ଭୁବନେଶ୍ବର ୧୫।୧: ହ୍ୟୁମାନ ପୋଟେନସିଆଲ ଡେଭେଲପମେଣ୍ଟ ଟ୍ରଷ୍ଟ ତରଫରୁ ଏକ ବିଶେଷ ଉତ୍ସବ "ରୂପାନ୍ତର” ଜୟଦେବ ଭବନ ଠାରେ ଆୟୋଜିତ ହୋଇଯାଇଛି । ବିଭିନ୍ନ ଅନାଥାଶ୍ରମ, ଆଦିବାସୀ ହଷ୍ଟେଲ, ସ୍କୁଲ ତଥା ବସ୍ତି ଅଂଚଳର ଯେଉଁ ଛାତ୍ରଛାତ୍ରୀ ଓ ଯୁବକ ଯୁବତୀମାନେ ଟ୍ରଷ୍ଟ ତରଫରୁ ବିନା ଶୁଳ୍କରେ ଦିଆଯାଉଥିବା ବ୍ୟକ୍ତିତ୍ଵ ବିକାଶ ଓ ଦକ୍ଷତା ବିକାଶ ତାଲିମ ନେଇଥିଲେ ସେହିମାନେ ଏହି ଉତ୍ସବରେ ଯୋଗ ଦେଇଥିଲେ । ସେମାନଙ୍କ ମଧ୍ୟରୁ ୨୪ ଜଣ ଛାତ୍ରଛାତ୍ରୀ ମଞ୍ଚ ଉପରେ ଅତିଥିମାନଙ୍କ ଉପସ୍ଥିତିରେ ନିଜ ଭିତରେ ହୋଇଥିବା ପରିବର୍ତ୍ତନ ସଂପର୍କରେ ନିଜର ଭାବନା ପରିପ୍ରକାଶ କରିଥିଲେ । ଅତିଥିମାନେ ତାଲିମ ପ୍ରାପ୍ତ ଛାତ୍ରଛାତ୍ରୀ ଓ ଯୁବକଯୁବତୀମାନଙ୍କୁ ଶୁଭେଚ୍ଛା ଜଣାଇବା ସହିତ ତାଙ୍କର ଉଜ୍ଜ୍ବଳ ଭବିଷ୍ୟତ କାମନା କରିଥିଲେ । ତାଲିମ ପ୍ରଦାନ କରୁଥିବା ପ୍ରଶିକ୍ଷକ, ପ୍ରଶିକ୍ଷିକା ଏବଂ ଏହି କାର୍ଯ୍ୟକ୍ରମରେ ସହଯୋଗ କରୁଥିବା ବ୍ୟକ୍ତି ବିଶେଷ ଓ ବିଭିନ୍ନ ଅନୁଷ୍ଠାନର ସଦସ୍ୟମାନଙ୍କୁ ଏଠାରେ ସମ୍ମାନିତ କରାଯାଇଥିଲା । 

ହ୍ୟୁମାନ ପୋଟେନସିଆଲ ଡେଭେଲପମେଣ୍ଟ ଟ୍ରଷ୍ଟ ତରଫରୁ ଦିଆଯାଉଥିବା ଏହି ୫୦ ଘଣ୍ଟାର କାର୍ଯ୍ୟକ୍ରମରେ ପିଲାମାନଙ୍କୁ ବିଭିନ୍ନ ନୈତିକ ଶିକ୍ଷା ସହିତ ସମୟର ସୁପରିଚାଳନା, ସକାରାତ୍ମକ ମନୋଭାବ, ସୁସଂପର୍କ ସ୍ଥାପନା, ଶୃଙ୍ଖଳା ଇତ୍ୟାଦି ସଂପର୍କରେ ତାଲିମ ଦିଆଯାଏ । ବର୍ତ୍ତମାନ ସୁଦ୍ଧା ଭୁବନେଶ୍ୱରର ବିଭିନ୍ନ ବସ୍ତିର ପ୍ରାୟ ୧୮୦୦ ଛାତ୍ରଛାତ୍ରୀଙ୍କୁ ଏହି ତାଲିମ ଦିଆ ସରିଲାଣି । ସେହିପରି ବସ୍ତି ଅଂଚଳରେ ରହୁଥିବା ଯୁବକଯୁବତୀମାନଙ୍କୁ ରୋଜଗାରକ୍ଷମ କରାଇବା ପାଇଁ ରୋଟାରୀ ଇ-କ୍ଲବ ଅଫ୍ ମହୋଦଧିର ଆର୍ଥିକ ସହାୟତାରେ ବିନା ଦେୟରେ କମ୍ପ୍ୟୁଟର ଶିକ୍ଷା ଦିଆଯାଉଛି । ବର୍ତ୍ତମାନ ସୁଦ୍ଧା ୭୦ ଜଣ ଏହି ତାଲିମ ପାଇ ସାରିଲେଣି । ମହିଳାମାନଙ୍କୁ ସ୍ବାବଲମ୍ବୀ କରାଇବା ଉଦ୍ଦେଶ୍ୟରେ ଟ୍ରଷ୍ଟ ତରଫରୁ ପଟ୍ଟଚିତ୍ର ଓ ଚାନ୍ଦୁଆ କାମ ଶିକ୍ଷା ଦିଆଯାଉଛି । 

You Can Read:

ନନ୍ଦନକାନନରେ ଆଖିବୁଜିଲା ବାଘୁଣୀ ରୂପାର ଅଢେଇ ମାସର ଧଳା ଶାବକ, ୨୭କୁ ଖସିଲା ସଂଖ୍ୟା