫ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ରାଶି ପ୍ରଦାନ ଲାଗି ଘୋଷଣା କରିଛନ୍ତି । ସେହିଭଳି ରେଳପଥ ପକ୍ଷରୁ ମୃତକଙ୍କ ପରିବାରକୁ ୧.୫ ଲକ୍ଷ, ଆହତଙ୍କୁ ୫୦ ହଜାର ଓ ସାମାନ୍ୟ ଆହତଙ୍କୁ ୫ ହଜାର ଟଙ୍କା ସହାୟତା ଦେବାକୁ ଘୋଷଣା ହୋଇଛି ।
