ନୂଆଦିଲ୍ଲୀ: ନିର୍ବାଚନୀ ଇସ୍ତହାରରେ ଦେଇଥିବା ପ୍ରତିଶ୍ରୁତି ପୂରଣ କରୁଛି ଭାରତୀୟ ଜନତା ପାର୍ଟି । କୋର୍ ଏଜେଣ୍ଡାରେ କାର୍ଯ୍ୟ କରୁଛି ଦଳ। ପ୍ରଧାନମନ୍ତ୍ରୀଙ୍କ ନେତୃତ୍ବରେ ସଂଶୋଧନ ହେଉଛି ସମ୍ବିଧାନ । ରାମମନ୍ଦିର, ଧାରା-୩୭୦, ତିନି ତଲାକ୍, ନାଗରିକତା ସଂଶୋଧନ ଆଇନ, ସାମାନ ନାଗିରକ ସଂହିତା, ପରେ ଓ୍ବାକଫ୍ ବିଲ୍ ଭଳି ବଡ଼ ଲକ୍ଷ୍ୟ ହାସଲ । ପିଏମ୍ ମୋଦିଙ୍କ ଏହି ପଦକ୍ଷେପ ମୂଳ ବିଜେପି ସମର୍ଥକଙ୍କୁ ସନ୍ତୁଷ୍ଟ କରିବା ଦେଶର ରାଜନୀତିକୁ ଏକ ନୂଆ ଦର୍ଶନ ଆଡ଼କୁ ନେଇଯାଇଛି । ସମ୍ବିଧାନ ସଂଶୋଧନ କରିବାରେ ବିଜେପିର ଲକ୍ଷ୍ୟ ହାସଲ ହୋଇଛି କିମ୍ବା ସେହି ଦିଗରେ ବଡ଼ ପଦକ୍ଷେପ ଉଠାଇଛି । ଏବେ ମୁଖ୍ୟ ମୁଦ୍ଦା ସବୁ ଶେଷ ବେଳେ ସରକାରଙ୍କ ଆଗାମୀ ଏଜେଣ୍ଡା କ’ଣ ହେବ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ବିଜେପି ସରକାର ଗତ ଦୁଇଟି କାର୍ଯ୍ୟକାଳ ଓ ତୃତୀୟ ପାଳିର ପ୍ରଥମ ୧୦ ମାସରେ ବହୁ ଗୁରୁତ୍ବପୂର୍ଣ୍ଣ ମୁଦ୍ଦା ଉଠାଇଛି । ପ୍ରଥମେ ଜମ୍ମୁ-କାଶ୍ମୀରରୁ ଧାରା ୩୭୦ ଉଠାଇବା ପରେ ରାମମନ୍ଦିର ନିର୍ମାଣ, ତିନି ତଲାକ୍ ହଟିବା, ସିଏଏ, ୟୁସିସି ପରେ ଓ୍ବାକଫ୍ ବିଲ୍ ସଂଶୋଧନ ଆଦି ଦେଶର ସାଂସ୍କୃତିକ ଏକତା ଓ ଜାତୀୟତା ଚିନ୍ତା ଧାରାକୁ ପରିପ୍ରକାଶ କରୁଛି । ତେବେ ଭାରତୀୟ ଜନତା ପାର୍ଟିର ମୁଖ୍ୟ ଏଜେଣ୍ଡା ଶେଷ ହୋଇଥିବା ବେଳେ ଏବେ ମଥୁରା-କାଶୀ ବିବାଦ, ଜନସଂଖ୍ୟା ନିୟନ୍ତ୍ରଣ, ଜନସଂଖ୍ୟା ରେଜିଷ୍ଟର ବା ଏନଆରସି ଭଳି ମୁଦ୍ଧା ଉପରେ କାର୍ଯ୍ୟ କରିବ ବୋଲି କୁହାଯାଉଛି । ବିଜେପିର ପରିଭାଷାରେ ଭାରତର ସାଂସ୍କୃତିକ ଏକତା ରହିଛି । ଯେଉଁଠି ସମାନ ଆଇନ ଓ ସମାନ ପରିଚୟ ବରାବର ହେବା ଦରକାର ।
ରାମ ମନ୍ଦିର: ଅଯୋଧ୍ୟରେ ରାମ ମନ୍ଦିର ନିର୍ମାଣ ମିଶନ ପୂର୍ଣ୍ଣ କରି ବିଜେପି ହିନ୍ଦୁ ଗୌରବ ଓ ସାଂସ୍କୃତିକ ପୁନର୍ଜାଗରଣର ପକ୍ଷକୁ ସ୍ଥାପିତ କରିଛି । ଏହା ଏଭଳି ଏକ ମୁଦ୍ଦା ଯାହା ଦଶନ୍ଧି ଦଶନ୍ଧି ଧରି ଲାଗି ରହିଥିବା ସାଂପ୍ରଦାୟିକ ଉତ୍ତେଜନାକୁ ବାଦ୍ ଦେଇ ସଫଳ ହୋଇଛି ।
ଅନୁଚ୍ଛେଦ ୩୭୦: ଜମ୍ମୁ-କାଶ୍ମୀରରୁ ଅନୁଚ୍ଛେଦ ୩୭୦ ହଟାଇବା, କାଶ୍ମୀରକୁ ଭାରତ ସହିତ ପୁର୍ଣ୍ଣ ଏକକୀକରଣର ପ୍ରତୀକ ଥିଲା । ଯାହା ବିଜେପିର ‘ଏକ ରାଷ୍ଟ୍ର, ଏକ ସମ୍ବିଧାନ’ ବିଚାରକୁ ମଜବୁତ କରୁଛି । ୨୦୧୯ ମସିହା ଅଗଷ୍ଟ ୫ରେ ଅନୁଚ୍ଛେଦ ୩୭୦କୁ ଜମ୍ମୁ-କାଶ୍ମୀରରୁ ହଟାଇ ଦିଆଯାଇଛି । ଏହି ରାଜ୍ୟକୁ ଦୁଇଟି କେନ୍ଦ୍ର ଶାସିତ ଅଞ୍ଚଳ ଯଥା ଜମ୍ମୁ-କାଶ୍ମୀର ଓ ଲଦାଖ ଗଠିତ ହୋଇଛି ।
ତିନି ତଲାକ ଓ ଓ୍ବାକଫ୍: ଦେଶରେ ରହୁଥିବା ମୁସଲିମ୍ ମାଆ-ଉଉଣୀ ନ୍ୟାୟ ଦେବା ଏବଂ ଧର୍ମ ନିରପେକ୍ଷତାକୁ ଏକ ନୂଆ ପରିସୀମା ଭିତରକୁ ନେବାକୁ ଇସାରା ଦେଉଛି । ଯେଉଁଠି ଜାତୀୟ ଆଇନ ସଂସ୍ଥାଗତ ଆଇନ ଠାରୁ ଅଧିକ ପ୍ରଭାବୀ ହୋଇଛି । ବିଜେପି ସରକାର ତିନି ତଲାକ ଓ ଓ୍ବାକଫ୍ ଆଇନ ସଂଶୋଧନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି ମୁସଲିମ୍ ସମାଜ ସହିତ ମହିଳା ଓ ଗରିବଙ୍କୁ ଅଧିକାର ଦେବ ।
ସିଏଏ: ନାଗରିକତା ସଂଶୋଧନ ଆଇନ ଜରିଆରେ ଭାରତୀୟ ଜନତା ପାର୍ଟି ପଡୋଶୀ ଦେଶରୁ ପ୍ରତାଡିତ ହୋଇଥିବା ଅଣ ମୁସଲିମ୍ ସଂଖ୍ୟା ଲଘୁଙ୍କୁ ସହଯୋଗ କରି ଏବଂ ସେମାନଙ୍କୁ ଭାରତୀୟ ନାଗରିକତା ପ୍ରଦାନ କରିବ ।
ମଥୁରା-କାଶୀ ବିବାଦ:
ଦେଶର ବଡ଼ ମୁଦ୍ଦା ଶେଷ ହୋଇଥିବା ବେଳେ ଏବେ ମଥୁରା-କାଶୀ ବିବାଦ ଉପରେ କାର୍ଯ୍ୟ କରିବାକୁ ଆଗଭର ହେବ ଭାରତୀୟ ଜନତା ପାର୍ଟି । ହେଲେ ଦଳ ଏହାକୁ ଅଦାଲତ ଜରିଆରେ ସମାଧାନ କରିବାକୁ ଚାହୁଁଛି । ବାରଣାସୀ ଏବଂ ମଥୁରାରେ ଥିବା ମନ୍ଦିରକୁ ପୁନଃ ପ୍ରାପ୍ତ କରିବା ବିଜେପିର ଏଜେଣ୍ଡାରେ ଅଛି କି ନାହିଁ ଏନେଇ ପ୍ରଶ୍ନ କରିବାରୁ ବିଜେପି ଅଧିକ୍ଷ ଜେ.ପି ନଡ୍ଡା ୨୦୨୨ରେ କହିଥିଲେ, ବିବାଦୀୟ ଧାର୍ମିକସ୍ଥଳ ଗୁଡ଼ିକର ନିଷ୍ପତ୍ତି ନ୍ୟାୟଳୟ ଓ ସମ୍ବିଧାନ ଦ୍ବାରା ସମାଧାନ କରାଯିବ ବୋଲି କହିଥିଲେ ।
ଜାତୀୟ ନାଗରିକ ରେଜିଷ୍ଟାର:
ନ୍ୟାଶନାଲ ରେଜିଷ୍ଟାର ଅଫ୍ ସିଟିଜେନ୍ସ ଭାରତରେ ଏକ ସରକାରୀ ରେଜିଷ୍ଟାର ଅଟେ. ଯେଉଁଥିରେ ଦେଶରେ ବୈଧ ନାଗରିକଙ୍କୁ ନାଁ ଓ ପରିଚୟ ରେକର୍ଡ ହୋଇ ରହିଥାଏ । ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଭାରତରେ ବେଆଇନ ଭାବେ ରହୁଥିବା ପ୍ରବାସୀଙ୍କୁ ଚିହ୍ନଟ କରି ସେମାନଙ୍କୁ ଦେଶରୁ ବାହାର କରିବା । ଦେଶରେ ଆସାମ ଏକମାତ୍ର ରାଜ୍ୟ, ଯିଏ ଏନଆରସିକୁ ଅପଡେଟ୍ କରିଛି । ଏହି ପ୍ରକ୍ରିୟା ୨୦୧୩ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଉପରେ ଆରମ୍ଭ ହୋଇଥିଲା ଏବଂ ୨୦୧୯ ଅଗଷ୍ଟ ୩୧ ତାରିଖରେ ଅନ୍ତିମ ଏନଆରସି ସୂଚୀ ପ୍ରକାଶିତ ହୋଇଥିଲା ।...
