ମୁମ୍ୱାଇ ୧୩/୦୧: ବର୍ଡର-ଗାଭାସ୍କର ଟ୍ରଫି (BGT)ରେ ଭାରତର ପ୍ରଦର୍ଶନ ଥିଲା ନୈରାଶ୍ୟଜନକ । ଖାସ୍ କରି ରୋହିତ-କୋହଲିଙ୍କ ଫର୍ମକୁ ନେଇ ଉଠିଛି ପ୍ରଶ୍ନ । ଏହା ସହିତ, ଭାରତୀୟ ଦଳ ବିଶ୍ୱ ଟେଷ୍ଟ ଚାମ୍ପିଅନସିପ୍ (WTC)ର ଫାଇନାଲରେ ପହଞ୍ଚିପାରିଲାନି । ଅଷ୍ଟ୍ରେଲିଆ ଗସ୍ତ ପରେ, ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଜାନୁଆରୀ ୧୨ (ରବିବାର) ମୁମ୍ବାଇରେ ଏକ ସମୀକ୍ଷା ବୈଠକ କରିଥିଲା।
ଏହି ବୈଠକର ଉଦ୍ଦେଶ୍ୟ ଥିଲା ଅଷ୍ଟ୍ରେଲିଆରେ ଟିମ୍ ଇଣ୍ଡିଆର ପରାଜୟର ପୋଷ୍ଟମର୍ଟମ । କେଉଁଠି ରହିଲା ଭୁଲ ତାର ହୋଇଥିଲା ତର୍ଜମା । ଅଧିନାୟକ ରୋହିତ ଶର୍ମା, ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର, ବିସିସିଆଇ ସଭାପତି ରୋଜର ବିନ୍ନି, ସଚିବ ଦେବଜିତ ସାଇକିଆ ଏବଂ ଉପାଧ୍ୟକ୍ଷ ରାଜୀବ ଶୁକ୍ଳା ଏହି ସମୀକ୍ଷା ବୈଠକରେ ଯୋଗ ଦେଇଥିଲେ। ବୈଠକ ପ୍ରାୟ ୨ ଘଣ୍ଟା ଧରି ଚାଲିଥିଲା । ଏହି ସମୟ ମଧ୍ୟରେ, ମ୍ୟାନେଜମେଣ୍ଟ ନ୍ୟୁଜିଲାଣ୍ଡ ବିପକ୍ଷରେ ଭାରତୀୟ ଦଳର ପ୍ରଦର୍ଶନର ମଧ୍ୟ ସମୀକ୍ଷା କରିଥିଲେ ।
ସୂତ୍ରରୁ ଜଣାପଡିଛି ବୈଠକରେ ରୋହିତ ଶର୍ମା ଏବଂ ବିରାଟ କୋହଲିଙ୍କ ପ୍ରଦର୍ଶନ ଉପରେ ଆଲୋଚନା ହୋଇଥିଲା । ଉଭୟ ଖେଳାଳିଙ୍କୁ ପଡ଼ିଆରେ ଭଲ ପ୍ରଦର୍ଶନ କରିବାକୁ ସ୍ପଷ୍ଟ ଭାବେ ନିର୍ଦ୍ଦେଶ ଦିଆଯାଇଛି । ଏହା ବ୍ୟତୀତ ବୈଠକରେ ରୋହିତ ଶର୍ମାଙ୍କ ଅଧିନାୟକତ୍ୱ ବିଷୟରେ ମଧ୍ୟ ଆଲୋଚନା ହୋଇଥିଲା । ତେବେ ଯାହା ଜଣାପଡିଛି ଉଭୟଙ୍କ ବିରୋଧରେ ଏବେ କୌଣସି କାର୍ଯ୍ୟାନୁଷ୍ଠାନ ହେବନି । ବରଂ ଚାମ୍ପିଅନ୍ସ ଟ୍ରଫି ପରେ ମ୍ୟାନେଜମେଣ୍ଟ ଅଧିନାୟକ ପରିବର୍ତ୍ତନ କରିବାର ସମ୍ଭାବନା ରହିଛି ।
ସୂତ୍ରରୁ ଆହୁରି ଜଣାପଡ଼ିଛି କି, 'ଯେପର୍ଯ୍ୟନ୍ତ ବିରାଟ କୋହଲି ବି ଆଗକୁ ଟ୍ରଫିରେ ଭଲ ପ୍ରଦର୍ଶନ ଦେଖାଇବାକୁ ପଡିବ । ଚାମ୍ପିଅନ୍ସ ଟ୍ରଫିରେ ପ୍ରଦର୍ଶନ ଉପରେ ସବୁକିଛି ନିର୍ଭର କରେ । ଖେଳାଳିମାନେ ଦ୍ୱିପାକ୍ଷିକ ସିରିଜ୍ ଏବଂ ଘରୋଇ ଟୁର୍ଣ୍ଣାମେଣ୍ଟରୁ ଦୂରେଇ ରହିବା ନେଇ ମ୍ୟାନେଜମେଣ୍ଟ ଖୁସି ନାହିଁ । ସୂତ୍ର କହିଛି ଯେ ଏପରି ଖେଳାଳିମାନଙ୍କୁ ଚୟନ କରାଯିବନି, ଯେଉଁମାନେ ଖେଳୁନାହାଁନ୍ତି ଘରୋଇ ମ୍ୟାଚ୍। ତେବେ ଖେଳାଳିମାନଙ୍କୁ ଘରୋଇ ମ୍ୟାଚ୍ରେ ଅଂଶଗ୍ରହଣ କରିବାକୁ ପଡିବ ବୋଲି ମ୍ୟାନେଜମେଣ୍ଟ ନିଷ୍ପତ୍ତି ନେଇଛି । ଖେଳାଳି ଏବଂ ଚୟନକର୍ତ୍ତାମାନଙ୍କୁ ମଧ୍ୟ ଏ ବିଷୟରେ କଡ଼ାକଡ଼ି ସୂଚନା ଦିଆଯାଇଛି ।
ବୈଠକରେ ଦଳର ପ୍ରଦର୍ଶନ ବିଷୟରେ ବିସ୍ତୃତ ଆଲୋଚନା କରାଯାଇଥିଲା । ବିଶେଷକରି ବ୍ୟାଟିଂ ଲାଇନ୍ ଅପ୍ ବିଷୟରେ।' ଭାରତୀୟ ବ୍ୟାଟସମ୍ୟାନମାନେ ଏକ ଶକ୍ତିଶାଳୀ ଲାଇନ୍ ଅପ୍ ସତ୍ତ୍ୱେ କାହିଁକି ଭଲ ପ୍ରଦର୍ଶନ କରିପାରିଲେ ନାହିଁ ତାହା ମ୍ୟାନେଜମେଣ୍ଟ ବୁଝିବାକୁ ଚାହିଁଥିଲା । ଏହା ସହିତ, ମୁଖ୍ୟ କାରଣ ଏବଂ ଏହାର ସମାଧାନ ବିଷୟରେ ଆଲୋଚନା କରାଯାଇଥିଲା। ସମସ୍ତ ବିଷୟ ବିଚାରକୁ ନିଆଯାଇଛି ଏବଂ ଚାମ୍ପିଅନ୍ସ ଟ୍ରଫି ପରେ ତୁରନ୍ତ କିଛି ପଦକ୍ଷେପ ନିଆଯିବ।
