କଳାହାଣ୍ଡି ୩୦/୬: ଦୁର୍ବୃତ୍ତଙ୍କ ଗୁଳିମାଡରେ ଗୁରୁତର ହୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମାଆ ମୃତ । ଝିଅର ଅବସ୍ଥା ଏବେବି ସଂକଟାପନ୍ନ ରହିଛି । ଶନିବାର ସଂଧ୍ୟାରେ ଥୁଆମୂଳ ରାମପୁର ବ୍ଲକ ରଣପୁର ଗାଁର ମହିଳା ଜେମା ଦେଇ ଓ ଝିଅ ଦିବ୍ୟା ପାହାଡ ଉପରେ ଥିବା ଚାଷଜମିକୁ ଯାଇଥିବାବେଳେ ସେଠାରେ ଗୁଳିମାଡର ଶିକାର ହୋଇଥିଲେ । ହଠାତ କିଏ ଜଣେ ଦୁର୍ବୃତ୍ତ ଆସି ମାଆ-ଝିଅଙ୍କୁ ଗୁଳି କରି ଫେରାର ହୋଇଯାଇଥିଲା । ପ୍ରଥମେ ଗାଁ ବୈଦ୍ୟଙ୍କ ନିକଟରେ ଚେରମୂଳି ଚିକିତ୍ସା କରିଥିଲେ । ଅବସ୍ଥା ଅଧିକ ଗୁରୁତର ହେବାରୁ ବିଳମ୍ବିତ ରାତିରେ ଭବାନିପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା । ସେଠାରୁ ପୁଣି ଉଭୟଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା । ଆଜି ସକାଳୁ ଜେମା ଦେଇଙ୍କର ମୃତ୍ୟୁ ହୋଇଥିବାବେଳେ ଝିଅ ଦିବ୍ୟାଙ୍କ ଚିକିତ୍ସା ଚାଲିଛି । ଗୁଳିକାଣ୍ଡ କିଏ ଓ କାହିଁକି କଲା ଏଯାଏ ସ୍ପଷ୍ଟ ହୋଇନଥିବାବେଳେ କର୍ଲାପାଟ ପୋଲିସ ଛାନଭିନ କରୁଛି ।
