ନୂଆଦିଲ୍ଲୀ ୧୪/୦୬: ଇସ୍ରାଏଲ ଓ ଇରାନ ମଧ୍ୟରେ ତୀବ୍ର ହେବାରେ ଲାଗିଛି ଯୁଦ୍ଧ ପରିସ୍ଥିତି । ତେବେ ପଶ୍ଚିମ ଏସିଆରେ ବୃଦ୍ଧି ପାଇବାରେ ଲାଗିଛି ଉତ୍ତେଜନା । ଇସ୍ରାଏଲ ଲଗାତାର ଦ୍ୱିତୀୟ ଦିନ ପାଇଁ ଇରାନ ଉପରେ ଏୟାର ଷ୍ଟ୍ରାଇକ୍ ଜାରି ରଖିଛି । ଆକାଶରୁ ଖାଲି ନିଆଁ ବର୍ଷା ହେବାରେ ଲାଗିଛି । ନେତାନ୍ୟାହୁଙ୍କ ସେନା ଇରାନର ପରମାଣୁ ସ୍ଥାନଗୁଡ଼ିକ ଉପରେ ଲଗାତାର ଆକ୍ରମଣ କରୁଛି । ଶୁକ୍ରବାର ବିଳମ୍ବିତ ରାତିରେ ଇସ୍ରାଏଲ ଗୋଟିଏ ପରେ ଗୋଟିଏ କ୍ଷେପଣାସ୍ତ୍ର ମାଡ଼ କରିଛି । ତେବେ ଜବାବ ସ୍ୱରୁପ ଇରାନ ମଧ୍ୟ ଇସ୍ରାଏଲ ଉପରେ ଏକ ଡଜନରୁ ଅଧିକ କ୍ଷେପଣାସ୍ତ୍ର ମାଡ଼ କରିଛି।
୧୩ ଜୁନ୍ ସକାଳେ ଇସ୍ରାଏଲୀ ସେନା ଇରାନ ଉପରେ ପ୍ରଥମ ଆକ୍ରମଣ କରିଥିଲା । ଏହାକୁ ଅପରେସନ୍ ରାଇଜିଂ ଲାୟନ ନାମ ଦିଆଯାଇଥିଲା। ଏହି ଅଭିଯାନ ଅଧୀନରେ ଇସ୍ରାଏଲ ୨୦୦ ରୁ ଅଧିକ ଲଢ଼ୁଆ ବିମାନ ସାହାଯ୍ୟରେ ୧୦୦ ରୁ ଅଧିକ ଇରାନୀ ଲକ୍ଷ୍ୟସ୍ଥଳ ଉପରେ ଆକ୍ରମଣ କରିଥିଲା । ଏଥିମଧ୍ୟରୁ ଅଧିକାଂଶ ଇରାନର ପରମାଣୁ ଓ ସାମରିକ ଲକ୍ଷ୍ୟସ୍ଥଳ ଥିଲା। ଇରାନର ରିଭୋଲ୍ୟୁସନାରୀ ଗାର୍ଡ ମୁଖ୍ୟ ହୁସେନ ସଲାମି, ଇରାନୀ ସେନା ମୁଖ୍ୟ ମହମ୍ମଦ ବାଘେରି, ଇରାନୀ ସର୍ବୋଚ୍ଚ ନେତା ଆୟତୁଲ୍ଲା ଅଲି ଖାମେନିଙ୍କ ଘନିଷ୍ଠ ସହଯୋଗୀ ଅଲି ଶାମଖାନି ଓ ଆଇଆରଜିସି ବାୟୁସେନା କମାଣ୍ଡର ଆମିର ଅଲି ହାଜିଜାଦେହଙ୍କ ଭଳି ଉଚ୍ଚ ପଦାଧିକାରୀ ମଧ୍ୟ ଏହି ଆକ୍ରମଣରେ ପ୍ରାଣ ହରାଇଥିଲେ । ଏପରି ପରିସ୍ଥିତିରେ, ଇରାନ ମଧ୍ୟ ପ୍ରତିଶୋଧମୂଳକ ଆକ୍ରମଣ କରୁଛି ।
ଇରାନୀଙ୍କ ଏହି ଆକ୍ରମଣ ମଧ୍ୟରେ, ଇସ୍ରାଏଲୀ ସେନା କହିଛି ଯେ ଇରାନ ପୁଣି ଥରେ କ୍ଷେପଣାସ୍ତ୍ର ଆକ୍ରମଣ ଆରମ୍ଭ କରିଛି । ଇରାନୀ କ୍ଷେପଣାସ୍ତ୍ର ଯୋଗୁଁ, ସାଇରନ୍ ଲଗାତାର ବାଜୁଛି ଏବଂ ଲୋକମାନେ ଉତ୍ତର ଇସ୍ରାଏଲର ବଙ୍କରରେ ଆଶ୍ରୟ ନେଉଛନ୍ତି । ଲୋକମାନଙ୍କୁ ବୋମା ଆଶ୍ରୟସ୍ଥଳକୁ ଯିବାକୁ ନିବେଦନ କରାଯାଇଛି।
ଇରାନୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଇସ୍ରାଏଲ ଇରାନର ଇସଫାହାନ ସହର ଉପରେ ମଧ୍ୟ ଏକ କ୍ଷେପଣାସ୍ତ୍ର ଆକ୍ରମଣ କରିଛି । ଇସ୍ରାଏଲ ଦାବି କରିଛି ଯେ ଇରାନର ପରମାଣୁ ଅସ୍ତ୍ର ବିକାଶ କରିବାର କ୍ଷମତାକୁ ବନ୍ଦ କରିବା ପାଇଁ ଏହି ଆକ୍ରମଣ କରାଯାଇଥିଲା କାରଣ ଇରାନ ଏବେ ପରମାଣୁ ବୋମା ତିଆରି କରିବା ପାଇଁ ପର୍ଯ୍ୟାପ୍ତ ୟୁରାନିୟମ ସଂଗ୍ରହ କରୁଛି।
ଇସ୍ରାଏଲୀ ଆଇଡିଏଫ୍ ୨୦୦ ରୁ ୩୦୦ ଲଢ଼ୁଆ ବିମାନ ବ୍ୟବହାର କରି ଇରାନର ଚାରୋଟି ପରମାଣୁ ଓ ଦୁଇଟି ସାମରିକ ଘାଟି ଉପରେ ଆକ୍ରମଣ କରିଥିଲା। ଇସ୍ରାଏଲୀ ଆକ୍ରମଣରେ ଏପର୍ଯ୍ୟନ୍ତ ୭୮ ଜଣଙ୍କର ମୃତ୍ୟୁ ହୋଇଛି ୩୫୦ ରୁ ଅଧିକ ଆହତ ହୋଇଛନ୍ତି। ସେପଟେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି ଯେ ଇସ୍ରାଏଲର ସୁରକ୍ଷା ସୁନିଶ୍ଚିତ ନହେବା ପର୍ଯ୍ୟନ୍ତ ଏହି ଅଭିଯାନ ଜାରି ରହିବ।
