ମୁମ୍ଵାଇ ୦୨।୧୨; ଅମିର ଖାନ୍ଙ୍କ ସହିତ ଫିଲ୍ମ ‘ଦଙ୍ଗଲ’ରୁ ନିଜ କ୍ୟାରିୟର ଆରମ୍ଭ କରିଥିଲେ ସାନ୍ୟା ମଲହୋତ୍ରା । ତା’ ପରେ ‘ପଟାଖା’, ‘ବଧାଇ ହୋ’, ‘ଯୱାନ’, ‘ସାମ୍ ବାହାଦୂର’ ଭଳି ଫିଲ୍ମରେ ତାଙ୍କୁ ଦେଖିବାକୁ ମିଳିଛି । ଆଗକୁ ସାନ୍ୟା ‘ସନି ସଂସ୍କାରୀ କୀ ତୁଲସୀ କୁମାରୀ’ରେ ନଜର ଆସିବେ । ସେଥିରେ ତାଙ୍କ ସହିତ ବରୁଣ ଧୱନ ଓ ଜାହ୍ନବୀ କପୁରଙ୍କୁ ଦେଖିବାକୁ ମିଳିବ । ଶଶାଙ୍କ ଖୈତାନ୍ ଫିଲ୍ମର ନିର୍ଦ୍ଦେଶନାରେ ଅଛନ୍ତି।
ଏହି ପରିପ୍ରେକ୍ଷୀରେ ସେ କହିଛନ୍ତି, ଚ୍ୟାଲେଞ୍ଜକୁ ମୁଁ ଭୟ କରେନାହିଁ । ଜଣେ ଅଭିନେତ୍ରୀ ଭାବେ ଯାହା ମୋତେ ପରିପକ୍ୱ କରିବ ଯେତେ କଷ୍ଟକର ହେଲେ ବି ସେଭଳି ଚାଲେଞ୍ଜକୁ ପ୍ରାଥମିକତା ଦେଇଥାଏ । ମୁଁ ଭାଗ୍ୟବାନ ଯେ ମୋତେ ଆମ ସମୟର ଶ୍ରେଷ୍ଠ ନିର୍ଦ୍ଦେଶକଙ୍କ ସହିତ କାମ କରିବାର ସୁଯୋଗ ମିଳିଛି । ସେଥିଯୋଗୁ ହିଁ ମୁଁ ଭିନ୍ନ ଧରଣର ଫିଲ୍ମରେ କାମ କରିପାରିଛି । ସେହିପରି ଲୋକଙ୍କର ସମାଲୋଚନାକୁ ମଧ୍ୟ ମୁଁ ଗୁରୁତ୍ୱ ଦିଏନାହି । କାରଣ ସେପରି କଲେ ଫିଲ୍ମ ବାଛିବା ସମୟରେ ମୋର ପସନ୍ଦ ପ୍ରଭାବିତ ହେବ । ମୁଁ କୌଣସି ଗତାନୁଗତିକ ଧାରାରେ ବାନ୍ଧି ହୋଇ ରହିବାକୁ ଚାହେଁନାହିଁ ।
ସମାନ ସମୟରେ ଦର୍ଶକମାନଙ୍କର ଭରପୁର ମନୋରଞ୍ଜନ ମଧ୍ୟ ମୋର ଲକ୍ଷ୍ୟ । ସେଥିଯୋଗୁ ଫିଲ୍ମ ବାଛିବା ସମୟରେ ଅନେକ ସମୟ ନେଇଥାଏ । ‘ସନି ସଂସ୍କାରୀ କୀ ତୁଲସୀ କୁମାରୀ’ ବ୍ୟତୀତ ସାନ୍ୟା ମଧ୍ୟ ଅନୁରାଗ କଶ୍ୟପଙ୍କର ଆଗାମୀ ଫିଲ୍ମରେ ନଜର ଆସିବେ । ତାର ଶୀର୍ଷକ ଚୂଡ଼ାନ୍ତ ହୋଇନାହିଁ । ଏକ ତାମିଲ ଫିଲ୍ମରେ ବି ତାଙ୍କୁ ଦେଖିବାକୁ ମିଳିବ ।
