ନୂଆଦିଲ୍ଲୀ: ଭାରତରେ ଜଙ୍ଗଲ କ୍ଷେତ୍ର ବଢି ୮,୨୭,୩୫୭ ବର୍ଗ କିଲୋମିଟର ହୋଇଛି । ଦେଶର ମୋଟ ଭୌଗଳିକ କ୍ଷେତ୍ରର ଏହା ଏବେ ୨୫.୧୭ ପ୍ରତିଶତ ହୋଇଛି । ଜଙ୍ଗଲ କ୍ଷେତ୍ରରେ ଏହି ବୃଦ୍ଧି ୨୦୧୫ରେ ରେକର୍ଡ ୭,୭୪,୨୪୫ ବର୍ଗ କିଲୋମିଟର (୨୪.୧୬%) ତୁଳନାରେ ଅଧିକ ରହିଛି । 'ISFR ୨୦୨୩' ରିପୋର୍ଟରେ ଏହି ସୂଚନା ଦିଆଯାଇଛି । ବନ ସର୍ଭେକ୍ଷଣ ବିଭାଗ ଡେହରାଡୁନ, ପ୍ରତି ଦୁଇ ବର୍ଷରେ ବନ କ୍ଷେତ୍ରର ଆକଳନ କରିଥାଏ । ଏହି ବିଭାଗ କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଅଧିନରେ କାର୍ଯ୍ୟ କରିଥାଏ ।
ଉଲ୍ଲେଖଯୋଗ୍ୟ ଯେ ରାଜ୍ୟ ବନ ବିଭାଗ ଜଙ୍ଗଲର ସୁରକ୍ଷା ପାଇଁ ବିଭିନ୍ନ ଉପାୟ ଉପରେ କାମ କରନ୍ତି । ଏଥିରେ ବନ କ୍ଷେତ୍ରରେ ସର୍ଭେକ୍ଷଣ, ସୀମା ନିର୍ଦ୍ଧାରଣ, ସୁରକ୍ଷା ପାଇଁ ସ୍ତମ୍ଭ (Pillars) ସ୍ଥାପନ କରିବା ଓ ନିୟମିତ ପାଟ୍ରୋଲିଂ ସାମିଲ ରହିଛି । ଏହା ବ୍ୟତୀତ ବନ ସଂରକ୍ଷଣ ଓ ପରିଚାଳନା ପାଇଁ କେନ୍ଦ୍ର ସରକାର ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶକୁ ପ୍ରଯୁକ୍ତି ଓ ଆର୍ଥିକ ସହାୟତା ବି ପ୍ରଦାନ କରନ୍ତି ।
ସେହିପରି ଜଙ୍ଗଲ ବଢାଇବା ପାଇଁ ସରକାର ନ୍ୟାସନାଲ୍ ମିଶନ ଫର୍ ଏ ଗ୍ରୀନ୍ ଇଣ୍ଡିଆ, ୱାଇଲ୍ଡଲାଇଫ୍ ହ୍ୟାବିଟାଟ୍ ଡେଭଲପ୍ମେଣ୍ଟ ଓ ନଗର ବନ ଯୋଜନା ପରି ଯୋଜନା କାର୍ଯ୍ୟକାରୀ କରୁଛନ୍ତି । ଏହା ବ୍ୟତୀତ ପରିପୂରକ ବନୀକରଣ ପାଣ୍ଠି ପ୍ରବନ୍ଧନ ଓ ଯୋଜନା ପ୍ରାଧିକରଣ (CAMPA) ଅଧିନରେ ବନୀକରଣ କରାଯାଉଛି ।
ଗତ ୫ ବର୍ଷ ମଧ୍ୟରେ ଏହି ଯୋଜନାରେ ସରକାର ବଡ଼ ପରିମାଣରେ ଆର୍ଥିକ ଆବଣ୍ଟନ କରିଛନ୍ତି । ଗ୍ରୀନ୍ ଇଣ୍ଡିଆ ମିଶନ ପାଇଁ ୬୨୪.୬୯ କୋଟି ଟଙ୍କା, ବନ୍ୟଜୀବ ଆବାସ ବିକାଶ ପାଇଁ ୪୫୨.୦୪ କୋଟି ଟଙ୍କା, ନଗର ବନ ଯୋଜନା ପାଇଁ 3୦୮.୮୭ କୋଟି ଟଙ୍କା, CAMPAର ବାର୍ଷିକ ଯୋଜନା ଅଧିନରେ ୩୮,୫୦୨.୨୧ କୋଟି ଟଙ୍କା ଆବଣ୍ଟିତ କରାଯାଇଛି । ଜଙ୍ଗଲ କ୍ଷେତ୍ର ବୃଦ୍ଧି ସରକାରଙ୍କ ପରିବେଶ ସଂରକ୍ଷଣ ଓ ଜଳବାୟୁ ପରିବର୍ତ୍ତନ ମୁକାବିଲା ପ୍ରତିବଦ୍ଧତାକୁ ଦର୍ଶାଉଛି ବୋଲି କେନ୍ଦ୍ର ଜଙ୍ଗଲ ଓ ପରିବେଶ ରାଷ୍ଟ୍ର ମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହ ରାଜ୍ୟସଭାରେ କହିଛନ୍ତି ।
