ନୂଆଦିଲ୍ଲୀ: ହକି ଇଣ୍ଡିଆ ଲିଗର ଏକ ସଂଘର୍ଷପୂର୍ଣ୍ଣ ମ୍ୟାଚରେ ତାମିଲନାଡୁ ଡ୍ରାଗନ୍ସର ଚମତ୍କାର ପ୍ରଦର୍ଶନ । ରାଉରକେଲା ବିର୍ସାମୁଣ୍ଡା ଷ୍ଟାଡିୟମରେ ସୋମବାର ଖେଳାଯାଇଥିବା ମ୍ୟାଚରେ ୩-୨ ଗୋଲରେ ଦିଲ୍ଲୀ ଏସ୍ଜି ପିପର୍ସକୁ ପରାସ୍ତ କରିଛି । ଏହା ସହିତ ଡ୍ରାଗନ୍ସ ପଏଣ୍ଟ ଟେବୁଲର ଶୀର୍ଷ ସ୍ଥାନରେ ସ୍ଥିତିକୁ ଅଧିକ ସୁଦୃଢ଼ କରିଛି ।
ଦିଲ୍ଲୀ ଏସ୍ଜି ପିପର୍ସ ମ୍ୟାଚର ଦ୍ୱିତୀୟ ମିନିଟରେ ପ୍ରଥମ ଗୋଲ୍ ଦେଇଥିଲା । ଥୋମାସ ଡୋମେନ ଏହି ଗୋଲ୍ ଦେଇ ଆରମ୍ଭରୁ ଦଳକୁ ଅଗ୍ରଣୀ କରାଇଥିଲେ । ଷଷ୍ଠ ମିନିଟ୍ରେ ତାମିଲନାଡ଼ୁ ଡ୍ରାଗନ୍ସ ପକ୍ଷରୁ ଜିପ୍ ଜାନସେନ ପ୍ରଥମ ଗୋଲ୍ ଦେଇ ସ୍ଥିତିକୁ ବରାବର କରିଥିଲେ । ଦ୍ୱିତୀୟ କ୍ୱାର୍ଟରରେ ଡ୍ରାଗନ୍ସ ଆଉ ୨ଟି ଗୋଲ୍ ଦେବାରେ ସଫଳ ରହିଥିଲା । ୧୯ ମିନିଟରେ ନାଥନ ଏଫରାଉମସ ଏବଂ ୨୧ ମିନିଟରେ ବ୍ଲେକ ଗୋଭର୍ସ ଗୋଲ୍ ଦେଇଥିଲେ । ତେବେ ଦ୍ବିତୀୟାର୍ଦ୍ଧର ୩୭ ମିନିଟରେ ଦିଲ୍ଲୀ ଦ୍ୱିତୀୟ ଗୋଲ୍ ଦେଇ ଖେଳକୁ ପ୍ରତ୍ୟାବର୍ତ୍ତନ କରିଥିଲା । ମାତ୍ର ପରବର୍ତ୍ତୀ ସମୟରେ ଖେଳ ସଂଘର୍ଷପୂର୍ଣ୍ଣ ହୋଇଥିଲା । ଦିଲ୍ଲୀକୁ ଆଉ ସୁଯୋଗ ଦେଇନଥିଲେ ଡ୍ରାଗନ୍ସଙ୍କ ଖେଳାଳି ମାନେ । ଶେଷରେ ୩-୨ ଗୋଲରେ ଅଗ୍ରଣୀ ସହ ଡ୍ରାଗନ୍ସ ବିଜୟୀ ହୋଇଥିଲା । ଚଳିତ ସିଜିନରେ ଏ ପର୍ଯ୍ୟନ୍ତ ଡ୍ରାଗନ୍ସ ୬ଟି ମ୍ୟାଚ୍ ଖେଳି ୫ଟି ବିଜୟ ସହ ମୋଟ୍ ୧୫ ପଏଣ୍ଟ ପାଇଛି । ହାଇଦ୍ରାବାଦ ତୋଫାନ ସମାନ ମ୍ୟାଚ୍ ଖେଳି ୧୦ ପଏଣ୍ଟ ସହ ଟେବୁଲରେ ଦ୍ୱିତୀୟ ଏବଂ ୟୁପି ରୁଦ୍ରସ୍ ୫ଟି ମ୍ୟାଚରୁ ୯ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି ।
ସେପଟେ ମହିଳା ହକି ଇଣ୍ଡିଆ ଲିଗ୍ ର ଦ୍ୱିତୀୟ ମ୍ୟାଚ୍ରେ ସୁରମା ହକି କ୍ଲବ୍ ବିଜୟୀ ହୋଇଛି । ଦଳ ୪-୧ ଗୋଲରେ ଶ୍ରାଚୀ ରାହ ବେଙ୍ଗଲ ଟାଇଗର୍ସକୁ ପରାଜିତ କରିଛି । ବେଙ୍ଗଲ ଟାଇଟର୍ସ ଆରମ୍ଭରୁ ଭଲ ପ୍ରଦର୍ଶନ କରି ସପ୍ତମ ମିନିଟରେ ଗୋଲ୍ ଖାତା ଖୋଲିଥିଲା । କିନ୍ତୁ ପରେ ଦଳର ପ୍ରଦର୍ଶନ ଦୁର୍ବଳ ରହିଥିଲା । ସୁରମା ଖେଳାଳି ତୃତୀୟ କ୍ୱାର୍ଟରରେ ପ୍ରତ୍ୟାବର୍ତ୍ତନ କରି କ୍ରମାନ୍ୱୟରେ ୪ଟି ଗୋଲ୍ ଦେଇ ମ୍ୟାଚ୍ ଜିତି ନେଇଥିଲେ । ଦଳ ପକ୍ଷରୁ ୩୮, ୪୨, ୪୪ ଓ ୪୭ ମିନିଟରେ ଗୋଲ୍ ହୋଇଥିଲା ।
