ନୂଆଦିଲ୍ଲୀ: ଦିଲ୍ଲୀର ବାୟୁ ପ୍ରଦୂଷଣ ଚରମ ସ୍ତରରେ । ବିଷ ବଳୟରେ ଜାତୀୟ ରାଜଧାନୀ । ଏୟାର କ୍ବାଲିଟି ଇଣ୍ଡେକ୍ସ ଖରାପ ଯୋଗୁ ଧୂଆଁ ଧୂଆଁ ହୋଇଛି ବାୟୁମଣ୍ଡଳ । କୁହୁଡ଼ି ଯୋଗୁ ଦିଲ୍ଲୀ ଏବଂ ଏନସିଆର୍ ଆଞ୍ଚଳରେ ଦୃଶ୍ୟାମାନ ହ୍ରାସ ପାଇଛି । ଫଳରେ ରାସ୍ତାଘାଟ ଦେଖାଯାଉ ନ ଥିବାବେଳେ ନିଶ୍ୱାସ ନେବା କଷ୍ଟକର ହୋଇଛି । ଏହାକୁ ଦୃଷ୍ଟିରେ ରଖି ଦିଲ୍ଲୀ ସରକାର ପ୍ରଥାମିକ ସ୍କୁଲକୁ ବନ୍ଦ କରିଛନ୍ତି । ପରିବର୍ତ୍ତୀ ନିର୍ଦ୍ଦେଶନାମା ଆସିବା ଯାଏଁ ଅନଲାଇନରେ କ୍ଲାସ ଚାଲିବ ।

ଦିଲ୍ଲୀର ସମସ୍ତ ପ୍ରାଥମିକ ବିଦ୍ୟାଳୟରେ ଅନଲାଇନ୍ କ୍ଲାସ୍ ଚାଲିବ। ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ଏକ୍ସ ପୋଷ୍ଟ ଯୋଗେ ସୂଚନା ଦେଇଛନ୍ତି । ସ୍ଥିତିରେ ସୁଧାର ନ ଆସିବା ପର୍ଯ୍ୟନ୍ତ ଅନଲାଇନ୍ କ୍ଲାସ୍ ଜାରି ରହିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।  ଶୁକ୍ରବାର ଏୟାର୍ କ୍ୱାଲିଟି ଇଣ୍ଡେକ୍ସ ୪୦୯ରେ ପହଞ୍ଚିଛି । ଦିଲ୍ଲୀର ୨୧ଟି ସ୍ଥାନରେ ବାୟୁ ଗୁଣବତ୍ତା ନିମ୍ନମାନର ରହିଛି । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଅନୁଯାୟୀ, ଶୁକ୍ରବାର ଦିଲ୍ଲୀ ଜାହାଙ୍ଗୀରପୁରୀ ଅଞ୍ଚଳରେ ବାୟୁ ପ୍ରଦୂଷଣ ମାତ୍ରା ସର୍ବାଧିକ ରହିଛି । ଜାହାଙ୍ଗୀରପୁରୀରେ ଏୟାର କ୍ବାଲିଟି ଇଣ୍ଡେକ୍ସ ୪୫୮ ରେକର୍ଡ କରାଯାଇଛି । ବାଓ୍ବାନା ଏବଂ ଓ୍ବାଜିରପୁରରେ AQI ୪୫୫ ରହିଛି । ରୋହିଣୀ ଅଞ୍ଚଳରେ AQI  ୪୫୨ ରହିଥିବା ବେଳେ ପଞ୍ଜାବୀ ବାଗ ୪୪୩ରେ ପହଞ୍ଚିଛି । 

ବାୟୁ ପ୍ରଦୂଷଣ ପାଇଁ ଜାତୀୟ ରାଜଧାନୀରେ ଆଜିଠୁ GRAP-୩ କଟକଣା ଲାଗୁ ହୋଇଛି । ଗ୍ରେଡ-୩ କଟକଣା ମଧ୍ୟରେ ଦିଲ୍ଲୀରେ ବିଏସ-୩ ଓ ବିଏସ-୪ ଡିଜେଲ ଚାରି ଟକିଆ ଗାଡି ଚଳାଚଳ ଉପରେ କଟକଣା ରହିବ। ଦିଲ୍ଲୀରେ ହାଲୁକା ବ୍ୟବସାୟିକ ଯାନ, ଡିଜେଲ ଟ୍ରକର ପ୍ରବେଶ ଉପରେ କଟକଣା ରହିଛି । ଅନାବଶ୍ୟକ ନିର୍ମାଣ କାର୍ଯ୍ୟ ବନ୍ଦ ରହିବ। ଉଚ୍ଛେଦ କାର୍ଯ୍ୟ ମଧ୍ୟ ବନ୍ଦ ରହିବ । ହୋଟେଲ, ରେସ୍ତୋରାଁରେ ତନ୍ଦୁର ଚୁଲିରେ କୋଇଲା ଏବଂ କାଠ ଜାଳିବା ଉପରେ କଟକଣା ରହିଛି । କେବଳ ଜରୁରୀକାଳୀନ କାର୍ଯ୍ୟ ପାଇଁ ଡିଜେଲ ଜେନେରେଟରର ବ୍ୟବହାର ହୋଇପାରିବ। ଶିଳ୍ପରେ ଅଣସ୍ଵୀକୃତି ଇନ୍ଧନର ବ୍ୟବହାରରେ କଟକଣା ଲାଗିଛି। ଧୂଳିକୁ କମ କରିବାକୁ ରାସ୍ତାରେ ପାଣି ସିଂଚନ ଉପରେ ଗୁରୁତ୍ଵ ଦିଆଯିବ।