ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଟେକ୍ନୋଲୋଜି ଓ୍ବାର । ଇଲେକ୍ଟ୍ରିକାଲ ଉପକରଣ ମାଧ୍ୟମରେ ଟାର୍ଗେଟ୍ । ପେଜର ପରେ ଓ୍ବାକିଟକି ବିସ୍ଫୋରଣ । ଲେବାନନରେ ଚାଲିଗଲା ୨୦ ଜୀବନ । ୟୁନିଟ୍-୮୨୦୦ର ଗଣହତ୍ୟା ରଣନୀତି । ଲେବାନନରେ ନୂଆ ଶୈଳୀ ହମଲା ରଣନୀତିକୁ ନେଇ ଛାନିଆ ହୋଇଛି ସାରା ବିଶ୍ବ । ରାଜଧାନୀ ବିରୁଟରେ ପେଜର ବ୍ଲାଷ୍ଟ ପରେ ଓ୍ବାକିଟକି ମାଧ୍ୟମରେ ହିଜବୁଲ୍ଲା ସଂଗଠନ ଟାର୍ଗେଟ୍ କରାଯାଇଛି । ମଙ୍ଗଳବାର ପ୍ରାୟ ୫ ହଜାର ପେଜରରେ ସିରିଜ୍ ବିସ୍ଫୋରଣ ହୋଇଥିଲା । ଆଉ ବୁଧବାର ଓ୍ବାକିଟକି ଜରିଆରେ ବିସ୍ଫୋରଣ କରି ନିରୀହ ଲୋକଙ୍କ ରକ୍ତରେ ହୋଲି ଖେଳାଯାଇଛି । ଏହି ସିରିଜ୍ ବିସ୍ଫୋରଣରେ ପ୍ରାୟ ୨୦ଜଣଙ୍କ ମୃତ୍ୟୁ ହୋଇଥିବା ବେଳେ ୫୦୦ ଲୋକ ଗୁରୁତର ଭାବେ ଆହତ ହୋଇଛନ୍ତି । ଏଭଳି ନିର୍ମମ ନରହତ୍ୟା, ହିଲବୁଲ୍ଲା ଆତଙ୍କୀ ସଂଗଠନର ମୂଳଦୁଆକୁ ଦୋହଲାଇ ଦେଇଛି ।
ପେଜର ଡିଭାଇସ୍ ରେ ହମଲା କାହାର ରଣନୀତି ? ଇଲେକ୍ଟ୍ରିକାଲ ଉପକରଣରେ କିପରି କରାଯାଇଥିଲା ଟାର୍ଗେଟ୍ ? ପେଜରରେ ବିସ୍ଫୋରଣ ଏକ ନୂଆ ପର୍ଯ୍ୟାୟର ଯୁଦ୍ଧ ରଣନୀତି । ଇସ୍ରାଏଲ ଗୁଇନ୍ଦା ଏଜେନ୍ସି ମୋସାଦର ସାଇବର ଶାଖା ‘ୟୁନିଟ୍-୮୨୦୦’ ଏହି ଷଡ଼ଯନ୍ତ୍ର ରଚି ଆକ୍ରମଣ କରୁଛି । ପ୍ରାୟ ୫ହାଜର ପେଜରରେ ୩ରୁ ୪ ଗ୍ରାମ୍ ବିସ୍ଫୋରକ ଖଞ୍ଜି ଏହାକୁ ଲେବାନନର ବିଭିନ୍ନ ଜନଗହଳିପୂର୍ଣ୍ଣ ସ୍ଥାନରେ ବିସ୍ଫୋରଣ କରାଯାଇଛି । କେବଳ ପେଜର ନୁହେଁ ଓ୍ବାକିଟକି ଏବଂ ସୋଲାର ସିଷ୍ଟମକୁ ମଧ୍ୟ ଏହି ନରସଂହାରରେ ‘ୟୁନିଟ୍-୮୨୦୦’ ବ୍ୟବହାର କରିଥିବା ସୂଚନା ରହିଛି ।
ପେଜର ଡିଭାଇସ୍ କ’ଣ ? ଏହା କିପରି କାମ କରେ ? ପେଜର ଏକ ଛୋଟ ମେସେଞ୍ଜର ଡିଭାଇସ୍ । ଏହାର ନିର୍ମାଣ ୧୯୫୦ରୁ ୧୯୬୦ ମଧ୍ୟରେ ହୋଇଥିଲା । ୮୦ରୁ ୯୦ ଦଶକରେ ମେସେଜ ଆଦାନପ୍ରଦାନରେ ଲୋକେ ଏହାକୁ ବ୍ୟବହାର କରୁଥିଲେ । ଏହା ରେଡିଓ ଫ୍ରକ୍ୟୁଏନ୍ସିରେ କାମ କରିଥାଏ । ଇସ୍ରାଏଲ୍ ଗୁଇନ୍ଦା ଏଜେନ୍ସି ମୋସାଦ ଆଖିରେ ଧୂଳି ଦେବା ଲାଗି ଫୋନ୍ ବଦଳରେ ଏହି ଡିଭାଇସକୁ ବ୍ୟବହାର କରୁଥିଲା ହିଜବୁଲ୍ଲା ଆତଙ୍କୀ ସଂଗଠନ । ଏହି ଡିଭାଇସକୁ ତାଇଓ୍ବାନ କମ୍ପାନୀ ଗୋଲ୍ଡ ଆପୋଲୋଠାରୁ ମଗାଯାଇଥିଲା । ପେଜର ଗୁଡ଼ିକ ସାଧାରଣତ କୋଡ୍ ଦ୍ବାରା ପରିଚାଳିତ ହୋଇଥାଏ । ମଙ୍ଗଳବାର ହିଜବୁଲ୍ଲା ବ୍ୟବହାର କରୁଥିବା ଥିବା ସମସ୍ତ ପେଜରରେ ଏକ ମେସେଜ ଆସିଥିଲା ଏବଂ ଏହାର କିଛି ସମୟ ପରେ ସିରିଜ୍ ବିସ୍ଫୋରଣ ହୋଇଥିଲା ।
ପେଜରରେ କିଏ ଖଞ୍ଜିଥିଲା ବିସ୍ଫୋରକ ଚିଫ୍ ? ପେଜର ଡିଭାଇସ୍ ତିଆରି କରିଥିବା ସଂସ୍ଥା ଏହା ଭିତରେ ବିସ୍ଫୋରକ ପଦାର୍ଥ ରଖିଥିବା ନେଇ ସନ୍ଦେହ କରାଯାଉଛି । ଲେବାନନରୁ ହିଜବୁଲ୍ଲା ଚରମପନ୍ଥୀଙ୍କୁ ମୂଳପୋଛ କରିବାକୁ ଇସ୍ରାଏଲ ଏହି ଷଡ଼ଯନ୍ତ୍ର ରଚିଥିଲା । ଗୁଇନ୍ଦା ଏଜେନ୍ସି କିଛି ଅଧିକାରୀ ଏଥିପାଇଁ ଦୁଇ ବର୍ଷ ହେବା କାମ କରୁଥିଲେ ଏବଂ ବ୍ଲାଷ୍ଟ ପାଇଁ ଏକ ଉପଯୁକ୍ତ ସମୟକୁ ଅପେକ୍ଷା କରିଥିଲେ । ପେଜର ବ୍ୟାଟେରୀକୁ ଗରମ କରିବାକୁ ଏକ ସ୍ବତନ୍ତ୍ର ମେସେଜ ବ୍ୟବହାର କରାଯାଇଥିଲା । ଏହି ମେସେଜ୍ ରିସିଭ୍ ହେବା ମାତ୍ରରେ ଡିଭାଇସ୍ ଆକ୍ଟିଭେଟ୍ ହୋଇଯାଇଥିଲା ।
ହିଜବୁଲ୍ଲା ସଂଗଠନ ପେଜର ବିସ୍ଫୋରଣ ଘଟଣାକୁ ନେଇ ଇସ୍ରାଏଲକୁ ସିଧାସଳଖ ଦାୟୀ କରିଛି । ଇରାନ ମଧ୍ୟ ଏହାକୁ ନରସଂହାର ଆଖ୍ୟା ଦେଇ ନିନ୍ଦା କରିଛି । ହିଜବୁଲ୍ଲା ସଂଗଠନ ଏକ ବୟାନ ଜାରି କରି, ଖୁବ୍ ଶୀଘ୍ର ଇସ୍ରାଏଲ ଷଡ଼ଯନ୍ତ୍ରର ଜବାବ ଦିଆଯିବ ବୋଲି ଚେତାବନୀ ଦେଇଛି ।...
