ନୂଆଦିଲ୍ଲୀ ୦୪/୦୯: ମନୋବଳ ଦୃଢ ଥିଲେ ଅସମ୍ଭବ ବି ସମ୍ଭବ । ଚେଷ୍ଟା ଜାରି ରଖିଲେ ପରାଜୟ ବଦଳରେ ମିଳେ ବିଜୟ ।ଏମିତି ଜଣେ ସଫଳ ମଣିଷ ଆଇଏଏସ୍ ଅଧିକାରୀ ସୁହାସ ୟଥିରାଜ । ସୁହାସ ଏବେ ଅନ୍ୟମାନଙ୍କ ପାଇଁ ପ୍ରେରଣା ।ପ୍ୟାରିସରେ ଚାଲିଥିବା ପାରାଲିମ୍ପିକ୍ସରେ ସୁହାସ୍ ରଚିଛନ୍ତି ଇତିହାସ । ପୁରୁଷ ସିଙ୍ଗଲ୍ସ SL4 ବର୍ଗରେ ବ୍ୟାଡମିଣ୍ଟନରେ ଜିତିଛନ୍ତି ରୌପ୍ୟ ପଦକ । କ୍ରମାଗତ ଦୁଇଟି ପଦକ ଜିତି ବନିଛନ୍ତି ଭାରତର ପ୍ରଥମ ବ୍ୟାଡମିଣ୍ଟନ ଖେଳାଳି । ତେବେ ଆଜି ସଫଳତାର ଶୀର୍ଷ ଛୁଇଁଥିବା ଏହି ସଟ୍ଲରଙ୍କ ଜୀବନ କାହାଣୀ ବେଶ ସଂଘର୍ଷମୟ ।
କର୍ଣ୍ଣାଟକର ଶିମୋଗାରେ ଜନ୍ମ । ପୂରା ନା ସୁହାସ ଲାଲିନାକେରେ ୟଥିରାଜ । ଜନ୍ମରୁ ଗୋଡରେ ଥିଲା ସମସ୍ୟା । କିନ୍ତୁ ନିଜ ଅକ୍ଷମତାକୁ ଛାଡି ଧାଇଁଥିଲେ ସଫଳତା ପଛରେ । ଗାଁରେ ପ୍ରାଥମିକ ଶିକ୍ଷା ପରେ ଅଧିକ ପଢା ପାଇଁ ଚାଲିଗଲେ ସୁରତକଲ । ଆଉ NITKରେ କମ୍ପ୍ୟୁଟର ସାଇନ୍ସରେ ଇଞ୍ଜିନିୟରିଂ କରିଥିଲେ । ହେଲେ ୨୦୦୫ରେ ସୁହାସଙ୍କ ଉପରେ ଖସି ପଡିଥିଲା ଦୁଃଖର ପାହାଡ । କାରଣ ସୁହାସଙ୍କ ହାତ ଛାଡି ପରପାରିକୁ ଚାଲିଯାଇଥିଲେ ବାପା । ବାପା ସରକାରୀ କର୍ମଚାରୀ ଥିବାରୁ ଯିବା ପରେ ଭାଙ୍ଗି ପଡିଥିଲେ ସୁହାସ । ତଥାପି ସବୁ ଦୁଃଖକୁ ପଛରେ ପକାଇ ଆଗେଇଥିଲେ ସୁହାସ । ପଣ କରିଥିଲେ ଭଲ ମଣିଷ ହେବି, ପରିବାର ତଥା ରଖିବି ଦେଶର ନାଁ ।
ଇଞ୍ଜିନିୟରିଂ ପାଠ ସିନା ପଢିଲେ, କିନ୍ତୁ ମନ ବଳିଗଲା ସିଭିଲ ସର୍ଭିସ ଆଡେ । UPSC ପାଇଁ ଜୋରଦାର ପ୍ରସ୍ତୁତି କରିଥିଲେ ସେ । ଆଉ ଫାଷ୍ଟ ଆଟେମ୍ପ୍ଟରେ କ୍ରାକ୍ କରି ବନିଗଲେ IAS । ୨୦୦୭ ବ୍ୟାଚ୍ର IAS ଅଧିକାରୀଙ୍କୁ ମିଳିଥିଲା ୟୁପି କ୍ୟାଡର ।ଆଜମଗଡରୁ ଯୁଗ୍ମ ମାଜିଷ୍ଟ୍ରେଟ୍ ଭାବେ ଆରମ୍ଭ କରିଥିଲେ ତାଙ୍କର ବୃତ୍ତିଗତ ଜୀବନ ।
ପରେ ମଥୁରା, ମହାରାଜଗଞ୍ଜ, ହାଥ୍ରସ୍, ସୋନଭଦ୍ର, ଜୈନପୁର, ପ୍ରୟାଗରାଜ ଏବଂ ଗୌତମ ବୁଦ୍ଧ ନଗରରେ ଡିଏମ୍ ଭାବେ କାର୍ଯ୍ୟ କଲେ। ୨୦୦୮ରେ ସୁହାସ ୨୦୦୪ ବ୍ୟାଚ୍ର PCS ଅଧିକାରୀ ଋତୁଙ୍କୁ କରିଥିଲେ ବିବାହ । ଯିଏକି ବର୍ତ୍ତମାନ ଗାଜିଆବାଦରେ ADM ପଦରେ ନିଯୁକ୍ତ । ସ୍ୱାମୀ ଯେମିତି ସଫଳ ପ୍ରଶାସକରୁ ଆଥଲେଟ୍, ସ୍ତ୍ରୀ ବି ସେମିତି ଜଣେ ପ୍ରଶାସକରୁ ବେଷ୍ଟ ମଡେଲ ।
କୁହାଯାଏ ଉଦ୍ୟମ ବଳେ ସର୍ବସିଦ୍ଧି । ଉଦ୍ୟମ ବିହିନେ ଅସିଦ୍ଧି । ଅର୍ଥାତ୍ ଜଣେ ଯଦି ମନୋବଳ ଦୃଢ କରି କୌଣସି କାର୍ଯ୍ୟ କରେ । ତେବେ ସକ୍ସେସ୍ ଆସିଯାଏ ତା ହାତ ମୁଠାକୁ । ଏହାର ପ୍ରକୃତ ଉଦାହରଣ ପ୍ରଶାସକ ସଟଲର ସୁହାସ ୟଥିରାଜ । ଦିବ୍ୟାଙ୍ଗ ସତ୍ତ୍ୱେ ତାଙ୍କ ପାଦ ଛୁଇଁଛି ସଫଲତା । ଆଉ ତାଙ୍କର ଏପରି କାମ ଏବେ ଅନ୍ୟମାନଙ୍କ ପାଇଁ ସୃଷ୍ଟି କରିଛି ଉଦାହରଣ ।
