ନୂଆଦିଲ୍ଲୀ: ପ୍ରଶାନ୍ତ ବର୍ମାଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଜୟ ହନୁମାନ’ ଯେବେଠୁ ଘୋଷଣା ହୋଇଛି ତାହା ଚର୍ଚ୍ଚାର ବିଷୟ ପାଲଟିଛି। ‘ଜୟ ହନୁମାନ’ ପ୍ରଶାନ୍ତ ବର୍ମାଙ୍କ ସିନେମାଟିକ ୟୁନିଭର୍ସ(ପିଭିସିୟୁ)ର ଏକ ମହତ୍ଵପୂର୍ଣ୍ଣ ପ୍ରୋଜେକ୍ଟ। ଫିଲ୍ମ ‘ ହନୁମାନ’ର ଜବରଦସ୍ତ ସଫଳତା ତାଙ୍କୁ ଏହି ପ୍ରୋଜେକ୍ଟ ପାଇଁ ଅଧିକ ଉତ୍ସାହିତ କରିଛି। ଏବେ ସଭିଙ୍କ ନଜର ‘ଜୟ ହନୁମାନ’ ଉପରେ ରହିଛି।
ଏହି ଚଳଚ୍ଚିତ୍ର ସବୁଠୁ ପବିତ୍ର ଓ ପ୍ରସିଦ୍ଧ ପୌରାଣିକ ସୁପରହିରୋଙ୍କୁ ଉଜ୍ଜିବୀତ କରିବାକୁ ଯାଉଛି। ଏହି ଫିଲ୍ମ ସିନେ ପ୍ରେମୀଙ୍କୁ ଭିନ୍ନ ଧରଣର ଅନୁଭୂତି ପ୍ରଦାନ କରିବ। କାରଣ ନିକଟରେ ରିଲିଜ ହୋଇଥିବା ଏହାର ପ୍ରଥମ ଲୁକ୍ରେ କାନ୍ତାରା ଷ୍ଟାର ଋଷଭ ସେଟ୍ଟୀଙ୍କୁ ଭଗବାନ ହନୁମାନଙ୍କ ରୂପରେ ଦେଖିବାକୁ ମିଳିଛି। ‘ଜୟ ହନୁମାନ’ର ପ୍ରଥମ ପୋଷ୍ଟର ହିଁ ଦର୍ଶକଙ୍କୁ ରୋମାଞ୍ଚିତ କରିଛି।
ଦୀପାବଳି ଅବସରରେ ଚଳଚ୍ଚିତ୍ରର ପ୍ରଥମ ଝଲକ ଦେଖିବାକୁ ମିଳିଛି, ଯେଉଁଥିରେ ଋଷଭ ସେଟ୍ଟୀଙ୍କୁ ଭଗବାନ ହନୁମାନଙ୍କ ରୂପରେ ଦେଖିବାକୁ ମିଳିଛି। ନିର୍ମାତା ଏହି ରୋମାଞ୍ଚକର ପ୍ରଥମ ଲୁକ୍କୁ ଏକ ସ୍ଵତନ୍ତ୍ର କ୍ୟାପସନ ସହିତ ସେୟାର କରି ଲେଖିଛନ୍ତି- ବଚନପାଲନଂ ଧର୍ମସ୍ୟ ମୂଲମ।
ପ୍ରଥମ ଲୁକ୍ ପୋଷ୍ଟର ଏକ ନୂଆ ଇଣ୍ଡିଆନ ସୁପରହିରୋର ସଙ୍କେତ ଦେଇଛି। ଏହା ଦୁନିଆର ସବୁଠୁ ବଡ ସୁପରହିରୋ ବିଶିଷ୍ଟ ଚଳଚ୍ଚିତ୍ର ହେବାକୁ ଯାଉଛି। ନବୀନ ୟେରନେନୀ ଓ ଓ୍ଵାଇ ରବିଶଙ୍କରଙ୍କ ଦ୍ଵାରା ନିର୍ମିତ ହେବାକୁ ଥିବା ଫିଲ୍ମ ‘ଜୟ ହନୁମାନ’ ଉଚ୍ଚ ଗୁଣବତ୍ତା ଓ ଉଚ୍ଚ କ୍ଷମତା ସଂପନ୍ନ ଟେକ୍ନୋଲୋଜିର ପ୍ରୟୋଗ କରାଯିବ। କାରଣ ନିର୍ମାତା ସର୍ବଦା କ୍ଵାଲିଟିକୁ ବିଶେଷ ଭାବେ ଧ୍ୟାନ ଦେଇଥାନ୍ତି।
