ଭୁବନେଶ୍ଵର: ପୁରୁଣା ରତ୍ନ ଭଣ୍ଡାର କମିଟି ଭାଙ୍ଗିବା ଏବଂ ନୂଆ ରତ୍ନ ଭଣ୍ଡାର କମିଟି ଗଠନକୁ ନେଇ ତେଜିଛି ରାଜନୀତି । ମନ୍ଦ ଉଦ୍ଦେଶ୍ୟ ରଖି ରତ୍ନ ଭଣ୍ଡାର କମିଟି ଭଙ୍ଗା ଯାଇଛି ବୋଲି ଅଭିଯୋଗ କରିଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ଅରଜିତ୍ ପଶାୟତଙ୍କ ଭଳି ସୁନାମଧନ୍ୟ ବ୍ୟକ୍ତଙ୍କୁ ମନ୍ଦ ଉଦେଶ୍ୟ ରଖି ହଟେଇ ଦିଆଯାଇଛି । ସେମାନେ କେତେବେଳେ କ’ଣ କହୁଛନ୍ତି, ତାଙ୍କର କ’ଣ ଉଦେଶ୍ୟ ତାହା ଓଡ଼ିଶାବାସୀ ଜାଣିଛନ୍ତି । ଜବାବରେ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ୨୪ ବର୍ଷର ସରକାର ରତ୍ନଭଣ୍ଡାର ଖୋଲି ପାରିଲେନି । ଗଣତି ମଣତି କରିପାରିଲେନି। ଏବେ ଯଦି ସେମାନେ କହିବେ କାହିଁକି କମିଟି ଭାଙ୍ଗିଲା, ଏହାଠୁ ଦୁର୍ଭାଗ୍ୟ ପୂର୍ଣ୍ଣ ଉତ୍ତର କିଛି ନହୋଇପାରେ ।
ନୂଆ ସରକାର ରତ୍ନଭଣ୍ଡାର ଖୋଲିବା ପାଇଁ ନୂଆ କମିଟି ଗଠନ କରିଛନ୍ତି । ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ ବିଶ୍ବନାଥ ରଥଙ୍କ ଅଧ୍ୟକ୍ଷତାରେ ଗଠନ ହୋଇଛି ୧୬ ଜଣିଆ କମିଟି । ତେବେ ଏହା ପୂର୍ବରୁ ଗତ ଫେବ୍ରୁଆରୀ ୨୯ରେ ପୂର୍ବର ବିଜେଡି ସରକାର ରତ୍ନଭଣ୍ଡାର ତଦାରଖ ପାଇଁ ଜଷ୍ଟିସ ଅରିଜିତ୍ ପଶାୟତଙ୍କ ଅଧ୍ୟକ୍ଷତାରେ ୧୨ଜଣିଆ କମିଟି ଗଠନ କରିଥିଲେ । ଆଜି ଏହି କମିଟିର ବୈଠକ ବସିବାର ଥିଲା । କିନ୍ତୁ ଗତକାଲି ରାତିରେ ନୂଆ କମିଟି ଗଠନ ହୋଇଛି ବୋଲି ଘୋଷଣା କରିଥିଲୋ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ଯାହାକୁ ନେଇ ବିଜେପି ସରକାରଙ୍କୁ ଘେରିଛି ବିଜେଡି ।
ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ମନ୍ଦ ଉଦ୍ଦେଶ୍ୟ ରଖି ରତ୍ନଭଣ୍ଡାର କମିଟି ଭଙ୍ଗା ଯାଇଛି । ଜଷ୍ଟିସ ଅରିଜିତ୍ ପଶାୟତଙ୍କ ଭଳି ସୁନାମଧନ୍ୟ ବ୍ୟକ୍ତିଙ୍କୁ ମନ୍ଦ ଉଦ୍ଦେଶ୍ୟ ରଖି ହଟେଇ ଦିଆଯାଇଛି। ସେମାନେ କେତେବେଳେ କ’ଣ କହୁଛନ୍ତି, ତାଙ୍କର କ’ଣ ଉଦେଶ୍ୟ ତାହା ଓଡ଼ିଶାବାସୀ ଜାଣିଛନ୍ତି । କେତେବେଳେ ରତ୍ନଭଣ୍ଡାର ଖୋଲିବା ତାରିଖ ଘୋଷଣା କରୁଛନ୍ତି ତ ପୁଣି କେତେବେଳେ ମନା କରୁଛନ୍ତି । ଲୋକଙ୍କୁ ଭୁଆଁ ବୁଲାଇବାକୁ ଏଭଳି କରୁଛନ୍ତି ବୋଲି କହି କଟାକ୍ଷ କରିଛନ୍ତି ପ୍ରମିଳା ମଲ୍ଲିକ । ସେହିଭଳି କଂଗ୍ରେସ କହିଛି ରତ୍ନଭଣ୍ଡାର ତୁରନ୍ତ ଖୋଲି ଗଣତି ମଣତି କରାଯାଉ ।
ସେପଟେ ବିଜେଡିର ଏଭଳି ଅଭିଯୋଗର ଜବାବ୍ ରଖିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ଆଇନ ମନ୍ତ୍ରୀ କହିଛନ୍ତି ଯେ, ଜଣେ ଯଦି ଲଜ୍ୟାହୀନ ହେବ ତାହା ହେଲେ ତାଙ୍କ ପାଖରେ ଉତ୍ତର ନାହିଁ । ୨୪ବର୍ଷର ସରକାର ରତ୍ନଭଣ୍ଡାର ଖୋଲି ପାରିଲେ ନାହିଁ । ଗଣତି ମଣତି କରିପାରିଲେ ନାହିଁ । ଏବେ ଯଦି ସେମାନେ କହିବେ କାହିଁକି କମିଟି ଭଙ୍ଗାଗଲା, ଏହାଠୁ ଦୁର୍ଭାଗ୍ୟପୂର୍ଣ୍ଣ ଉତ୍ତର କିଛି ନହୋଇପାରେ । ଏକଥା ସ୍ପଷ୍ଟ ଯେ, ସରକାର ଗଠନକୁ ୨୨-୨୫ଦିନ ଭିତରେ ରତ୍ନ ଭଣ୍ଡାର ଖୋଲିବା ପାଇଁ ପଦକ୍ଷେପ ନିଆଯାଇଛି ।
ନୂଆ କମିଟି ଗଠନ ହୋଇଛି। ଭଣ୍ଡାର କେବେ ଖୋଲାଯିବ ଆସନ୍ତାକାଲି କମିଟି ନିଷ୍ପତ୍ତି ନେବ । ରତ୍ନ ଭଣ୍ଡାର ଯଥା ସମୟରେ ଖୋଲାଯିବ ଗଣତି ମଣତି କରାଯିବ । ପ୍ରତିଟି ଆର୍ଟକିଲର ଡିଜିଟାଲ ଫଟୋକପି କରାଯିବ । ସବୁକୁ ପ୍ରିଜର୍ଭ କରାଯିବ । ଆଗାମୀ ୫୦ବର୍ଷ ପର୍ଯ୍ୟନ୍ତ ରେଫରାଲ ଡକ୍ୟୁମେଣ୍ଟସ୍ ଭଳି ତାକୁ ବ୍ୟବହାର କରାଯିବ । ତେଣୁ ଏଭଳି ଉଦ୍ଭଟ କଥାରୁ ବିଜୁ ଜନତା ଦଳ ନିବୃତ ରହୁ ବୋଲି କହିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ରତ୍ନଭଣ୍ଡାର ଖୋଲିବା ନେଇ ନିର୍ବାଚନୀ ପ୍ରତିଶ୍ରୁତି ଦେଇଥିଲା ବିଜେପି। ତେଣୁ ସରକାର ଗଠନ ପରେ ପ୍ରତିଶ୍ରୁତି ପୂରଣ କରିବାକୁ ତତ୍ପରତା ପ୍ରକାଶ କରିଛନ୍ତି ବିଜେପି ସରକାର।