ନୂଆଦିଲ୍ଲୀ: ଲାଟିନ୍ ଆମେରିକାରେ ମର୍ମୁନ୍ତୁଦ ଦୁର୍ଘଟଣା । ଗ୍ବାଟମାଲା ଦେଶରେ ଭୀଷଣ ସଡ଼କ ଦୁର୍ଘଟଣା ହୋଇଛି । ଏକ ଯାତ୍ରୀବାହୀ ବସ୍ ଭାରସାମ୍ୟ ହରାଇ ୧୧୫ ଫୁଟ୍ ଘାଟିକୁ ଖସିପଡ଼ିଛି । ଏହି ଦୁର୍ଘଟଣାରେ ପ୍ରାୟ ୫୫ଜଣଙ୍କ ମତ୍ୟୁ ହୋଇଥିବା ବେଳେ ଅନେକ ଗୁରୁତର ଭାବେ ଆହତ ହୋଇଛନ୍ତି । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛନ୍ତି । ଗ୍ବାଟମାଲାର ଜଣେ ପ୍ରଶାସନିକ ଅଧିକାରୀ କହିଛନ୍ତି, ଗତ ପୂର୍ବ କିଛି ବର୍ଷକୁ ଦେଖିଲେ ଲାଟିନ୍ ଆମେରିକାରେ ଏହା ସବୁଠୁ ବଡ଼ ଦୁର୍ଘଟଣା ।
ସୂଚନା ଅନୁଯାୟୀ, ସୋମବାର ଗ୍ବାଟମାଲା ସିଟିରେ ଏହି ଭୀଷଣ ଦୁର୍ଘଟଣା ହୋଇଛି । ସ୍ଥାନୀୟ ମିଡିଆ ରିପୋର୍ଟ ମୁତାବକ, ଏକ ଯାତ୍ରୀବାହୀ ବସ୍ ଅଗଷ୍ଟିନ୍ ଅକାଶାଗୁସ୍ତଲାନା ସହରରୁ ଗ୍ବାଟେମାଲା ସିଟିକୁ ଯାଉଥିଲା । ଅଗଷ୍ଟିନରୁ ବସ୍ଟି ଉତ୍ତର-ପୂର୍ବରୁ ଦିଗରେ ୯୦ କିଲୋମିଟର ଯାତ୍ରା କରିବା ପରେ ଡ୍ରାଇଭର ନିୟନ୍ତ୍ରଣ ହରାଇ ବସିଥିଲେ । ଫଳରେ ବସ୍ ଡିଭାଇଡରରେ ପିଟି ହୋଇ ଖାଇକୁ ଖସିପଡ଼ିଥିଲା । ବସ୍ ରେ ମୋଟ୍ ୭୦ ଯାତ୍ରୀ ଯାତ୍ରା କରୁଥିଲେ । ଏମାନଙ୍କ ମଧ୍ୟରୁ ୫୫ଜଣଙ୍କ ମୃତ୍ୟୁ ହୋଇଥିବା ବେଳେ ରେସକ୍ୟୁ ଟିମ୍ ୫୧ଜଣଙ୍କ ମୃତଦେହ ଉଦ୍ଧାର କରିଛି । ମୃତକଙ୍କ ମଧ୍ୟରେ ୩୬ଜଣ ପୁରୁଷ ରହିଥିବା ବେଳେ ୧୫ ଜଣ ମହିଳା ରହିଛନ୍ତି । ଆହତଙ୍କୁ ରେସକ୍ୟୁ କରାଯାଇ ସାନ୍ ଜୁଏନ୍ ଡେ ହସ୍ପିଟାଲରେ ଭର୍ତ୍ତି କରାଯାଇଛି । ...
