ନୂଆଦିଲ୍ଲୀ: ଭାରତୀୟ ସେୟାର ବଜାର ସୋମବାର ସବୁଜ ସଂକେତରେ ବନ୍ଦ ହୋଇଛି । ବିଏସ୍ଇ ସେନ୍ସେକ୍ସରେ ୪୫୪ ଅଙ୍କ ବୃଦ୍ଧି ହୋଇଛି । ଅନ୍ୟପଟେ ନିଫ୍ଟି ବଢି ୨୩,୩୫୦ ଉପରେ ବନ୍ଦ ହୋଇଛି । ଆଜିର ଏହି ବୃଦ୍ଧି ଯୋଗୁଁ ନିବେଶକଙ୍କ ସମ୍ପତ୍ତି ପ୍ରାୟ ୩ ଲକ୍ଷ କୋଟି ଟଙ୍କା ବଢିଛି । ଆମେରିକାରେ ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ଠିକ୍ ପୂର୍ବରୁ ଟାରିଫକୁ ନେଇ ନରମ ଆଭିମୁଖ୍ୟର ସଂକେତ ଦେଇଛନ୍ତି । ଏହି କାରଣରୁ ଗ୍ଲୋବାଲ ମାର୍କେଟ୍ ଆଶ୍ୱସ୍ତି ଅନୁଭବ କରିଛି ଏବଂ ନିବେଶକଙ୍କ ମନୋବଳ ମଜଭୁତ ହୋଇଛି । ବ୍ରଡର୍ ମାର୍କେଟରେ ବିଏସ୍ଇ ମିଡ୍କ୍ୟାପ୍ ଏବଂ ସ୍ମଲ୍କ୍ୟାପ୍ ଇଣ୍ଡେକ୍ସ ୦.୮୨ ପ୍ରତିଶତ ଯାଏ ବଢିଛି । ବ୍ୟାଙ୍କିଂ, ଟେଲିକମ୍, ୟୁଟିଲିଟି ଏବଂ ପାୱାର ସେୟାରରେ ସବୁଠୁ ଅଧିକ ବୃଦ୍ଧି ଦେଖିବାକୁ ମିଳିଛି ।
ଦିନର କାରବାର ଶେଷରେ ବିଏସ୍ଇ ସେନ୍ସେକ୍ସ ୪୫୪.୧୧ ଅଙ୍କ ବା ୦.୫୯ ପ୍ରତିଶତ ବଢି ୭୭,୦୭୩.୪୪ ଅଙ୍କରେ ବନ୍ଦ ହୋଇଛି । ଅନ୍ୟପଟେ ଏନ୍ଏସ୍ଇର ୫୦ ସେୟାର ବିଶିଷ୍ଟ ସେନସେକ୍ସ ନିଫ୍ଟି ୧୪୧.୫୫ ଅଙ୍କ ବା ୦.୬୧ ପ୍ରତିଶତ ବଢି ୨୩,୩୪୪.୭୫ ସ୍ତରରେ ବନ୍ଦ ହୋଇଛି ।
ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମୋଟ ବଜାର ମୂଲ୍ୟ ଆଜି ବଢି ୪୩୧.୫୮ ଲକ୍ଷ କୋଟି ଟଙ୍କା ହୋଇଛି । ପୂର୍ବ କରାବର ଦିନରେ ଅର୍ଥାତ୍ ଶୁକ୍ରବାର ଜାନୁଆରୀ ୧୭ରେ ଏହା ୪୨୮.୭୨ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ୨.୮୬ ଲକ୍ଷ କୋଟି ଟଙ୍କା ବଢିଛି । ବିଏସ୍ଇ ସେନ୍ସେକ୍ସର ୩୦ ସେୟାର ମଧ୍ୟରୁ ୧୭ ସେୟାର ସବୁଜ ସଂକେତରେ ବନ୍ଦ ହୋଇଛି ।
