ନୂଆଦିଲ୍ଲୀ,୨୮/୦୬: ସ୍ୱଚ୍ଛ ଉପାୟରେ ବିଦ୍ୟୁତ୍ ଉତ୍ପାଦନ ପାଇଁ ପ୍ରସ୍ତୁତି । ପୃଥିବୀର ତାତିରୁ ଉତ୍ପନ୍ନ ହେବ ବିଦ୍ୟୁତ୍ ଶକ୍ତି । ଏନେଇ ଜୋରଦାର ଚାଲିଛି ପ୍ରସ୍ତୁତି । ଏହି ପ୍ରକ୍ରିୟାକୁ ଆପଣାଉଛନ୍ତି ବିଶ୍ବର ବିଭିନ୍ନ ଦେଶ । ଜଳବାୟୁ ପରିବର୍ତ୍ତନ ରୋକିବାକୁ ଏଭଳି ପ୍ରୟାସ କରୁଛନ୍ତି ବୈଜ୍ଞନିକ ।
ଅନୁସାରେ, କାଲିଫର୍ଣ୍ଣିଆର ଏକ କମ୍ପାନି ଆମେରିକାରେ ସବୁଠାରୁ ବଡ଼ ଜିଓଥର୍ମାଲ ପାୱାର୍ ଡେଭଲପ୍ମେଣ୍ଟ ଉପରେ କାର୍ଯ୍ୟ କରୁଛି । ଏହାଦ୍ୱାରା ପୃଥିବୀର ତାତିରୁ ୪୦୦ ମେଗାୱାଟ୍ ସ୍ୱଚ୍ଛ ବିଦ୍ୟୁତ୍ ଉତ୍ପାଦନ ହେବ, ଯାହା ପ୍ରାୟ ୪ ଲକ୍ଷ ଘରକୁ ବିଜୁଳି ଯୋଗାଇବ । ସଦର୍ଣ୍ଣ କାର୍ଲିଫର୍ଣ୍ଣିଆ ଏଡିସନ୍ ନାମକ କମ୍ପାନି ହ୍ୟୁଷ୍ଟନ୍ ସ୍ଥିତ ଜିଓଥର୍ମାଲ କମ୍ପାନି ଫେର୍ଭୋ ଏନର୍ଜିଠାରୁ ଏହି ବିଦ୍ୟୁତ୍କୁ କିଣିବ । ଫେର୍ଭୋ ପକ୍ଷରୁ ଏହି ଘୋଷଣା କରାଯାଇଛି । କମ୍ପାନି ବିଦ୍ୟୁତ୍ ଉତ୍ପାଦନ ଲାଗି ଦକ୍ଷିଣ-ପଶ୍ଚିମ ୟୁଟାରେ ୧୨୫ଟି କୂପ ଖୋଳୁଛି । ଏହି ସ୍ୱଚ୍ଛ ଶକ୍ତି ପ୍ରକଳ୍ପ ଦ୍ୱାରା ପାରମ୍ପରିକ ପାୱାର ପ୍ଲାଣ୍ଟର ଆବଶ୍ୟକତା କମିବ ।
ପ୍ରକାଶଯୋଗ୍ୟ, ଜଳବାୟୁ ପରିବର୍ତ୍ତନର ଏକ ବଡ଼ କାରଣ ହେଉଛି ପାରମ୍ପରିକ ପାୱାର ପ୍ଲାଣ୍ଟ । ପ୍ରିନ୍ସଟନ ବିଶ୍ୱବିଦ୍ୟାଳୟରେ ଏନର୍ଜି ସିଷ୍ଟମ୍ସ ଗବେଷକ ୱିଲ୍ସନ ରିକ୍ସ କୁହନ୍ତି, ଏହି ପ୍ରକଳ୍ପ ନୂତନ ପିଢ଼ି ଜିଓଥର୍ମାଲ ଏନର୍ଜି ଖର୍ଚ୍ଚକୁ କମ୍ କରି ଏକ ଲମ୍ବା ରାସ୍ତା ନିର୍ଦ୍ଧାରଣ କରିପାରେ । ୱିଲ୍ସନ ରିକ୍ସ ଆହୁରି କହିଛନ୍ତି ଯେ, ଯଦି ଏହି ବିଦ୍ୟୁତ୍ କ୍ରୟ ଏ ଟେକ୍ନୋଲୋଜିକୁ ଭୂଇଁକୁ ଓହ୍ଲାଇବାରେ ସାହାଯ୍ୟ କରେ ତେବେ ଗ୍ଲୋବାଲ ଡିକାର୍ବୋନାଇଜେସନ୍ ପାଇଁ ଏହା ବଡ଼ ସ୍ତରରେ ପ୍ରଭାବଶାଳୀ ହେବ ।
ଆଜି ବି ୨୪ ଘଣ୍ଟା ବିଜୁଳି ପାଇଁ ସମଗ୍ର ବିଶ୍ୱ ମୁଖ୍ୟତଃ ଜୀବାଶ୍ମ ଇନ୍ଧନ ଉପରେ ନିର୍ଭର କରୁଛି । ଫେର୍ଭୋର ଉପ-ସଭାପତି(ଷ୍ଟ୍ରାଟେଜି) ସାରା ଜେୱେଟ୍ କୁହନ୍ତି, ଏହି ନୂଆ କ୍ରୟ ଚୁକ୍ତିରୁ ସ୍ପଷ୍ଟ ହେଉଛି ଯେ, ସ୍ୱଚ୍ଛ ଶକ୍ତି ବିଦ୍ୟୁତ୍ର ବର୍ଦ୍ଧିତ ଆବଶ୍ୟକତାକୁ ପୂରଣ କରିପାରେ । ଆମେରିକାର ଏନର୍ଜି ଇନ୍ଫର୍ମେଶନ୍ ଆଡ୍ମିନିଷ୍ଟ୍ରେସନ୍ ଅନୁସାରେ, ଆମେରିକା ପୃଥିବୀର ତାତିକୁ ବ୍ୟବହାର କରି ବିଜୁଳି ଉତ୍ପାଦନରେ ବିଶ୍ୱର ପ୍ରମୁଖ ଦେଶ ମଧ୍ୟରୁ ଅନ୍ୟତମ ପାଲଟିଛି ।