କୋରାପୁଟ ୫।୧୧: ବିଶାଖାପାଟଣା କେକେ ରେଳପଥରେ ମାଲବାହୀ ଟ୍ରେନ୍ ଲାଇନଚ୍ୟୁତ ହୋଇଛି । ଆର୍କୁ ନିକଟସ୍ଥ ଚିମିଡିପାଲି ଷ୍ଟେସନ ନିକଟରେ ଘଟିଛି ଏଭଳି ଅଘଟଣ । ଟ୍ରେନର ୪ଟି ବଗି ଲାଇନଚ୍ୟୁତ ହୋଇଥିବା ଜଣାପଡିଛି । କୋରାପୁଟ ଓ ବିଶାଖାପାଟଣାରୁ ଉଦ୍ଧାରକାରୀ ଟିମ୍ ଘଟଣାସ୍ଥଳରେ ପହଞ୍ଚିଥିଲା । ତେବେ ଏଥିଯୋଗୁଁ ବିଶେଷ କ୍ଷୟକ୍ଷତି ହୋଇନଥିବା ସୂଚନା ରହିଛି ।
ସେପଟେ, ନନ୍ଦନକାନନ ଏକ୍ସପ୍ରେସ ଟ୍ରେନ ଗାର୍ଡଙ୍କ କ୍ୟାବିନକୁ ଗୁଳିମାଡ଼ ଅଭିଯୋଗ ହୋଇଛି । ଭଦ୍ରକ ଜିଲ୍ଲା ଚରମ୍ପା ଷ୍ଟେସନ ଠାରୁ ମାତ୍ର ପ୍ରାୟ ୧୦୦ ମିଟର ଦୂରରେ ଥିବା ୧୧୯ ନମ୍ୱର ଗେଟ ନିକଟରେ ଗୁଳିମାଡ ହୋଇଥିବା ନେଇ ମେମୋ ହୋଇଥିବା ସୂଚନା ମିଳିଛି । ୧୨୮୧୫ ନମ୍ବର ଆନନ୍ଦ ବିହାର ଟର୍ମିନାଲରୁ ପୁରୀ ଅଭିମୁଖେ ଯାତ୍ରା ଆରମ୍ଭ କରିଥିବା ନନ୍ଦନକାନନ ଏକ୍ସପ୍ରେସ ଭଦ୍ରକ ଜିଲ୍ଲା ଚରମ୍ପା ଷ୍ଟେସନ ନିର୍ଦ୍ଧାରିତ ସମୟରେ ଅତିକ୍ରମ କରିଥିଲା । କିଛି ସମୟ ମଧ୍ୟରେ ବାଉଦପୁର ଷ୍ଟେସନରୁ ଏକ ମେମୋ ପାଇଥିଲା ଭଦ୍ରକ ଷ୍ଟେସନ । ଯେଉଁଥିରେ ନନ୍ଦନକାନନ ଏକ୍ସପ୍ରେସ ଡାଉନ୍ ଲାଇନରେ ୧୧୯ ନମ୍ବର ଟ୍ରାଫିକ ଗେଟ୍ ଅତିକ୍ରମ କରୁଥିବା ସିଗ୍ନାଲ ଏକ୍ସଚେଞ୍ଜ ସମୟରେ ଗାର୍ଡ କ୍ୟାବିନକୁ ବାମ ପାର୍ଶ୍ଵକୁ ଦୁଇ ରାଉଣ୍ଡ ଗୁଳି ମାଡ ନେଇ ସୂଚନା ଥିବା ନେଇ ଖବର ମିଳିଛି । ପରେ ଭଦ୍ରକ Grp, RPF, ଭଦ୍ରକ ଟାଉନ୍ ପୋଲିସ ଓ ଷ୍ଟେସନର ଏକ ଟିମ୍ ବାଉଦପୁର ଷ୍ଟେସନ ଯାଇ ମେମୋ ବିଷୟରେ ତନାଘନା କରିଥିଲା । ପରେ ପୁଣି ୧୧୯ ନମ୍ୱର ଗେଟ୍କୁ ଆସି ସ୍ଥାନୀୟ ଗେଟ୍ ମେନ୍ ଓ ରେଳ ଲାଇନରେ କାମ କରୁଥିବା ଗ୍ୟାଙ୍ଗ ମ୍ୟାନଙ୍କୁ ପଚରା ଉଚୁରା କରିଥିଲା । କିନ୍ତୁ ଗୁଳି କିମ୍ବା ପଥର ମାଡ ହୋଇଥିବା ନେଇ କୌଣସି ନିର୍ଦ୍ଧିଷ୍ଟ ସୂଚନା ମିଳିଛି କି ନାହିଁ ସେ ନେଇ କୌଣସି ସୂଚନା ଦେଇନାହିଁ ଭଦ୍ରକ Grp କିମ୍ବା ଷ୍ଟେସନ । ତେବେ ଷ୍ଟେସନରେ ମେମୋ ଦେଇ ଗନ୍ତବ୍ୟ ପଥରେ ବାହାରିଥିଲା ନନ୍ଦନକାନନ ଏକ୍ସପ୍ରେସ ।
You Can Read:
