ନୂଆଦିଲ୍ଲୀ: ଉତ୍ତର ପ୍ରଦେଶ ସମେତ ଦେଶରେ ହୋଇଥିବା ବୁଲଡୋଜର ଆକ୍ସନକୁ ନେଇ କଠୋର ହେଲେ ସୁପ୍ରିମକୋର୍ଟ । ଏହାକୁ ଅସାମ୍ବିଧାନିକ କହିବା ସହିତ ସ୍ଥାନୀୟ ସରକାରଙ୍କ ଉପରେ ବର୍ଷିଛନ୍ତି । ୨୦୨୧ରେ ପ୍ରୟାଗରାଜରେ ବୁଲଡୋଜର ଆକ୍ସନ ହୋଇଥିଲା । ଏହାକୁ ବିରୋଧ କରି ଜଣେ ଆଇନଜୀବୀ, ଜଣେ ପ୍ରଫୋସର ଏବଂ ତିନି ଜଣ ମହିଳା ସର୍ବୋଚ୍ଚ ଅଦାଲତଙ୍କ ଦ୍ବାରସ୍ତ ହୋଇଥିଲେ । ମଙ୍ଗଳବାର ଏହାକୁ ଶୁଣାଣି କରି ସୁପ୍ରିମକୋର୍ଟ କହିଛନ୍ତି, କୌଣସି ବ୍ୟକ୍ତିଙ୍କ ଘରକୁ ବୁଲଡୋଜର ଲଗାଇ ଧ୍ବସ୍ତ କରିବା କିମ୍ବା ମନମାନି ପ୍ରକ୍ରିୟା ନାଗରିକ ଅଧିକାରକୁ କ୍ଷୂର୍ଣ୍ଣ କରୁଛି ।
ପାଞ୍ଚ ପୀଡିତଙ୍କୁ ୧୦-୧୦ କ୍ଷତିପୂରଣ:
ସୁପ୍ରିମକୋର୍ଟ କହିଛନ୍ତି, ବୁଲଡୋଜର ଆକ୍ସନ ଆମ ଅନ୍ତରଆତ୍ମାକୁ ଦୋହଲାଇ ଦେଇଛି । ଲୋକଙ୍କର ରାଇଟ୍ ଟୁ ସେଲ୍ଟର ଭଳି କିଛି ଅଧିକାର ରହିଛି । ଏହି ଘଟଣାରେ କୋର୍ଟଙ୍କ ନୋଟିସ୍ ଓ ଅନ୍ୟ ପ୍ରକ୍ରିୟାକୁ ପାଳନ କରାଯାଉନଥିବା କହିଛନ୍ତି ଅଦାଲତ । ଏହା ସହିତ ପ୍ରୟାଗରାଜ ବିକାଶ ପ୍ରାଧିକରଣକୁ କ୍ଷତିପୂରଣ ପାଇଁ ନିର୍ଦ୍ଦେଶ ଦେଇଛନ୍ତି । ୫ଜଣ ପୀଡ଼ିତଙ୍କୁ ୧୦ ଲକ୍ଷ ଲେଖାଏଁ ଦେବାକୁ କୁହାଯାଇଛି ।
ସୁପ୍ରିମକୋର୍ଟ ଆହୁରି ମଧ୍ୟ କହିଛନ୍ତି, ଯେଉଁ ଭଳି ଭାବେ ଲୋକଙ୍କ ଘରକୁ ଭଙ୍ଗା ଯାଇଛି, ଏହା ଅମାନବୀୟ ଓ ବେଆଇନ । ତେଣୁ ଏଥିପାଇଁ କ୍ଷୂତିପୂରଣ ନିର୍ଦ୍ଦେଶ ଦିଆଯାଇଛି । ପ୍ରୟାଗରାଜରେ ବୁଲଡୋଜର ଆକ୍ସନ ସମ୍ପୂର୍ଣ୍ଣ ଭାବେ ଅବୈଧ ପ୍ରକ୍ରିୟା, ଏହା ଲୋକଙ୍କ ଆଶ୍ରୟ ଅଧିକାରୀକୁ ଉଲ୍ଲଙ୍ଘନ କରୁଛି । ଏଭଳି କାର୍ଯ୍ୟ ପ୍ରୟାଗରାଜ ବିକାଶ ପ୍ରାଧିକରଣର ଅସମ୍ବେଦନଶୀଳତାକୁ ଦର୍ଶାଉଛି ବୋଲି ସର୍ବୋଚ୍ଚ ଅଦାଲତ କହିଛନ୍ତି ।
ବୁଲଡୋଜର ଆକ୍ସନ ବିରୋଧୀ ଆବେଦନର ଶୁଣାଣି ବେଳେ ଜଷ୍ଟିସ୍ ଉଜ୍ଜଳ ଭୂୟାଁ ୨୪ ମାର୍ଚ୍ଚରେ ୟୁପିର ଆମ୍ବେଦକର ନଗରରେ ହୋଇଥିବା ଘଟଣାକୁ ସାମ୍ନାକୁ ଆଣି କହିଛନ୍ତି, ଅତିକ୍ରମଣ ବିରୋଧୀ ଅଭିଯାନ ସମୟରେ ଗୋଟିଏପଟେ ବସ୍ତି ଭଙ୍ଗା ଯାଇଥିବା ବେଳେ ଅନ୍ୟପଟେ ଏକ ୮ ବର୍ଷର ଛୋଟ ପିଲା ବହି ଧରି ଦୌଡ଼ୁଥିଲା । ଏହି ଦୃଶ୍ୟ ସସସ୍ତଙ୍କୁ ଆଘାତ ଦେଇଛି, ଏହା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ ସ୍ଥିତି । ଯେଉଁ ଭଳି ଭାବେ ଭଙ୍ଗାରୁଜା କରାଯାଇଛି , ଏଥିରେ ରହୁଥିବା ଲୋକେ ପୁଣି ଥରେ ଘର ଖଣ୍ଡେ କରିବାକୁ ସକ୍ଷମ ନୁହଁନ୍ତି ।
ନୋଟିସର ୨୪ ଘଣ୍ଟା ମଧ୍ୟରେ ଚାଲିଲା ବୁଲଡୋଜର:
ପ୍ରୟାଗରାଜ ବିକାଶ ପ୍ରାଧିକରଣ ଆକ୍ସନ ନେବା ପୂର୍ବରୁ ବସ୍ତି ବାସିନ୍ଦାଙ୍କୁ କୌଣସି ପ୍ରକାର ନୋଟିସ୍ ମିଳିନାହିଁ । ଆବେଦନକାରୀ କହିଛନ୍ତି, ୨୦୨୧ରେ ମାର୍ଚ୍ଚ ପହିଲାଙ୍କୁ ସେମାନଙ୍କୁ ନୋଟିସ୍ ଜାରି କରାଯାଇଥିଲା । ହେଲେ ନୋଟିସ୍ ସେମାନଙ୍କ ନିକଟରେ ମାର୍ଚ୍ଚ ୬ ତାରିଖରେ ପହଞ୍ଚିଲା ଏବଂ ପରଦିନ ଆର୍ଥାତ୍ ମାର୍ଚ୍ଚ ୭ ତାରିଖରେ ବୁଲଡୋଜର ଆକ୍କନ ହୋଇଥିଲା । ଏହାକୁ ନେଇ ପ୍ରୟାଗରାଜ ବିକାଶ ପ୍ରାଧିକରଣ ଉପରେ ବର୍ଷିଛନ୍ତି ସୁପ୍ରିମକୋର୍ଟ।...
