ନୂଆଦିଲ୍ଲୀ: ଆଇପିଏଲ୍ ୨୦୨୫ର ୧୪ତମ ମ୍ୟାଚ୍ରେ ମୁହାଁମୁହିଁ ହେବେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ଗୁଜରାଟ ଟାଇଟନ୍ସ। ଆରସିବି ନିଜର ଘରୋଇ ମଇଦାନରେ ଚଳିତ ସିଜିନର ପ୍ରଥମ ମ୍ୟାଚ୍ ଖେଳିବ। ତୃତୀୟ ମ୍ୟାଚ୍ ଜିତି ହ୍ୟାଟ୍ରିକ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇବ ଆରସିବି। ବେଙ୍ଗାଲୁରୁର ଏମ ଚିନ୍ନାସ୍ଵାମୀ ଷ୍ଟାଡିୟମରେ ଏହି ମ୍ୟାଚ୍ ଆଜି ସନ୍ଧ୍ୟା ୭ଟା ୩୦ରେ ଆରମ୍ଭ ହେବ।
ଆରସିବି କୋଲକାତାକୁ ଇଡେନ ଗାର୍ଡେନ୍ସରେ ଓ ଚେନ୍ନାଇକୁ ଚେପକ ଷ୍ଟାଡିୟମରେ ହରାଇ ଦମଦାର ଷ୍ଟାଇଲରେ ନିଜର ଅଭି୍ଯାନ ଆରମ୍ଭ କରିଛି। ଅନ୍ୟପଟେ ଗୁଜରାଟ ନିଜର ପ୍ରଥମ ମ୍ୟାଚ୍ରେ ପଞ୍ଜାବ କିଙ୍ଗ୍ସଠୁ ହାରିଥିବା ବେଳେ ଦ୍ଵିତୀୟ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସକୁ ହରାଇଛି। ଆଇପିଏଲ୍ରେ ଆରସିବି ଓ ଗୁଜରାଟ ଟାଇଟନ୍ସ ମଧ୍ୟରେ ଏ ପର୍ଯ୍ୟନ୍ତ ୫ଟି ମ୍ୟାଚ୍ ଖେଳା ଯାଇଛି। ଏଥିରୁ ଆରସିବି ୩ଟି ମ୍ୟାଚ୍ ଜିତିଥିବା ବେଳେ ୨ଟି ଗୁଜରାଟ ଟାଇଟନ୍ସ ବିଜୟ ଲାଭ କରିଛି।
Also read: Yashasvi Jaiswal: ମୁମ୍ୱାଇ ଛାଡ଼ିଲେ ଜୈସ୍ୱାଲ, ଏହି ଟିମ୍ ପାଇଁ ଖେଳିବେ ଘରୋଇ କ୍ରିକେଟ୍
ଚିନ୍ନାସ୍ଵାମୀ ଷ୍ଟାଡିୟମର ପିଚ୍ ସର୍ବଦା ବ୍ୟାଟରଙ୍କୁ ସୁହାଇଛି। ଏଠାରେ ତିନି ଥର ୨୬୦ରୁ ଅଧିକ ସ୍କୋର ହୋଇ ସାରିଛି। ଛୋଟ ବାଉଣ୍ଡରୀ ଓ ଦ୍ରୁତ ଆଉଟ୍ ଫିଲ୍ଡ କାରଣରୁ ସର୍ବଦା ବୋଲରଙ୍କୁ ନିର୍ଧୁମ ପ୍ରହାର ପଡିଥାଏ। କିନ୍ତୁ ଆରସିବି ମତରେ ତାଙ୍କର ଦୁଇ ବୋଲର ଜୋଶ ହେଜେଲଉଡ ଓ ଭୁବନେଶ୍ଵର କୁମାର ଏହି ପିଚ୍ରେ ବ୍ୟାଟରଙ୍କ ଉପରେ ଅଙ୍କୁଶ ଲଗାଇ ପାରିବେ।
ହେଜେଲଉଡ ଏହି ଆଇପିଏଲ୍ରେ ୬ରୁ କମ ହାରରେ ରନ କରିଛନ୍ତି। ଚେନ୍ନାଇ ବିପକ୍ଷ ମ୍ୟାଚ୍ରେ ଭୁବନେଶ୍ଵର କୁମାର ଓଭର ପିଛା ମାତ୍ର ୬.୬ ହାରରେ ରନ ଦେଇଥିଲେ। ଅନ୍ୟପଟେ ଗୁଜରାଟ ନିକଟରେ କିଛି ତାରକା ବ୍ୟାଟର ଅଛନ୍ତି। ଶୁଭମନ ଗିଲ୍ ଓ ସାଇ ସୁଦର୍ଶନ ଭଲ ଓପନିଂ ଦେଉଛନ୍ତି। ସ୍ପିନ ବିଭାଗରେ ଆରସିବିରେ କୃଣାଲ ପାଣ୍ଡ୍ୟା ଓ ସୁୟଶ ଶର୍ମା ଦୁର୍ବଳ ଲାଗୁଥିବା ବେଳେ ଗୁଜରାଟ ନିକଟରେ ରଶିଦ ଖାନ ଓ ଆର ସାଇ କିଶୋରଙ୍କ ପରି ବିପଦଜ୍ଜନକ ବୋଲର ଅଛନ୍ତି।
ଏମିତିରେ ବିରାଟ କୋହଲି, ଫିଲ ସଲ୍ଟ, ଅଧିନାୟକ ରଜତ ପାଟିଦାର ଓ ଦେବଦତ୍ତ ପାଡିକଲଙ୍କ ଅସଲ ପରୀକ୍ଷା ସ୍ପିନରଙ୍କ ସାମ୍ନାରେ ହେବ। ଗୁଜରାଟ ନିକଟରେ କାଗିସୋ ରାବଡା ଓ ମହମ୍ମଦ ସିରାଜଙ୍କ ପରି ଦ୍ରୁତ ବୋଲର ଅଛନ୍ତି। ତେଣୁ ଆଜିର ମ୍ୟାଚ୍ରେ କଡ଼ା ଟକ୍କର ଦେଖିବାକୁ ମିଳିପାରେ।
ସମ୍ଭାବିତ ଏକାଦଶ
ଆରସିବି- ଫିଲ ସଲ୍ଟ(ଓ୍ଵିକେଟ୍ କିପର), ବିରାଟ କୋହଲି, ଟିମ୍ ଡେଭିଡ୍, ଜିତେଶ ଶର୍ମା, ରଜତ ପାଟିଦାର(ଅଧିନାୟକ), ଦେବଦତ୍ତ ପାଡିକଲ, ଲିୟାମ ଲିଭିଙ୍ଗଷ୍ଟୋନ, କୃଣାଲ ପାଣ୍ଡ୍ୟା, ୟଶ ଦୟାଲ, ଜୋଶ ହେଜେଲଉଡ ଓ ଭୁବନେଶ୍ଵର କୁମାର।
ଗୁଜରାଟ ଟାଇଟନ୍ସ- ଜୋସ ବଟଲର(ଓ୍ଵିକେଟ୍ କିପର), ଶୁଭମନ ଗିଲ୍(ଅଧିନାୟକ), ସାଇ ସୁଦର୍ଶନ, ସେରଫେନ ରଦରଫୋର୍ଡ, ଶାହରୁଖ ଖାନ, ରଶିଦ ଖାନ, ରାହୁଲ ତେଓ୍ବତିଆ, ସାଇ କିଶୋର, କାଗିସୋ ରାବଡ଼ା, ପ୍ରସିଦ୍ଧ କୃଷ୍ଣ, ମହମ୍ମଦ ସିରାଜ।
