ନୂଆଦିଲ୍ଲୀ ୨୨।୦୫: ବଲିଉଡ଼ର ଟପ୍ ଅଭିନେତ୍ରୀ । ୬୦୦ କୋଟିକୁ କହିଥିଲେ ନା । ଅଣ୍ଡରୱାର୍ଲଡଙ୍କୁ କରିଥିଲେ ଚ୍ୟାଲେଞ୍ଜ । ପିକ୍ ଟାଇମ୍ରେ ଛାଡିଦେଲେ କ୍ୟାରିୟର୍ । ଏବେ କରୁଛନ୍ତି କମବ୍ୟାକ୍ । ୨୦୦୦ ମସିହାରେ ଟପ୍ ହିରୋଇନଙ୍କୁ ଦେଉଥିଲେ ଟକ୍କର । ଐଶ୍ୱର୍ଯ୍ୟା, ରାଣୀ ଏବଂ କରୀନାଙ୍କ ପରି ନାୟିକ ତାଙ୍କ ଆଗରେ ମାରିଥିଲେ ଫେଲ୍ । ବକ୍ସ ଅଫିସରେ ଦେଇଛନ୍ତି ଅନେକ ବ୍ଲକବଷ୍ଟର ଫିଲ୍ମ ।
ଏହି ସୁନ୍ଦରୀ ଆଉ କେହି ନୁହଁନ୍ତି ବରଂ ସେ ହେଉଛନ୍ତି ଡିମ୍ପଲ୍ ଗାର୍ଲ ପ୍ରୀତି ଜିଣ୍ଟା । ୩୧ ଜାନୁଆରୀ ୧୯୭୫ରେ ହିମାଚଳ ପ୍ରଦେଶରେ ଜନ୍ମଗ୍ରହଣ କରିଥିଲେ ପ୍ରୀତି । ସେ ମାତ୍ର ୩୨ ବର୍ଷ ବୟସରେ ଇଣ୍ଡଷ୍ଟ୍ରି ଛାଡିବାକୁ ନେଇଥିଲେ ନିଷ୍ପତ୍ତି । ଏମତିକି ସେ ୬୦୦ କୋଟି ଟଙ୍କାର ସମ୍ପତ୍ତିକୁ ମନା କରି ଦେଇଥିଲେ । ଏହି ଅଫର୍ ଫିଲ୍ମ ନିର୍ମାତା ଶାନଦାର୍ ଅମରୋହି ଦେଇଥିଲେ ।
ବାସ୍ତବରେ ଶାନଦାର୍ ପ୍ରୀତିଙ୍କୁ ନିଜ ଝିଅ ବୋଲି ମାନୁଥିଲେ । ସେ ତାଙ୍କୁ ବହୁତ ପସନ୍ଦ କରୁଥିଲେ । ୨୦୧୧ରେ ଅମରୋହି ଘୋଷଣା କରିଥିଲେ ଯେ ତାଙ୍କ ମୃତ୍ୟୁ ପରେ ତାଙ୍କର ୬୦୦ କୋଟି ଟଙ୍କାର ସମ୍ପତ୍ତି ପ୍ରୀତିଙ୍କ ପାଇଁ ଛାଡିଯିବେ । କିନ୍ତୁ ଏହାକୁ ମନା କରିଦେଇଥିଲେ ପ୍ରୀତି ଜିଣ୍ଟା । ସବୁଠାରୁ ମଜାଦାର କଥା ହେଉଛି ପ୍ରୀତି ଜିଣ୍ଟା ଅମରୋହିଙ୍କ ମୃତ୍ୟୁ ପରେ ତାଙ୍କ ପୁଅମାନଙ୍କ ବିରୁଦ୍ଧରେ ଏକ ମାମଲା ଦାୟର କରିଥିଲେ । ସେ କହିଥିଲେ ଯେ ଅମରୋହିଙ୍କ ଚିକିତ୍ସା ପାଇଁ ୨ କୋଟି ଟଙ୍କା ଋଣ ଦେଇଥିଲେ । ତାହା ଫେରାଇବା ଉଚିତ।
ପ୍ରୀତି ସାହାସୀ ଥିଲେ । ସେ କାହାକୁ ଡରୁନଥିଲେ । ଏମିତିକି ସେ ମୁମ୍ବାଇ ଅଣ୍ଡରୱାର୍ଲ୍ଡଙ୍କୁ ସାମ୍ନା କରିଥିଲେ । ବଲିଉଡରେ ସେ ଏକମାତ୍ର ଷ୍ଟାର ଥିଲେ ଯିଏକି ଏପରି କରିଥିଲେ । ୨୦୦୧ ମସିହାରେ ଚୋରି ଚୋରି ଚୁପକେ ଚୁପକେ ଚଳଚ୍ଚିତ୍ର ନିର୍ମାଣ ହେଉଥିଲା। ଏଥିରେ ଗ୍ୟାଙ୍ଗଷ୍ଟର ଛୋଟା ଶକିଲଙ୍କ ଟଙ୍କା ବିନିଯୋଗ ହୋଇଥିବା ଅଭିଯୋଗ ହୋଇଥିଲା। ଯେତେବେଳେ ଏହି କଥା ସାମ୍ନାକୁ ଆସିଲା, ଅନେକ ଷ୍ଟାରଙ୍କୁ ଧମକ ମିଳିବା ଆରମ୍ଭ ହେଲା।
ସେହି ସମୟରେ ଶାହାରୁଖ ଖାନ ଏବଂ ସଲମାନ ଖାନଙ୍କ ଭଳି ଷ୍ଟାରମାନେ କୋର୍ଟରେ ସାକ୍ଷ୍ୟ ଦେବାରୁ ଓହରିଗଲେ । କିନ୍ତୁ ତା’ପରେ ୨୬ ବର୍ଷୀୟ ପ୍ରୀତି ଜିଣ୍ଟା ଭୟଭୀତ ନ ହୋଇ ସାକ୍ଷ୍ୟ ଦେବାକୁ କୋର୍ଟରେ ପହଞ୍ଚିଲେ। ସେ କହିଥିଲେ ଯେ ତାଙ୍କୁ ୫୦ ଲକ୍ଷ ଟଙ୍କା ଦେବା ପାଇଁ ଫୋନ୍ ଆସୁଥିଲା। ସେ ସଫା ସଫା ମନା କରିଦେଇଥିଲେ । ପରେ ତାଙ୍କୁ ଗଡଫ୍ରେ ଫିଲିପ୍ସ ଜାତୀୟ ସାହସିକତା ପୁରସ୍କାର ପ୍ରଦାନ କରାଯାଇଥିଲା।
ପ୍ରୀତିଙ୍କ ବାପା ଦୁର୍ଗାନନ୍ଦ ଭାରତୀୟ ସେନାରେ ଜଣେ ଅଧିକାରୀ ଥିଲେ। ଇଂରାଜୀ ସମ୍ମାନ ଏବଂ ଅପରାଧିକ ମନସ୍ତତ୍ତ୍ବରେ ପିଜି କରିବା ପରେ ସେ ମଡେଲିଂରେ ପ୍ରବେଶ କରିଥିଲେ। ପ୍ରୀତି ଶାହରୁଖ ଖାନଙ୍କ ବିପକ୍ଷରେ ‘ଦିଲ୍ ସେ’ ଫିଲ୍ମ ମାଧ୍ୟମରେ ବଲିଉଡ୍ରେ କରିଥିଲେ ଡେବ୍ୟୁ । ଏହା ପରେ ସେ ଗୋଟିଏ ପରେ ଗୋଟିଏ ହିଟ୍ ଫିଲ୍ମରେ ନଜର ଆସିଥିଲେ।
୨୦୦୭ ପରେ ପ୍ରୀତି ଫିଲ୍ମ କରିବା କମ କରିଦେଇଥିଲେ। ତା'ପରେ ସେ ଦୁଇଟି ଇଂରାଜୀ ଫିଲ୍ମ "ଦି ଲାଷ୍ଟ ଲାୟାର" ଏବଂ "ହେଭେନ୍ ଅନ୍ ଆର୍ଥ" ରେ ମୁଖ୍ୟ ଭୂମିକାରେ ଅଭିନୟ କରିଥିଲେ। ଏହାପରେ ସେ "ରବ୍ ନେ ବନା ଦି ଯୋଡ଼ି", "ମୈଁ ଔର ମିସେସ୍ ଖାନ୍ନା" ଏବଂ "ୱେଲକମ୍ ଟୁ ନ୍ୟୁୟର୍କ" ରେ କାମ କରିଥିଲେ। ଏବେ ୨୦୨୫ରେ ସେ "ଲାହୋର ୧୯୪୭" ସହିତ କମବ୍ୟାକ୍ କରିବାକୁ ଯାଉଛନ୍ତି। ତେବେ ଫିଲ୍ମ ବ୍ୟତୀତ ଆଇପିଏଲ୍ରେ ଦେଖାଉଛନ୍ତି ଜଲଓ୍ବା । ସେ ପଞ୍ଜାବ କିଙ୍ଗସର ମାଲିକାଣୀ । ଆଉ ଏଥିରୁ ମୋଟା ଅଙ୍କର କରୁଛନ୍ତି ରୋଜଗାର ।
