ନୂଆଦିଲ୍ଲୀ ୨୦/୦୬: ବ୍ୟକ୍ତିଗତ ଜୀବନକୁ ନେଇ ସର୍ବଦା ଚର୍ଚ୍ଚାରେ ରହିଛନ୍ତି ଅଭିନେତ୍ରୀ ଶ୍ରଦ୍ଧା କପୁର । ସିନେ ଲେଖକ ରାହୁଲ ମୋଦିଙ୍କ ସହ ତାଙ୍କର ପ୍ରେମ ସମ୍ପର୍କକୁ ନେଇ ବହୁ ଦିନ ଧରି ଚର୍ଚ୍ଚା ହେଉଛି । କିନ୍ତୁ ଉଭୟ କେବେ ବି ଏ ବିଷୟରେ ଖୋଲି କହିନାହାନ୍ତି ।
ଏବେ ଶ୍ରଦ୍ଧାଙ୍କ ସୋସିଆଲ ମିଡିଆ ପୋଷ୍ଟ୍ ଦେଖିବା ପରେ ଜଣାପଡୁଛି, ରାହୁଲ ମୋଦିଙ୍କ ସହ ନିଜ ସମ୍ପର୍କକୁ ସେ ସ୍ପଷ୍ଟ କରିଛନ୍ତି । ଶ୍ରଦ୍ଧା ଇନ୍ଷ୍ଟାଗ୍ରାମ୍ରେ ରାହୁଲଙ୍କ ସହ ଏକ ସେଲ୍ଫି ପୋଷ୍ଟ୍ କରି କ୍ୟାପ୍ସନ ଲେଖିଛନ୍ତି ‘ହୃଦୟ ରଖିନିଅ... ନିଦ ତ ଫେରାଇ ଦିଅ ।’ ପ୍ରଥମ ଥର ଶ୍ରଦ୍ଧା ରାହୁଲଙ୍କ ପାଇଁ ଏହି ଔପଚାରିକ ପୋଷ୍ଟ୍ ଶେୟାର କରିଛନ୍ତି ।
ଅନେକ ସମୟରେ ଶ୍ରଦ୍ଧା-ରାହୁଲଙ୍କୁ ଏକାଠି ଦେଖିବାକୁ ମିଳିଛି । ଅନନ୍ତ-ରାଧିକାଙ୍କ ପ୍ରି-ୱେଡିଂ ସେଲିବ୍ରେସନ୍ ପାଇଁ ଜାମନଗର ଯିବା ସମୟରେ ମୁମ୍ବାଇ ବିମାନବନ୍ଦରରେ ଉଭୟ ଏକାଠି ନଜର ଆସିଥିଲେ । ରିପୋର୍ଟ ଅନୁସାରେ, ଦୁହିଁଙ୍କ ପରିବାର ଏହି ସମ୍ପର୍କକୁ ନେଇ ରାଜି ଅଛନ୍ତି । ଫିଲ୍ମ ‘ତୁ ଝୁଠୀ ମେଁ ମକ୍କାର’ର ସୁଟିଂ ସମୟରେ ଶ୍ରଦ୍ଧା-ରାହୁଲଙ୍କ ସାକ୍ଷାତ ହୋଇଥିଲା । ଲେଖକ ଭାବେ ରାହୁଲ ଏହି ଫିଲ୍ମ ସହ ଯୋଡ଼ି ହୋଇଥିଲେ ।
ସୁଟିଂ ସମୟରେ ଉଭୟଙ୍କ ସମ୍ପର୍କ ନିବିଡ଼ ହୋଇଥିଲା । ରାହୁଲ ‘ପ୍ୟାର କା ପଞ୍ଚନାମା-୨’ ଓ ‘ସୋନୁ କେ ଟିଟୁ କି ସ୍ୱିଟି’ରେ ମଧ୍ୟ ଲେଖକ ଭାବେ କାମ କରିଥିଲେ । ସୂଚନାଯୋଗ୍ୟ, ୨୦୨୨ ମସିହାରେ ଫଟୋଗ୍ରାଫର ରୋହନ ଶ୍ରେଷ୍ଠଙ୍କ ସହ ଶ୍ରଦ୍ଧାଙ୍କର ବ୍ରେକ୍ଅପ ହୋଇଥିଲା । ତା’ପରେ ରାହୁଲ ତାଙ୍କ ଜୀବନକୁ ଆସିଲେ ।
