ନୀଳଗିରି୦୫/୦୪: ସେ ଦୁଃଖହାରିଣୀ । କୃପାମୟୀ ଓ ଭକ୍ତବତ୍ସଳ । ବିପଦରେ ପଡି ଭକ୍ତ ଡାକିଲେ ଓ ବୋଲି ମାଆଙ୍କ ପାଟିରୁ ବାହାରିପଡେ । ସବୁ ମନୋବାଞ୍ଝା ପୂରଣ କରିଥାନ୍ତି । ସେଥିପାଇଁତ ରାଜ୍ୟ ତଥା ରାଜ୍ୟ ବାହାରୁ ମାଆଙ୍କ ଦର୍ଶନ ପାଇଁ ଛୁଟି ଆସିଛନ୍ତି ଭକ୍ତ । ବାଲେଶ୍ବର ଜିଲ୍ଲା ନୀଳଗିରି ନିକଟ ସଜନାଗଡରେ ବିରାଜିଛନ୍ତି ମାଆ ଭୂଧାରଚଣ୍ଡୀ । ଏବେ ମାଆଙ୍କ ମନ୍ଦିରରେ ଚାଲିଛି ନବରାତ୍ର ପୂଜା । ପ୍ରତିଦିନ ସହସ୍ର କୁମ୍ଭାଭିଷେକ ଜଳରେ ସ୍ନାନ କରନ୍ତି ମାଆ । ପରେ ବିଭିନ୍ନ ବେଶରେ ସୁସଜ୍ଜିତ ହୋଇଥିବା ମାଆଙ୍କୁ ଦେଖିବାକୁ ଭକ୍ତଙ୍କ ଗହଳି ଲାଗେ ।
ପ୍ରତ୍ୟକ୍ଷ ଠାକୁରାଣୀ ଭାବରେ ଜଣାଶୁଣା ମାଆଙ୍କ ପୀଠରେ ହୁଏ ବାର ମାସରେ ତେର ପର୍ବ । ପ୍ରତିଦିନ ମାଆଙ୍କ ମନ୍ଦିରରେ ହୋମଯଜ୍ଞ ସହ ଚଣ୍ଡୀପାଠ ହୋଇଥାଏ । ଏହି ସମୟରେ ମାଆଙ୍କୁ ଦର୍ଶନ ଯାହା ମାଗିଲେ ମନୋବାଞ୍ଝା ପୂରଣ ହୋଇଥାଏ । ତେବେ ମାଆ ୩ଟି ମୁଖ ଧାରଣ କରିଛନ୍ତି । ମାଆଙ୍କ କୁମାରୀ ବେଶ ଓ ମୁଖକୁ ଭକ୍ତଙ୍କୁ ଦର୍ଶନ ସୁଯୋଗ ମିଳେ । ଆଉ ୨ଟି ମୁଖ ଗୋଟିଏ ନରସିଂହି ଓ ବାରାହୀ ଲୁକ୍କାୟିତ ଅବସ୍ଥାରେ ଥାଏ ।
ଦୀର୍ଘ ୪ଶହ ବର୍ଷର ପ୍ରତ୍ୟକ୍ଷ ଠାକୁରାଣୀ ମାଆ ଭୂଧାରଚଣ୍ଡୀ । ତାଙ୍କ ପୀଠକୁ ନେଇ ଲୁଚିରହିଛି ଅନେକ ଐତିହ୍ୟ । କିମ୍ବଦନ୍ତୀ କହେ ୪ଶହ ବର୍ଷ ପୂର୍ବରୁ ଏହି ସ୍ଥାନରେ ଜଣେ ଚାଷୀ ହଳ କରୁଥିବାବେଳେ ବିରାଟକାୟ ପଥର ତାଙ୍କ ଲଙ୍ଗଳ ମୁନରେ ବାଜିଥିଲା । ପରେ ମାଆ ତତ୍କାଳୀନ ରାଜା ବସନ୍ତ ଭୁଜଙ୍ଗ ମାନଧାତାଙ୍କୁ ସ୍ୱପ୍ନାଦେଶ ଦେଇଥିଲେ।ମାଟିତଳୁ ମାଆଙ୍କୁ ଅନ୍ୟ କୁଆଡେ ନେବାକୁ ଚେଷ୍ଟା କରିଥିଲେ ମଧ୍ୟ ସେ କୁଆଡେ ହଲି ନଥିଲେ । ଶେଷରେ ମାଆଙ୍କ ପାଇଁ ନିର୍ମାଣ ହେଲା ସୁନ୍ଦର କାରୁକାର୍ଯ୍ୟ ଭରା ମନ୍ଦିର । ସେବେଠୁ ଏଠି ପୂଜା ପାଉଛନ୍ତି ଦେବୀ । ଭୂମି ଫଟାଇ ଆବିର୍ଭାବ ହୋଇଥିବାରୁ ଭୂଧାରଚଣ୍ଡୀ ନାଁରେ ପ୍ରସିଦ୍ଧି ଲାଭ କରିଛନ୍ତି ।
କୁହାଯାଏ ଶ୍ରୀଜଗନ୍ନାଥ ସଂସ୍କୃତି ସହ ମାଆଙ୍କ ସଂପର୍କ ନିବିଡ । ଶ୍ରୀକ୍ଷେତ୍ରରେ ନବକଳେବର ବେଳେ ମାଆଙ୍କ ପାଖକୁ ମାଲ୍ୟ ଓ ମହାପ୍ରସାଦ ଆସେ । ନୀଳଗିରିରେ ମଧ୍ୟ ଶ୍ରୀଜଗନ୍ନାଥଙ୍କ ନବକଳେବର ବେଳେ ଭକ୍ତ ଓ ସେବାୟତମାନେ ଚଣ୍ଡିପାଠ ଉଦ୍ଦେଶ୍ୟରେ ମାଆଙ୍କୁ ନିମନ୍ତ୍ରଣ ଦେଇଥାନ୍ତି ।
