କଟକ ୨୫/୧୧: ବାଂଲାଦେଶରୁ ଜଣେ ନାବାଳିକାଙ୍କୁ ଓଡ଼ିଶା ଆଣି ଦେହ ବ୍ୟବସାୟରେ ଲଗାଇଥିବା ଅଭିଯୋଗରେ ଦମ୍ପତ୍ତିଙ୍କୁ ଗିରଫ କରିଛି ମଧୁପାଟଣା ପୋଲିସ । ଅଭିଯୁକ୍ତ ଦୁହେଁ ହେଲେ କଟକ ସଦର ଥାନା ଅନ୍ତର୍ଗତ ଗୋପାଳପୁର ଅଞ୍ଚଳରେ ରହୁଥିବା ରାଜସ୍ଥାନର ୫୫ ବର୍ଷିୟ ବୀରା ଗୁଜ୍ଜର ଚୌଧୁରୀ ଓ ତାଙ୍କ ପତ୍ନୀ ୩୬ ବର୍ଷୀୟ ଯସ୍ମିନ୍ ।
ଅଭିଯୁକ୍ତ ଦମ୍ପତ୍ତି କିଛିଦିନ ହେବ ନାବାଳିକାଙ୍କୁ ଅନ୍ୟ ଜଣେ ଦଲାଲ୍ଠାରୁ ଆଣିଥିଲେ । ସୋମବାର ପୀଡ଼ିତାଙ୍କ ଡାକ୍ତରୀମାଇନା କରାଯିବ ବୋଲି ପୋଲିସ ସୂଚନା ଦେଇଛି । ପୋଲିସ ନିକଟରେ ପୀଡ଼ିତା ଦେଇଥିବା ବୟାନ ଅନୁସାରେ ଦଶହରା ପୂର୍ବରୁ କିଛି ଦଲାଲ୍ ବାଂଲାଦେଶରୁ ତାଙ୍କୁ ବେଆଇନ ଭାବେ ସୀମା ପାର୍ କରି କୋଲକାତା ଆଣିଥିଲେ । ସେଠାରୁ କିଛି ଯୁବକ ପୀଡ଼ିତାଙ୍କୁ ବସ୍ ଯୋଗେ ଭୁବନେଶ୍ୱର ଆଣିଥିଲେ ।
ଭୁବନେଶ୍ୱରରେ ସେ ପ୍ରାୟ ୧୫ ଦିନରୁ ଅଧିକ ସମୟ ରହିଥିଲେ । ପରେ ତାଙ୍କୁ ବାରିପଦା ନିଆଗଲା । ଏହା ପରେ ପୁଣି ସେ ଭୁବନେଶ୍ୱର ଆସିଲେ । ସେଠାରେ ମସାଜ୍ ସେଣ୍ଟରରେ ରଖିବା ବାହାନାରେ ଦେହ ବ୍ୟବସାୟରେ ନିୟୋଜିତ କରାଯାଉଥିଲା । ଗତ ୭ ତାରିଖରେ ଭୁବନେଶ୍ୱରର ଦଲାଲ୍ ନାବାଳିକାଙ୍କୁ ଗୋପାଳପୁରରେ ରହୁଥିବା ବୀରା ଓ ଯସ୍ମିନ୍ଙ୍କୁ ବିକିଦେଇଥିଲେ । ପୀଡ଼ିତାଙ୍କୁ ସ୍ୱାମୀ-ସ୍ତ୍ରୀ ନେଇ ଗୋପାଳପୁର ଆସିଲେ । ମାତ୍ର ସେଠାରେ ଦମ୍ପତି ନାବାଳିକାଙ୍କୁ ଦେହ ବ୍ୟବସାୟରେ ଲଗାଇଲେ ।
ଏହା ସହିତ ଘରର ବିଭିନ୍ନ କାମ କରାଇବା ସହ ନିର୍ଯାତନା ଦେଉଥିଲେ । ଏହାକୁ ନେଇ ପାଟିତୁଣ୍ଡ ମଧ୍ୟ ହୋଇଥିଲା । ନାବାଳିକା ଜଣକ ରାତି ଅଧରେ ଲୁଚି ଘରୁ ପଳାଇ ଆସିଲେ । କାଠଯୋଡ଼ି ପୋଲ ପାରି ମଧୁପାଟଣା ଥାନା ନିକଟରେ ଯାଉଥିବା ବେଳେ ପିସିଆର୍ ଟିମ୍ ପୀଡ଼ିତାଙ୍କୁ ଉଦ୍ଧାର କରି ବସୁନ୍ଧରାରେ ଛାଡ଼ିଥିଲା । ସେଠାରେ କାଉନ୍ସେଲିଂରେ ପୀଡ଼ିତା ସବୁ କଥା କହିଥିଲେ । ଏହା ପରେ ପୀଡ଼ିତାଙ୍କୁ ସିଡବ୍ଲୁସିରେ ହାଜର କରଗଲା ।
ସିଡବ୍ଲୁସି ପୀଡ଼ିତାଙ୍କଠାରୁ ସବୁ ଶୁଣିବା ପରେ ଚିଠି ଯୋଗେ କଟକ ଡିସିପିଙ୍କୁ ଅବଗତ କରାଇଲା । ଏହି ଅନୁସାରେ ମଧୁପାଟଣା ଥାନାରେ ମାମଲା ରୁଜୁ କରାଯାଇଥିଲା । ଉକ୍ତ ରାତିରେ ପୀଡ଼ିତାଜଣକ କୋଲକତା ବସ୍ରେ ଫେରିଯିବାକୁ ଚାହୁଁଥିଲେ ବୋଲି ବୟାନ ଦେଇଛନ୍ତି । ଅଭିଯୁକ୍ତ ବୀରା ଓ ଯସ୍ମିନ୍ଙ୍କ ନାଁ ସିଡବ୍ଲୁସି ଏବଂ ମଧୁପାଟଣା ଥାନା ପୋଲିସ ସମ୍ମୁଖରେ ପୀଡ଼ିତା କହିବାରୁ ଦୁଇ ଜଣଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ଡିସିପି ଜଗମୋହନ ମୀନା ସୂଚନା ଦେଇଛନ୍ତି ।
ତେବେ ପୀଡ଼ିତାଙ୍କୁ ବାଂଲାଦେଶ ଫେରାଇବା ପ୍ରକ୍ରିୟା ଆରମ୍ଭ ହୋଇଥିବା ନେଇ ପୋଲିସ କହୁଥିଲେ ବି ତାହା ଏତେ ସରଳ ନୁହେଁ । ପୀଡ଼ିତାଙ୍କର ପାସ୍ପୋର୍ଟ କିମ୍ବା ଭିସା ନାହିଁ । ବେଆଇନ ଭାବେ ସେ ଭାରତକୁ ଆସିଛନ୍ତି । ତେଣୁ ପୀଡ଼ିତାଙ୍କୁ ଫେରାଇବାରେ ଆଇନ ଅଡ଼ୁଆ କରୁଛି । ଏନେଇ ବୈଦେଶିକ ବ୍ୟାପାର ମନ୍ତ୍ରାଳୟ ସହିତ ଯୋଗାଯୋଗ କରାଯାଉଥିବା ପୁଲିସ କହିଛି ।
