ଜଳେଶ୍ୱର ୧୮/୧୦: ସକାଳୁ ସକାଳୁ ମର୍ମନ୍ତୁଦ ବସ ଦୁର୍ଘଟଣା । ଫଳରେ ଅଳ୍ପକେ ବର୍ତ୍ତିଲେ ୫୦ ଯାତ୍ରୀ । ବସ୍ଟି କେଲକାତାରୁ ଭୁବନେଶ୍ବର ଆସୁଥିଲା । ଉକ୍ତ ବସ୍ରେ ୫୦ରୁ ଅଧିକ ଯାତ୍ରୀ ଥିବା ବେଳେ ତନ୍ମଧ୍ୟରୁ ୧୨ ଜଣଙ୍କ ଠାରୁ ଆହତ ହୋଇଛନ୍ତି । ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ଅନ୍ତର୍ଗତ ଲକ୍ଷ୍ମଣ ନାଥ ଟୋଲ ପ୍ଲାଜା ନିକଟରେ ଏଭଳି ଘଟଣା ଘଟିଛି । ଲକ୍ଷ୍ମଣ ନାଥ ଟୋଲ ପ୍ଲାଜା ଅନତି ଦୂରରେ କଣ୍ଟେନରକୁ ପଛ ପଟୁ ଦେଲା ଧକ୍କା ବସ୍ ।
ସୂଚନାଥାଉକି, ଯାତ୍ରୀବାହୀ ବସ୍ କୋଲକାତାରୁ ୫୦ ଜଣ ଯାତ୍ରୀଙ୍କୁ ନେଇ ଭୁବନେଶ୍ବର ଆସୁଥିଲା । କିଛି ଅସାମାଜିକ ଯୁବକ ଜାତୀୟ ରାଜପଥ ଉପରେ ୨ ଟି ବାଇକକୁ ଆଡା ପକାଇ ଏକ କଣ୍ଟେନରକୁ ଅଟକାଇ ଚାନ୍ଦା ଆଦାୟ କରୁଥିଲେ । ତେବେ ଏହି ସମୟରେ ବସଟି ଦ୍ରୁତ ଗତିରେ ଆସି ଲକ୍ଷ୍ମଣ ନାଥ ଟୋଲ ପ୍ଲାଜା ନିକଟରେ କଣ୍ଟେନରକୁ ପଛ ପଟୁ ଧକ୍କା ଦେଇଥିଲା ।
ଏହି ଦୁର୍ଘଟଣାରେ ୧୨ରୁ ଅଧିକ ଯାତ୍ରୀ ଆହତ ହୋଇଛନ୍ତି । ଏହା ଦେଖି ସ୍ଥାନୀୟ ଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଜଳେଶ୍ୱର ଥାନା ପୋଲିସ ପହଞ୍ଚି ଛାନଭିନ କରୁଛି । ସମସ୍ତ ଆହତଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ।
