ନୂଆଦିଲ୍ଲୀ ୧୨।୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ରବିବାର ପାର୍ଟି ବିଧାୟକଙ୍କ ବୈଠକ କରିଛନ୍ତି। ଏହି ଅବସରରେ କେଜରିୱାଲ ବିଧାୟକଙ୍କୁ କହିଥିଲେ ଯେ ମୁଁ ଜାଣିବାକୁ ପାଇଛି ଆପଣଙ୍କ ମଧ୍ୟରୁ କେତେଜଣଙ୍କୁ ସେମାନେ ଟଚ୍ କରିଛନ୍ତି। ଲାଳଶା ଦେଖାଇ, ଧମକ ଦେଇ ଭାଙ୍ଗିବାକୁ ଉଦ୍ୟମ କରିଛନ୍ତି। ହେଲେ ଆପଣମାନେ ନିଜସ୍ଥାନରେ ମଜଭୁତ ଥିଲେ, ଭାଙ୍ଗିଲେ ନାହିଁ। ଏଣୁ ସେମାନେ ଏବେ କହୁଛନ୍ତି ତାଙ୍କର କେହି ଭାଙ୍ଗିଲେନି।
ମିଟିଂରେ କେଜରିୱାଲ କହିଛନ୍ତି ଯେ ୨୧ ଦିନ ପାଇଁ ମୁଁ ବାହାରକୁ ଆସିଛି। ଜୁନ ୨ ତାରିଖରେ ଫେରିଯିବାକୁ ହେବ। ଏହା ପରେ ଆପଣମାନେ ପାର୍ଟିକୁ ସମ୍ଭାଳିବେ। ଏହି ଦେଶର ଭବିଷ୍ୟତ ଆମ ଆଦମୀ ପାର୍ଟି। ବାକି ପାର୍ଟିମାନଙ୍କୁ ଦେଶବାସୀ ଦେଖିସାରିଲେଣି। ଆଜି ଦେଶର ପରିସ୍ଥିତି ଏପରି ଆଗାମୀ ସମୟରେ ଆମ ଆଦମୀ ପାର୍ଟିକୁ ହିଁ ଦେଶର ଭାଗ୍ୟଡୋରୀ ସମ୍ଭାଳିବାକୁ ପଡିବ। ଆମ ଆଦମୀ ପାର୍ଟି ହିଁ ଦେଶର ଭବିଷ୍ୟତ। ଏଥି ପାଇଁ ସେମାନେ ଆମ ଆଦମୀ ପାର୍ଟିକୁ ନେଇ ଏତେ ଭୟଭୀତ।
जेल से बाहर आने के बाद दिल्ली के अपने सभी विधायकों के साथ बैठक के बाद CM @ArvindKejriwal का संबोधन l LIVE https://t.co/JdA79eZSuP
— AAP (@AamAadmiParty) May 12, 2024
ପାର୍ଟି ବିଧାୟକଙ୍କ ସହ ବୈଠକ ପରେ ମୁଖ୍ୟମନ୍ତ୍ରୀ କେଜରିୱାଲ କହିଛନ୍ତି ଯେ ଗିରଫ ପୂର୍ବରୁ ଯେତେବେଳେ ବିଜେପିର ଲୋକେ ଭେଟ ହେଉଥିଲେ ଏହା କହୁଥିଲେ ଯେ ସେମାନେ ଆପଣଙ୍କୁ ଗିରଫ କରିବେ, ତା ପରେ ଆପଣଙ୍କ ପାର୍ଟିକୁ ଭାଙ୍ଗିଦେବେ। ସେପଟେ ପଞ୍ଜାବରେ ଭଗବନ୍ତ ମାନଙ୍କୁ ନିଜ ସାଙ୍ଗରେ ନେଇଯିବେ। ତେବେ ଗିରଫ ପରେ ଆମ ପାର୍ଟି ଆହୁରି ମଜଭୁତ ହୋଇଥିବା କେଜରିୱାଲ କହିଛନ୍ତି। ସେମାନେ ନା ଆମ ପାର୍ଟିକୁ ଭାଙ୍ଗିପାରିଲେ ନା ଆମ ବିଧାୟକଙ୍କୁ ନେଇପାରିଲେ। ସେମାନଙ୍କ ପୁରା ପ୍ଲାନ ଫେଲ ହୋଇଯାଇଛି।
ଏବେ ସାରା ଦେଶରେ ପଲିଟିକାଲ ନ୍ୟାରେଟିଭ ସେମାନଙ୍କ ବିରୋଧରେ ଚାଲିଯାଇଛି। ଏଥି ପାଇଁ ସବୁଠୁ ଅଧିକ ଧନ୍ୟବାଦର ପାତ୍ର ପାର୍ଟିର ବିଧାୟକ। ସେ କହିଛନ୍ତି ଯେ ଏବେ ସବୁଆଡେ କେବଳ ଆମର ଚର୍ଚ୍ଚା। ଆମର କାମକୁ ଲୋକେ ଚର୍ଚ୍ଚା କରୁଛନ୍ତି। ଏତେ ଶୀଘ୍ର ଆଗକୁ ବଢିଲେ କିଛିତ କଷ୍ଟ ହେବ ନିଶ୍ଚିତ ବୋଲି କେଜରିୱାଲ କହିଛନ୍ତି। ତେବେ କେଜରିୱାଲଙ୍କ ଏହି ବିଧାୟକ ବୈଠକକୁ ଅମାନତୁଲ୍ଲା ଖାନ ଆସିନଥିଲେ। ନୋଏଡା ପୋଲିସ ଅମାନତୁଲ୍ଲା ଓ ତାଙ୍କ ପୁଅକୁ ଖୋଜୁଛି।
