ମୁମ୍ଵାଇ ୨୨।୦୧; ସୈଫ ଅଲି ଖାନ ହସ୍ପିଟାଲରୁ ଡିସଚାର୍ଜ ହୋଇଛନ୍ତି । ଏବେ ସେ ଘରେ ବିଶ୍ରାମ ନେଉଛନ୍ତି । ଗତକାଲି (ମଙ୍ଗଳବାର) କଡ଼ା ପୋଲିସ ସୁରକ୍ଷା ମଧ୍ୟରେ ସୈଫ୍ ତାଙ୍କ ଘରେ ପହଞ୍ଚିଲେ । ଏହି ସମୟରେ, ତାଙ୍କ ପତ୍ନୀ କରୀନା କପୁର ଖାନ ଏବଂ ମାଆ ଶର୍ମିଲା ଟାଗୋର ଅଭିନେତାଙ୍କୁ ହସ୍ପିଟାଲରୁ ଆଣିଥିଲେ। ସୈଫ୍ ଘରକୁ ଫେରିବା ପରେ ପାପରାଜିମାନଙ୍କୁ ଭେଟିଥିଲେ । ରାତିରେ ସୈଫଙ୍କ ଘର ଆଲୋକରେ ଝଲସୁଥିଲା। ଏବେ ଖବର ଆସୁଛି ଯେ ଘରକୁ ଫେରିବା ମାତ୍ରେ, ଅଭିନେତା ତାଙ୍କ ପରିବାରର ସୁରକ୍ଷା ପାଇଁ ବଦଳାଇଛନ୍ତି ସିକ୍ୟୁରୁଟି ଟିମ୍ । ଏବେ ସୈଫଙ୍କ ଏବଂ ତାଙ୍କ ପରିବାରକୁ ଜଣେ ଅଭିନେତାଙ୍କ ସିକ୍ୟୁରିଟି ଏଜେନ୍ସି ସୁରକ୍ଷା ଦେବାକୁ ଯାଉଛି ।
ଗଣମାଧ୍ୟମ ରିପୋର୍ଟ ଅନୁଯାୟୀ, ଜଣେ ଚୋର ତାଙ୍କ ଘରେ ପଶି ଆକ୍ରମଣ କରିଥିବା ଘଟଣାରୁ ସୈଫ ଅଲ୍ଲୀ ଖାନ ଏହି ନିଷ୍ପତ୍ତି ନେଇଛନ୍ତି। ୯୦ ଦଶକର ଅଭିନେତା ରୋନିତ ରୟ ସୈଫଙ୍କୁ ତାଙ୍କ ଘରେ ସୁରକ୍ଷା ଦେବାକୁ ଯାଉଛନ୍ତି । ରୋନିତ ରୟ S ସିକ୍ୟୁରିଟି ଆଣ୍ଡ୍ ପ୍ରୋଟେକ୍ସନ୍ ନାମକ ଏକ ଫାର୍ମ ଚଲାନ୍ତି। ଯେଉଁଥିରେ ସେ ସୁରକ୍ଷା କର୍ମୀ ଯୋଗାଇଥାନ୍ତି । ଏହି ସମୟରେ, ଏକ ସାକ୍ଷାତକାରରେ ରୋନିତ କହିଛନ୍ତି, 'ଆମେ ସୈଫଙ୍କ ସହିତ ଅଛୁ। ସେ ବର୍ତ୍ତମାନ ସୁସ୍ଥ ଅନୁଭବ କରୁଛନ୍ତି । ଏବେ ସେ ଘରକୁ ଫେରି ଆସିଛନ୍ତି।'
ରୋନିତ ରୟ ଫିଲ୍ମରେ ତାଙ୍କର ଦମଦାର ଅଭିନୟ କରିଛନ୍ତି। ପ୍ରାୟତଃ ତାଙ୍କୁ ଖଳନାୟକ ଭୂମିକାରେ ଅଧିକ ଦେଖିବାକୁ ମିଳେ। ସେ ଟିଭି ସିରିଏଲରେ ମଧ୍ୟ କାମ କରିଛନ୍ତି । ଏହା ବ୍ୟତୀତ ରୋନିତ ରୟ କୌଣସି ରେଷ୍ଟୁରାଣ୍ଟ କିମ୍ବା ଜିମ୍ରେ ଟଙ୍କା ନିବେଶ କରିବା ପରିବର୍ତ୍ତେ ନିଜର ଏକ ଏଜେନ୍ସି ଖୋଲିଥିଲେ। ଯାହା ମାଧ୍ୟମରେ ସେ ଅନେକ ବଡ଼ ବଲିଉଡ୍ ଅଭିନେତାଙ୍କୁ ସୁରକ୍ଷା ଯୋଗାଇଥାନ୍ତି । ରୋନିତ ସୈଫଙ୍କ ପୂର୍ବରୁ ଅମିତାଭ ବଚ୍ଚନ, ଆମୀର ଖାନ, ଅକ୍ଷୟ କୁମାର, କରଣ ଜୋହର ଏବଂ କ୍ୟାଟ୍ରିନା କୈଫ ଭଳି ତାରକାଙ୍କୁ ସୁରକ୍ଷା ଯୋଗାଇଛନ୍ତି ।
