ଢେଙ୍କାନାଳ ୨୫/୧୦: ଦ୍ରୁତ ଗତି ହେଲା କାଳ । ଭାରସାମ୍ୟ ହରାଇ ରାସ୍ତାକୁ ଓଲଟି ପଡିଲା କାର । ୨ଯୁବକ ମୃତ,ଜଣେ ଗୁରୁତର । ଢେଙ୍କାନାଳ ସଦର ଥାନା ତାମେଣ୍ଡା-ଗୋବିନ୍ଦ ପ୍ରସାଦ ରାସ୍ତାରେ ମର୍ମନ୍ତୁଦ ଦୁର୍ଘଟଣା । ଏସ୍ୟୁଭି କାର ଦ୍ରୁତ ଗତିରେ ଯାଉଥିବାବେଳେ ଭାରସାମ୍ୟ ହରାଇ ରାସ୍ତା କଡକୁ ଓଲଟି ପଡିଥିଲା । ଘଟଣାସ୍ଥଳରେ ୨ ଯୁବକଙ୍କ ଜୀବନ ଯାଇଛି ।
ମୃତକ ୨ ଜଣ ସିଲୁ ବେହେରା ଓ ସାଗର ଚାନ୍ଦ ପରିଡା । ଗୁରୁତର ଯୁବକ ବୁବୁନା ରାଉତଙ୍କୁ ପ୍ରଥମେ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ହେବାରୁ କଟକ ସ୍ଥାନାନ୍ତର କରାଯାଇଛି । କାଣ୍ଡବିନ୍ଧା ଗାଁର ଏହି ୩ ଜଣ ଏସ୍ୟୁଭି କାରରେ ଭାପୁର ଯାଉଥିଲେ । ତେବେ ଗାଡିର ସ୍ପିଡ ଅଧିକ ଥିବାରୁ ବୁଲାଣି ରାସ୍ତାରେ ଭାରସାମ୍ୟ ହରାଇ ଓଲଟି ପଡିଥିବା ଅନୁମାନ କରାଯାଉଛି । ପୋଲିସ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି । ଦୁର୍ଘଟଣାଗ୍ରସ୍ତ ଗାଡିକୁ ଉଦ୍ଧାର କରି ତଦନ୍ତ କରୁଛି ।
