ବରଗଡ଼ ୦୬।୦୧ : ବିଶ୍ୱପ୍ରସିଦ୍ଧ ବରଗଡ଼ ଧନୁଯାତ୍ରା । ମହାରାଜ କଂସଙ୍କ ଅଟାହାସରେ କମ୍ପୁଛି ପୁରା ମଥୁରା ନଗରୀ । ତୃତୀୟ ଦିନରେ ବେଶ ରୋମାଞ୍ଚକର ଥିଲା ରଙ୍ଗମଞ୍ଚ । ଦେବକୀଙ୍କ ଅଷ୍ଟମ ଗର୍ଭର ସନ୍ତାନକୁ ଦର୍ପଣ ଶିଳାରେ ପ୍ରହାର କରିବାକୁ ଯିବା ବେଳେ ବିଜୁଳି କନ୍ୟାର ହୋଇଛି ଶୂନ୍ୟ ବାଣୀ ।  ଆଉ ଏହାପରେ ମହାରାଜ କଂସ ବିବ୍ରତ ହୋଇପଡିଥିବା ବେଳେ ଗୋପରେ ବଢୁଥିବା ଶ୍ରୀକୃଷ୍ଣକୁ ମାରିବା ପାଇଁ ପଠାଇଛନ୍ତି ଷଡ଼ ମଲ୍ଲ ସହ ପୁତୁନା ରାକ୍ଷସୀ।ଗୋପରେ କୃଷ୍ଣଙ୍କ ଜନ୍ମ ନେଇ ଆୟୋଜନ ହୋଇଛି ନନ୍ଦ ଉତ୍ସବ । 

ଅନ୍ୟପଟେ ବରଗଡ଼ ଧନୁଯାତ୍ରାର ସୋମବାର ଚତୁର୍ଥ ଦିନ। ରବିବାର ତୃତୀୟ ସଂଧ୍ୟାରେ ନିମନ୍ତ୍ରଣ ରକ୍ଷା କରି ରାଜ ଅତିଥି ଭାବରେ କଂସ ମହାରାଜଙ୍କ ଦରବାରରେ ଉପସ୍ଥିତ ହୋଇଥିଲେ ରାଜସ୍ଵ ଓ ବିପର୍ଯ୍ୟୟ ମନ୍ତ୍ରୀ ସୁରେଶ ପୂଜାରୀ ଏବଂ ବାଣିଜ୍ୟ ପରିବହନ ଓ ଖଣିମନ୍ତ୍ରୀ ବିଭୁତି ଭୂଷଣ ଜେନା l ମହାରାଜ କଂସ ପ୍ରଜାମାନଙ୍କ ପାଇଁ ମଥୁରାରୁ କୁମ୍ଭମେଳା ପାଇଁ କାହିଁକି ବସର ବ୍ୟବସ୍ଥା ହୋଇନାହିଁ ବୋଲି ପ୍ରଶ୍ନ କରିଥିଲେ। ମହାରାଜା କଂସଙ୍କ ଆଦେଶ କ୍ରମେ କୁମ୍ଭ ମେଳା ପାଇଁ ମଥୁରାରୁ ପ୍ରୟାଗରାଜ ଓ ଅଯୋଧ୍ୟା ଭଲ୍ ବୋ ବସ୍ ଚାଲିବ ବୋଲି ପରିବହନ ଓ ଖଣି ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି। ଆଗକୁ ଧନୁଯାତ୍ରାର କାୟା ଏବଂ ବାର୍ତ୍ତା ସାରା ବିଶ୍ୱରେ ପହଁଚିବ ବୋଲି କହିଛନ୍ତି ରାଜସ୍ଵ ମନ୍ତ୍ରୀ ସୁରେଶ ପୂଜାରୀ।