ଚଣ୍ଡିଖୋଲ ୦୯।୧୨ : ଜାତୀୟ ରାଜପଥ ଅବରୋଧ । ଡୁବୁରୀ ଜାତୀୟ ରାଜପଥର ସଂପ୍ରସାରଣ କାମ ଓ ୨ୟ ବ୍ରାହ୍ମଣୀ ସେତୁର କାର୍ଯ୍ୟରେ ବିଳମ୍ବକୁ ପ୍ରତିବାଦ ନେଇ ସଚେତନ ନାଗରିକ ମଞ୍ଚ ଏବଂ ବିଭିନ୍ନ ସଂଗଠନ ପକ୍ଷରୁ ବ୍ରାହ୍ମଣୀ ବ୍ରିଜ ନିକଟରେ ଗଣଧାରଣା ଦିଆଯାଇଛି । ଯାହାଫଳରେ ରାଜପଥରେ ଗାଡି ଚଳାଚଳ ସଂପୂର୍ଣ୍ଣ ବନ୍ଦ ରହିଛି ।
ଅନେକ ବର୍ଷ ଧରି ୫୩ ନମ୍ବର ଜାତୀୟ ରାଜପଥ ଚଣ୍ଡିଖୋଲ-ଡୁବୁରୀ ରାସ୍ତାର ସଂପ୍ରସାରଣ କାମ ଚାଲିଛି । ଏବେ ଯାଏଁ ଶେଷ ହୋଇପାରୁନାହିଁ । ଯାହାଫଳରେ ଜାତୀୟ ରାଜପଥ ଏବେ ମରଣଯନ୍ତା ପାଲଟିଛି । ବାରମ୍ବାର ସଡ଼କ ଦୁର୍ଘଟଣା ଘଟୁଛି । ଅକାରଣରେ ଚାଲିଯାଉଛି ଅନେକ ଜୀବନ । ବାରମ୍ବାର ଅଭିଯୋଗ ପରେ ବି କୌଣସି ସୁଫଳ ମିଳୁନାହିଁ । ଶେଷରେ ସୋମବାର ଦିନ ସଚେତନ ନାଗରିକ ମଞ୍ଚ ବିଭିନ୍ନ ସଂଗଠନ ଓ କଲେଜ ଛାତ୍ରଛାତ୍ରୀଙ୍କ ନେଇ ଗଣଧାରଣା ଦେଇଛନ୍ତି । ଜାତୀୟ ରାଜପଥରେ ଧାରଣା ଲାଗି ଗାଡି ଚଳାଚଳା ବାଧାପ୍ରାପ୍ତ ହୋଇଛି । ସୁରକ୍ଷା ଦୃଷ୍ଟିରୁ ଧାରଣା ସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଛି ।
