ନୀଳଗିରି ୧୦/୧: ଶିକାରୀଙ୍କ ଟାର୍ଗେଟରେ କୁଲଡିହା ଅଭୟାରଣ୍ୟ । ବିପଦରେ ବନ୍ୟଜନ୍ତୁଙ୍କ ଜୀବନ । ଚେଇଁ ଶୋଇଛି ବନ ବିଭାଗ । ଅବାଧରେ ପଶି ଶିକାର କରୁଛନ୍ତି ଶିକାରୀ । ଗତ ୨ ବର୍ଷରେ ୧୨ରୁ ଅଧିକ ହାତୀଙ୍କ ଜୀବନ ଗଲାଣି । ହାତୀ ମାରି ଦାନ୍ତ ଲୁଟି ନେଇଯାଉଛନ୍ତି ଶିକାରୀ ।
ହରିଣ,ସମ୍ବର, ଝିଙ୍କ,ଠେକୁଆ ଆଦି ପଶୁଙ୍କୁ ମାରିବା ସହ ଏହାର ଛାଲ,ସିଙ୍ଗ ସମେତ ଝିଙ୍କ କାଠି ବାହାରକୁ ଚାଲାଣ କରୁଛନ୍ତି । ସରକାରୀ ଗାଡିରେ ବସି କେବଳ ପଇଁତରା ମାରୁଛନ୍ତି ଦାୟିତ୍ବରେ ଥିବା କର୍ମଚାରୀ । ପୂର୍ବରୁ ବାଡି ଖଣ୍ଡେ ଧରି ଡ୍ୟୁଟି କରୁଥିଲେ ଏବେ ହାତକୁ ବନ୍ଧୁକ ମିଳିଯାଇଥିଲେ ମଧ୍ୟ ଅଭୟାରଣ୍ୟକୁ ସୁରକ୍ଷା ଦେବାରେ ବିଫଳ ବନବିଭାଗ ।
ଗୁରୁବାର ତେଲିପାଲ ପଞ୍ଚାୟତ ପୁଟିବନ୍ଧ ଗାଁରେ ୨ଟି ବନ୍ଧୁକ ସମେତ ୩ଜଣ ଶିକାରୀଙ୍କୁ ଗିରଫ କରିଥିଲା ପୋଲିସ । ସେମାନଙ୍କ ନିକଟରୁ ହରିଣ ଛାଲ, ଝିଙ୍କ କାଠି ମଧ୍ୟ ଜବତ ହୋଇଛି । ଅଭୟାରଣ୍ୟ ଭିତରେ କେବଳ ଶିକାରୀଙ୍କ ପ୍ରାଦୁର୍ଭାବ ନୁହେଁ, ମନଇଚ୍ଛା ଗଛ କଟା ସହ ଛତୁ ଫୁଟିଲା ଭଳି ଇଟା ଭାଟି ଖୋଲୁଥିବାବେଳେ ବନବିଭାଗ ନିରବଦ୍ରଷ୍ଟା ସାଜିଛି ।
