ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ଅତି ସଙ୍ଗୀନ ସ୍ଥିତିରେ ପହଞ୍ଚିଛି । ବାୟୁରେ ପ୍ରଦୂଷଣ ମାତ୍ରା ଏତେ ଅଧିକ ହୋଇଛି ଯେ, ଶେଷରେ ସରକାର ବିଭିନ୍ନ କଟକଣା ଲଗାଇବାକୁ ବାଧ୍ୟ ହୋଇଛନ୍ତି । ରାଷ୍ଟ୍ରୀୟ ରାଜଧାନୀ ଦିଲ୍ଲୀର ସମସ୍ତ ପ୍ରାଥମିକ ବିଦ୍ୟାଳୟକୁ ପରବର୍ତ୍ତୀ ନିର୍ଦ୍ଦେଶ ଯାଏ ବନ୍ଦ କରାଯାଇଛି । ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ମାର୍ଲେନା ଗୁରୁବାର ଏକ୍ସରେ ପୋଷ୍ଟ କରି ଏହି ଘୋଷଣା କରିଛନ୍ତି । ଏଥିରେ ସେ କହିଛନ୍ତି, 'ଦିଲ୍ଲୀରେ ବଢୁଥିବା ପ୍ରଦୂଷଣ ଯୋଗୁଁ ସବୁ ସ୍କୁଲରେ ଅନଲାଇନ କ୍ଲାସ୍ ହେବ ।'
Due to rising pollution levels, all primary schools in Delhi will be shifting to online classes, until further directions.
— Atishi (@AtishiAAP) November 14, 2024
ଦିଲ୍ଲୀରେ ବାୟୁ ପ୍ରଦୂଷଣ ଅତି ସଙ୍ଗୀନ ସ୍ଥିତିରେ ପହଞ୍ଚିଛି । ଦିଲ୍ଲୀର ଏକ୍ୟୁଆଇ ସ୍ତର ଗୁରୁବାର ୪୦୦ ପାର୍ କରିଛି । ପ୍ରଦୂଷଣର ଏହି ସ୍ତରକୁ ଦେଖି ବାୟୁ ଗୁଣବତ୍ତା ପ୍ରବନ୍ଧନ ଆୟୋଗ ନଭେମ୍ୱର ୧୫ରୁ ଗ୍ରାପ୍-୩ ଲାଗୁ କରିବା ପାଇଁ ନିଷ୍ପତ୍ତି ନିଆଯାଇଛି । ଏଥିରେ ନିର୍ମାଣ ସହ ଜଡ଼ିତ କାମକୁ ପ୍ରଦୂଷଣ ନିୟନ୍ତ୍ରଣ ହେବା ଯାଏ ବନ୍ଦ ରଖାଯିବ । ବିଲ୍ଡିଂ ଏବଂ ଘର ଭଙ୍ଗାରୁଜା, ଖନନ ସହ ସମସ୍ତ ପ୍ରକାର ଗତିବିଧି ବନ୍ଦ ରହିବ । ନଭେମ୍ୱର ୧୪ରେ ଦିଲ୍ଲୀର ଏକ୍ୟୁଆଇ ୪୨୮ ଥିଲା, ଯାହା ସହ ଚଳିତ ବର୍ଷରେ ପ୍ରଥମ ଥର ପାଇଁ ସିଭିୟର କ୍ୟାଟେଗୋରୀରେ ସାମିଲ ହୋଇଛି ।
ଦିଲ୍ଲୀ ଏନସିଆର ପାଇଁ ଗ୍ରେଡେଡ୍ ରେସପନ୍ସ ପ୍ଲାନ୍ (ଜିଆରପି)କୁ ଦିଲ୍ଲୀରେ ପ୍ରତିକୂଳ ବାୟୁ ଗୁଣବତ୍ତାକୁ ଚାରି ଭିନ୍ନ ଭିନ୍ନ ଫେଜ୍ରେ ବିଭକ୍ତ କରାଯାଇଛି :
ଫେଜ୍ ୧- ଖରାପ (AQI ୨୦୧-୩୦୦)
ଫେଜ୍ ୨- ଅତି ଖରାପ (AQI ୩୦୧-୪୦୦)
ଫେଜ୍ ୩- ଗମ୍ଭୀର (AQI ୪୦୧-୪୫୦)
ଫେଜ୍ ୪- ଅତି ଗମ୍ଭୀର (AQI >୩୦୦)
