ନୂଆଦିଲ୍ଲୀ: ବିଶ୍ୱରେ ବଢ଼ିଛି ଭାରତୀୟ ବଂଶୋଦ୍ଭବଙ୍କ ପ୍ରଭାବ। ସେମାନଙ୍କ ପ୍ରତିଭାକୁ ନେଇ ସବୁଆଡ଼େ ପ୍ରଶଂସା। ଦୁନିଆର ଅନେକ ବଡ଼ କମ୍ପାନିଙ୍କ ସଫଳ ନେତୃତ୍ବ କରୁଛନ୍ତି ଭାରତୀୟ ବଂଶୋଦ୍ଭବ। ମାଇକ୍ରୋସଫ୍ଟ ହେଉ କିମ୍ବା ଆଲଫାବେଟ, ୟୁଟ୍ୟୁବ ହେଉ ଅବା ଗୁଗଲ କ୍ଲାଉଡ, ଏହି ସବୁ କମ୍ପାନିଙ୍କ ଦାୟିତ୍ୱ ଆଜି ଭାରତୀୟ ବଂଶୋଦ୍ଭବଙ୍କ ହାତରେ । ଏଚଏସବିସି ହୁରୁନ ଗ୍ଲୋବାଲ ଇଣ୍ଡିଆନ୍ସର ଶୀର୍ଷ ୧୦ କିଛି ଭାରତୀୟ ବଂଶୋଦ୍ଭବ ସିଇଓଙ୍କ ବିଷୟରେ ଆସନ୍ତୁ ଜାଣିବା
ଚମକିଲେ ଭାରତୀୟ ବଂଶୋଦ୍ଭବ ।
ଦୁନିଆର ୧୦ ବଡ଼ କମ୍ପାନିର ସିଇଓ ପଦରେ ଏବେ ଭାରତୀୟ ବଂଶୋଦ୍ଭବ। ଏଚଏସବିସି ହୁରୁନ ଗ୍ଲୋବାଲ ଇଣ୍ଡିଆନ୍ସ ଲିଷ୍ଟ ୨୦୨୪ ଅନୁଯାୟୀ, ବିଶ୍ୱର ଟପ୍ ମଲ୍ଟି ନାସନାଲ କମ୍ପାନିଙ୍କ ସିଇଓ ପଦରେ ଏବେ ରହିଛନ୍ତି ଭାରତୀୟ ବଂଶୋଦ୍ଭବ। ତାଲିକାର ୧ ନମ୍ବରରେ ରହିଛନ୍ତି ମାଇକ୍ରୋସଫ୍ଟର ଚେୟାରମ୍ୟାନ ଏବଂ ସିଇଓ ସତ୍ୟ ନଡେଲା। ତାଙ୍କ ନେତୃତ୍ୱରେ ମାଇକ୍ରୋସଫ୍ଟ, ଇନୋଭେସନ ଏଆଇ ଏବଂ ଡିଜିଟାଲ ଟ୍ରାନ୍ସଫର୍ମେସନ କ୍ଷେତ୍ରରେ ଖୁବ୍ ଆଗେଇଛି। ଯାହା କମ୍ପାନିଙ୍କୁ ବେଶ୍ ସଫଳତା ମଧ୍ୟ ଆଣିଦେଇଛି।
ଆଲଫାବେଟ୍ ସିଇଓ ସୁନ୍ଦର ପିଚାଇ
ଏଚବିସି ହୁରୁନ ଗ୍ଲୋବାଲ ଇଣ୍ଡିଆନ୍ସ ଲିଷ୍ଟ ୨୦୨୪ର ଦ୍ବିତୀୟ ସ୍ଥାନରେ ଅଛନ୍ତି ଆଲଫାବେଟ ସିଇଓ ସୁନ୍ଦର ପିଚାଇ । ପିଚାଇ ଗୁଗଲରେ ଇନୋଭେସନ ଏବଂ କମ୍ପାନିର ବିକାଶ ଦିଗରେ ଉଲ୍ଲେଖନୀୟ କାମ କରିଛନ୍ତି। ଏଆଇ, କ୍ଲାଉଡ କମ୍ପ୍ୟୁଟିଂ ଏବଂ କଞ୍ଜ୍ୟୁମର ପ୍ରଡକ୍ଟସ କ୍ଷେତ୍ରରେ ମଧ୍ୟ ଅନେକ ମହତ୍ବପୂର୍ଣ୍ଣ ପଦକ୍ଷେପ ନେଇଛନ୍ତି। ତାଙ୍କ ପରେ ତୃତୀୟ ସ୍ଥାନରେ ରହିଛନ୍ତି ୟୁଟ୍ୟୁବ ସିଇଓ ନୀଲ ମୋହନ । ନୀଲଙ୍କ ନେତୃତ୍ୱରେ ୟୁଟ୍ୟୁବ ଦ୍ୱିତୀୟ ସବୁଠୁ ବଡ଼ ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମ ହୋଇଛି। ଚତୁର୍ଥ ସ୍ଥାନରେ ରହିଛନ୍ତି ଗୁଗଲ କ୍ଲାଉଡର ସିଇଓ ଥମସ କୁରିୟନ। କ୍ଲାଉଡ କମ୍ପ୍ୟୁଟିଂ କ୍ଷେତ୍ରରେ ତାଙ୍କର ଦକ୍ଷତା କାରଣରୁ ତାଙ୍କୁ ଜଣେ ଦୂରଦର୍ଶୀ ଲିଡର ବୋଲି କୁହାଯାଏ।
ତାଲିକାର ପଞ୍ଚମ ସ୍ଥାନରେ ଅଛନ୍ତି ଆଡୋବ ଚେୟାରମ୍ୟାନ ଏବଂ ସିଇଓ ଶାନ୍ତନୁ ନାରାୟଣ । ସେ ଆଡୋବର ଡିଜିଟାଲ ମିଡିଆ ଏବଂ ମାର୍କେଟିଂର ମୁଖ୍ୟ ଅଛନ୍ତି। ତାଙ୍କ ନେତୃତ୍ୱରେ ଆଡୋବ ସାରା ବିଶ୍ୱରେ ସଫଳ ହୋଇଛି। ତାଙ୍କ ପରେ ଷଷ୍ଠ ସ୍ଥାନରେ ଅଛନ୍ତି ଲିଣ୍ଡେର ସିଇଓ ସଞ୍ଜୀବ ଲାମ୍ବା । ରସାୟନ ଏବଂ ପେଟ୍ରୋକେମିକାଲ୍ସ କ୍ଷେତ୍ରରେ କାମ କରୁଥିବା ଏହି କମ୍ପାନିର ଜଣେ ଅନୁଭବୀ ଲିଡର ହୋଇପାରିଛନ୍ତି ସଞ୍ଜୀବ। ନୋଭାର୍ଟିସର ସିଇଓ ବସନ୍ତ ନରସିମ୍ହନ ଏହି ତାଲିକାର ୭ମ ସ୍ଥାନରେ ରହିଛନ୍ତି। କମ୍ପାନିକୁ ଦୁନିଆର ଏକ ଅଗ୍ରଣୀ ଫାର୍ମାସ୍ୟୁଟିକାଲ୍ କମ୍ପାନିରେ ପରିଣତ କରିବାରେ ମହତ୍ୱପୂର୍ଣ୍ଣ ଭୂମିକା ନିଭାଇଛନ୍ତି ବସନ୍ତ।
ଆଇବିଏମ ସିଇଓ ଅରବିନ୍ଦ କୃଷ୍ଣାସେହିଭଳି ୮ମ ସ୍ଥାନରେ ରହିଛନ୍ତି ଆଇବିଏମର ଚେୟାରମ୍ୟାନ ଏବଂ ସିଇଓ ଅରବିନ୍ଦ କ୍ରିଷ୍ଣା । ତାଙ୍କ ପଛକୁ ହନିଓ୍ବେଲ ଇଣ୍ଟରନାସନାଲର ଚେୟାରମ୍ୟାନ ଏବଂ ସିଇଓ ଭିମଲ କପୂର ନବମ ସ୍ଥାନରେ ଅଛନ୍ତି। ଷ୍ଟ୍ରାଇକରର ଚେୟାରମ୍ୟାନ୍ ତଥା ସିଇଓ କେଭିନ୍ ଲୋବୋ ଦଶମ ସ୍ଥାନରେ ଅଛନ୍ତି । ଡାକ୍ତରୀ ପ୍ରଯୁକ୍ତିବିଦ୍ୟା କ୍ଷେତ୍ରରେ ନୂତନ ପଦ୍ଧତି ପ୍ରସ୍ତୁତ କରି କମ୍ପାନିକୁ ବିଶ୍ୱ ସ୍ତରରେ ପହଞ୍ଚାଇଛନ୍ତି ଲୋବୋ।
