ମୁମ୍ଵାଇ ୦୪।୦୭: ପାକ୍ ଅଭିନେତା ଫୱାଦ ଖାନ୍ଙ୍କ ସହ ପରଦାରେ ରୋମାନ୍ସ କରିବେ ବାନି କପୁର । ପାକ୍ କଳାକାରଙ୍କ ଉପରେ ଭାରତରେ କଟକଣା ଲାଗୁ ହୋଇଥିବାବେଳେ ଏହା କେମିତି ସମ୍ଭବ ହେଲା ବୋଲି ଆପଣ ଭାବୁଥିବେ । ପ୍ରକୃତ କଥା ହେଉଛି ବାନି ଓ ଫୱାଦ ଏକ ଅନ୍ତର୍ଜାତୀୟ ଫିଲ୍ମରେ ଏକାଠି କାମ କରିବେ । ଫିଲ୍ମଟି ହିନ୍ଦୀ ଭାଷାରେ ମୁକ୍ତିଲାଭ କରିବ, କିନ୍ତୁ ଏହାର ସୁଟିଂ ସମ୍ପୂର୍ଣ୍ଣ ରୂପେ ବ୍ରିଟେନରେ ହେବ ।
ଫିଲ୍ମର ନିର୍ଦ୍ଦେଶନା ଦେବେ ଆରତୀ ବାଗଡ଼ୀ । ଫୱାଦ କେବଳ ଦକ୍ଷିଣ ଏସିଆରେ ନୁହେଁ, ଅନ୍ତର୍ଜାତୀୟ ସ୍ତରରେ ବି ଖୁବ୍ ଲୋକପ୍ରିୟ । ସେ ମାର୍ଭଲ ସିନେମାଟିକ୍ ୟୁନିର୍ଭସରେ ମଧ୍ୟ ସାମିଲ ରହିଥିଲେ । ସଦ୍ୟ ପ୍ରୋଜେକ୍ଟର ନିର୍ମାତା ବ୍ରିଟେନରେ ସୁଟିଂ ଆରମ୍ଭ ହେବାର ଠିକ୍ ପୂର୍ବରୁ ଫିଲ୍ମ ବିଷୟରେ ଘୋଷଣା କରିବେ । ଫିଲ୍ମର ଟାଇଟଲ ଏପର୍ଯ୍ୟନ୍ତ ସ୍ଥିର ହୋଇନାହିଁ । ଏହା ରୋମାଣ୍ଟିକ୍ ଫିଲ୍ମ ହେବ ବୋଲି ଚର୍ଚ୍ଚା ହେଉଛି । ଫିଲ୍ମରେ ଉଭୟ ଫୱାଦ ଓ ବାନି ବ୍ରେକ୍ଅପ୍ ଭଳି କିଛି ସମସ୍ୟା ଦେଇ ଗତି କରିଥିବାବେଳେ ନିଃସର୍ତ୍ତ ପରସ୍ପରକୁ ସାହାଯ୍ୟ କରୁଥିବା ନଜର ଆସିବେ । ଏହା ପରେ ଦୁହେଁ କେମିତି ପରସ୍ପରକୁ ଭଲପାଇ ବସିଛନ୍ତି ତାହା ଫିଲ୍ମରେ ବର୍ଣ୍ଣନା କରାଯାଇଛି ।
ବର୍ତ୍ତମାନ ସୁଦ୍ଧା ଫିଲ୍ମର ମୁଖ୍ୟ ନାୟିକା ଭାବେ ନିର୍ମାତାଙ୍କ ପ୍ରଥମ ପସନ୍ଦ ରହିଛନ୍ତି ବାନି । ଜଣେ ସୁନ୍ଦରୀ ଭାରତୀୟ ଝିଅକୁ ପ୍ରେମ କରିବସିଥିବା ଫୱାଦଙ୍କ ଚରିତ୍ର ଲାଗି ବାନି ପର୍ଫେକ୍ଟ ବୋଲି ନିର୍ମାତା ଚିନ୍ତା କରିଥିଲେ । ଆସନ୍ତା ସେପ୍ଟେମ୍ବରରୁ ଫିଲ୍ମ ସୁଟିଂ ଆରମ୍ଭ ହେବ । ଦୁଇ ମାସରେ ସୁଟିଂ ଶେଷ କରିବାକୁ ଯୋଜନା ରହିଛି । ଶେଷ ଥର ଫିଲ୍ମ ‘ଶମ୍ଶେରା’ରେ ରଣବୀର କପୁରଙ୍କ ଅପୋଜିଟ୍ରେ ନଜର ଆସିଥିଲେ ବାନି ।
