ନୂଆଦିଲ୍ଲୀ: ବିସିସିଆଇ ବୁଧବାର ଭାରତୀୟ ଦଳର ୨୦୨୫ ଘରୋଇ ସିଜିନର କାର୍ଯ୍ୟସୂଚୀ ଜାରି କରିଛି। ଭାରତ ଅକ୍ଟୋବର ମାସରେ ଓ୍ଵେଷ୍ଟଇଣ୍ଡିଜ ବିପକ୍ଷ ସିରିଜ୍ରୁ ଘରୋଇ ସିଜିନ ଆରମ୍ଭ କରିବ। ଦୁଇ ଦଳ ମଧ୍ୟରେ ଦୁଇ ମ୍ୟାଚ୍ର ଟେଷ୍ଟ ସିରିଜ୍ ଖେଳାଯିବ। ଏହା ପରେ ନଭେମ୍ବରରେ ଦକ୍ଷିଣ ଆଫ୍ରିକା ଭାରତ ଗସ୍ତରେ ଆସିବ। ଏଥିରେ ଦୁଇଟି ଟେଷ୍ଟ, ତିନୋଟି ଦିନିକିଆ ଓ ପାଞ୍ଚ ମ୍ୟାଚ୍ର ଟି-୨୦ ସିରିଜ୍ ଖେଳିବ। ତେବେ ଓଡ଼ିଶା କ୍ରିକେଟ୍ ପ୍ରେମୀଙ୍କ ପାଇଁ ଆସିଛି ଖୁସିର ଖବର। କଟକ ବାରବାଟୀ ଷ୍ଟାଡିୟମରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଏକ ଟି-୨୦ ମ୍ୟାଚ୍ ଖେଳାଯିବ।
ଚଳିତ ବର୍ଷ ଫେବୃଆରୀ ୯ରେ ଭାରତ ଓ ଇଂଲଣ୍ଡ ମଧ୍ୟରେ ଦିନିକିଆ ସିରିଜ୍ର ଆୟୋଜନ କରିଥିଲା ବାରବାଟୀ। ଆଉ ଗୋଟିଏ ବର୍ଷ ଭିତରେ ଆଉ ଏକ ଅନ୍ତର୍ଜାତୀୟ ମ୍ୟାଚ୍ ଅୟୋଜନ କରିବାର ଅଧିକାର ଓଡ଼ିଶା କ୍ରିକେଟ୍ ଆସୋସିଏସନକୁ ମିଳିଛି। ବିସିସିଆଇର କାର୍ଯ୍ୟସୂଚୀ ଅନୁଯାୟୀ, ଡିସେମ୍ବର ୯ ତାରିଖରେ ବାରବାଟୀରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ପାଞ୍ଚ ମାଚ୍ ବିଶିଷ୍ଟ ଟି-୨୦ ସିରିଜ୍ର ପ୍ରଥମ ମ୍ୟାଚ୍ ଖେଳାଯିବ। ଏହି ମ୍ୟାଚ୍ ସନ୍ଧ୍ୟା ୭ଟାରୁ ଆରମ୍ଭ ହେବ।
Also read: Yashasvi Jaiswal: ମୁମ୍ୱାଇ ଛାଡ଼ିଲେ ଜୈସ୍ୱାଲ, ଏହି ଟିମ୍ ପାଇଁ ଖେଳିବେ ଘରୋଇ କ୍ରିକେଟ୍
ଭାରତ ଓ ଓ୍ଵେଷ୍ଟଇଣ୍ଡିଜ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ ଅକ୍ଟୋବର ୨ ତାରିଖରେ ଖେଳାଯିବ। ଅକ୍ଟୋବର ୧୦ରୁ ଦ୍ଵିତୀୟ ମ୍ୟାଚ୍ ଖେଳା୍ଯିବ। ଏହା ପରେ ନଭେମ୍ବର ୧୪ରୁ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଟେଷ୍ଟ ସିରିଜ୍ ଆରମ୍ଭ ହେବ। ଦିନିକିଆ ସିରିଜ୍ ନଭେମ୍ବର ୩୦ ଓ ଟି-୨୦ ସିରିଜ୍ ନଭେମ୍ବର ୯ରୁ ଖେଳାଯିବ। ଏହିପରି ଭାରତର ହୋମ ସିଜିନ ଡିସେମ୍ବର ୧୯ରେ ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ୍ ସହ ସମାପ୍ତ ହେବ।
ଭାରତୀୟ ଦଳ ଘରୋଇ ସିଜିନ ପୂର୍ବରୁ ଇଂଲଣ୍ଡ ଗସ୍ତ କରିବ। ଏହି ଗସ୍ତରେ ଭାରତ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳିବ। ଏହି ସିରିଜ୍ ଜୁନ ୨୦ରୁ ଆରମ୍ଭ ହେବ ଏବଂ ଶେଷ ଟେଷ୍ଟ ଜୁଲାଇ ୩୧ରୁ ଖେଳାଯିବ।
ଭାରତୀୟ ଦଳର ଘରୋଇ କାର୍ଯ୍ୟସୂଚୀ
ଓ୍ଵେଷ୍ଟଇଣ୍ଡିଜର ଭାରତ ଗସ୍ତ
ପ୍ରଥମ ଟେଷ୍ଟ- ଅକ୍ଟୋବର ୨ରୁ ଅକ୍ଟୋବର ୬, ଅହମ୍ମଦାବାଦ, ସକାଳ ୯ଟା ୩୦
ଦ୍ଵିତୀୟ ଟେଷ୍ଟ- ଅକ୍ଟୋବର ୧୦ରୁ ଅକ୍ଟୋବର ୧୪, କୋଲକାତା, ସକାଳ ୯ଟା ୩୦
ଦକ୍ଷିଣ ଆଫ୍ରିକାର ଭାରତ ଗସ୍ତ
ପ୍ରଥମ ଦିନିକିଆ- ନଭେମ୍ବର ୩୦, ରାଞ୍ଚି, ଅପରାହ୍ଣ ୧ଟା ୩୦
ଦ୍ଵିତୀୟ ଦିନିକିଆ-ଡିସେମ୍ବର ୩, ରାୟପୁର, ଅପରାହ୍ଣ ୧ଟା ୩୦
ତୃତୀୟ ଦିନିକିଆ- ଡିସେମ୍ବର ୬, ବିଶାଖାପଟନମ, ଅପରାହ୍ଣ ୧ଟା ୩୦
ପ୍ରଥମ ଟି-୨୦- ଡିସେମ୍ବର ୯, କଟକ, ସନ୍ଧ୍ୟା ୭ଟା
ଦ୍ଵିତୀୟ ଟି-୨୦- ଡିସେମ୍ବର ୧୧, ନୂଆ ଚଣ୍ଡିଗଡ଼, ସନ୍ଧ୍ୟା ୭ଟା
ତୃତୀୟ ଟି-୨୦- ଡିସେମ୍ବର ୧୪, ଧର୍ମଶାଳା, ସନ୍ଧ୍ୟା ୭ଟା
ଚତୁର୍ଥ ଟି-୨୦- ଡିସେମ୍ବର ୧୭, ଲକ୍ଷ୍ନୌ, ସନ୍ଧ୍ୟା ୭ଟା
ପଞ୍ଚମ ଟି-୨୦- ଡିସେମ୍ବର ୧୯, ଅହମ୍ମଦାବାଦ, ସନ୍ଧ୍ୟା ୭ଟା
