ମୁମ୍ଵାଇ ୨୩।୧୨; ମହାରାଷ୍ଟ୍ରର ପୁଣେରେ ଏକ ଭୟଙ୍କର ଦୁର୍ଘଟଣା । ଫୁଟପାଥରେ ଶୋଇଥିବା ୯ ଜଣଙ୍କ ଉପରେ ଏକ ଡମ୍ପର ଚଢିଯାଇଥିଲା । ଯେଉଁଥିରୁ ତିନି ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା । ମୃତକଙ୍କ ମଧ୍ୟରେ ଦୁଇ ଶିଶୁ ଥିବାବେଳେ ଆହତଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ଗୁରୁତର ରହିଛି। ଡମ୍ପର ଡ୍ରାଇଭର ନିଶାସକ୍ତ ଅବସ୍ଥାରେ ଥିବା ନେଇ କୁହାଯାଉଛି।
ପୁଣେର ୱାଗୋଲିର କେସନନ୍ଦ ଫାଟାରେ ରାତି ପ୍ରାୟ ୧୨.୩୦ ସମୟରେ ଏହି ଦୁର୍ଘଟଣା ଘଟିଛି। ପ୍ରାଥମିକ ସୂଚନା ହେଉଛି ଡମ୍ପର ଡ୍ରାଇଭର ମଦ୍ୟପାନ କରିଥିଲେ। ଯେଉଁମାନେ ମୃତ୍ୟୁବରଣ କରିଛନ୍ତି ସେମାନଙ୍କ ମଧ୍ୟରେ ୩ ଶିଶୁ ଅଛନ୍ତି। ଅନ୍ୟ ୬ଜଣ ଆହତ ହୋଇଛନ୍ତି। ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ଏହି ଦୁର୍ଘଟଣାରେ ଆହତ ସମସ୍ତ ବ୍ୟକ୍ତି ଶ୍ରମିକ ଅଟନ୍ତି। ସେ ରବିବାର ରାତିରେ କାମ ପାଇଁ ଅମ୍ରାବତୀରୁ ଆସିଥିଲେ। ଏହି ଫୁଟପାଥରେ ସମୁଦାୟ ୧୨ ଜଣ ଲୋକ ଶୋଇଥିଲେ। ବାକିମାନେ ଫୁଟପାଥ ପାର୍ଶ୍ୱରେ ଥିବା ଏକ ଚାଳରେ ଶୋଇଥିଲେ। ଭାରୀ ଡମ୍ପରଟି ସିଧା ଫୁଟପାଥକୁ ଯାଇ ଶୋଇଥିବା ଲୋକଙ୍କ ଉପରେ ମଡାଇ ଦେଇଥିଲା।
