ନୂଆଦିଲ୍ଲୀ: ଟେଲିଭିଜନର ଲୋକପ୍ରିୟ ରିୟାଲିଟି ଶୋ’ ବିଗ୍ ବସ୍ ଉପରେ ରୋକ ଲଗାଇବା ପାଇଁ ସଂସଦରେ ଦାବି ଉଠିଛି । ବିଜେପି ସାଂସଦ ଅନିଲ ଫିରୋଜିୟା ଗୁରୁବାର ଲୋକସଭାରେ ଏହି ପ୍ରସଙ୍ଗ ଉଠାଇଛନ୍ତି । ସେ କହିଛନ୍ତି ଯେ ଏହି ରିୟାଲିଟି ଶୋ’ରେ ଅଶ୍ଲୀଳତା ଓ ଅଭଦ୍ର ଭାଷାକୁ ପ୍ରୋତ୍ସାହିତ କରାଯାଉଛି, ଯାହା ସମାଜ ପାଇଁ କ୍ଷତିକାରକ ହୋଇପାରେ ।
ମଧ୍ୟପ୍ରଦେଶର ଉଜ୍ଜୈନରୁ ଲୋକସଭା ସାଂସଦ ଫିରୋଜିୟା ଲୋକସଭାର ଶୂନ୍ୟକାଳରେ ଏହି ବିଷୟ ଉଠାଇଥିଲେ । ସେ କହିଛନ୍ତି, 'ବିଗ୍ ବସ୍ ଏପରି ଶୋ’ ଯାହାକୁ ଭାରତୀୟ ଟିଭିରେ ବଡ଼ ଆକାରରେ ପ୍ରସାରିତ କରାଯାଏ ଓ ଏହାର କୋଟି କୋଟି ଦର୍ଶକ ଅଛନ୍ତି ।' ସାଂସଦ କହିଛନ୍ତି, 'ପ୍ରଥମେ ଏହା ଏକ ସାମାନ୍ୟ ରିୟାଲିଟି ଶୋ’ ଥିଲା, କିନ୍ତୁ ପରେ ଏଥିରେ ଅଶ୍ଲୀଳତା ଓ ବିବାଦର ସ୍ତର ବଢିଯାଇଛି । ଯାହା କେବଳ ଦର୍ଶକଙ୍କ ପାଇଁ ନୁହେଁ, ବରଂ ସମାଜ ପାଇଁ ମଧ୍ୟ କ୍ଷତିକାରକ ଅଟେ ।'
ସେ ଦାବି କରିଛନ୍ତି ଯେ ଶୋ’ରେ ଅଧିକାଂଶ ସମୟରେ ଅଭଦ୍ର ଭାଷା ଓ ବିବାଦକୁ ପ୍ରୋତ୍ସାହିତ କରାଯାଉଛି ତଥା ଅନେକ ସମୟରେ ପ୍ରତିଯୋଗୀଙ୍କ ବ୍ୟକ୍ତଗତ ଜୀବନର ଖାରପ କଥାକୁ ଦେଖାଯାଇଥାଏ । ସାଂସଦ କହିଛନ୍ତି ଯେ ଆମର ଯୁବପିଢି ଓ ପିଲାଙ୍କ ଉପରେ ଏହି ଶୋ’ର ଗଭୀର ପ୍ରଭାବ ପଡ଼ୁଛି । ଏହି କାର୍ଯ୍ୟକ୍ରମର ହୋଷ୍ଟ ଅଭିନେତା ସଲମାନ ଖାନଙ୍କ ନାଁ ନେଇ ସେ କହିଛନ୍ତି, 'ଏହି ଟିଭି କାର୍ଯ୍ୟକ୍ରମ କିମ୍ୱା ଏପରି ଅନ୍ୟ ଶୋ’ ଉପରେ ତୁରନ୍ତ ରୋକ୍ ଲଗାଇବା ପାଇଁ ମୁଁ ଦାବି କରୁଛି ।'
