ନୂଆଦିଲ୍ଲୀ, ୦୪/୦୭ : ରାଜ୍ୟସଭାର ନୂଆ ସାଂସଦ ସୁଧା ମୂର୍ତ୍ତି ବୁଧବାର ରଖିଥିଲେ ନିଜର ପ୍ରଥମ ଭାଷଣ । ସାଂସଦ ଭାବେ ଉପସ୍ଥାପନ କରିଥିଲେ ଜୋରଦାର ତର୍କ । ତେବେ ତାଙ୍କର ପ୍ରଥମ ଭାଷଣକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଶଂସା କରିଛନ୍ତି । ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ବେଳେ ସୁଧା ମୂର୍ତ୍ତି ମହିଳାଙ୍କ ସ୍ୱାସ୍ଥ୍ୟ ଉପରେ ଭାଷଣ ରଖିଥିଲେ ।
ସେ କହିଥିଲେ, ଜଣେ ମା’ର ମୃତ୍ୟୁ ଘଟିଲେ ହସ୍ପିଟାଲରେ ଜଣଙ୍କ ମୃତ୍ୟୁ ହିସାବରେ ଗଣାଯାଏ । କିନ୍ତୁ ପରିବାର ପାଇଁ ଜଣେ ମା’ ସବୁଦିନ ପାଇଁ ଚାଲିଯାଏ । ସର୍ଭିକାଲ କ୍ୟାନ୍ସର ପାଇଁ ସରକାରୀ ପ୍ରାୟୋଜିତ ଟିକାକରଣ କାର୍ଯ୍ୟକ୍ରମକୁ ସେ ପ୍ରଶଂସା କରିଥିଲେ । ଏହି ଟିକା ୯ରୁ ୧୪ ବର୍ଷର ଝିଅଙ୍କ ପାଇଁ ଦିଆଯାଉଛି । ସେହିପରି କୋଭିଡ୍ ବେଳେ ସରକାର ଏତେ ବଡ଼ ଟିକାକରଣ କାର୍ଯ୍ୟକ୍ରମକୁ ସରକାର ସଫଳତାର ସହ ପରିଚାଳନା କରିଥିଲେ ।
ତେଣୁ ସର୍ଭିକାଲ କ୍ୟାନ୍ସର ଟିକାକରଣ ସେତେ କଷ୍ଟକର ହେବ ନାହିଁ ବୋଲି ସେ କହିଥିଲେ । ଏବେ ଏହି ଟିକା ୧,୪୦୦ ଟଙ୍କାରେ ମିଳୁଛି । ଯଦି ସରକାର ଚାହିଁବେ ଏହାକୁ ୭୦୦/୮୦୦ ଟଙ୍କାକୁ ଆଣିପାରିବେ ବୋଲି ସେ ପ୍ରକାଶ କରିଥିଲେ । ପ୍ରକାଶଥାଉ କି, ଇନ୍ଫୋସିସ୍ ସହପ୍ରତିଷ୍ଠାତା ନାରାୟଣ ମୂର୍ତ୍ତିଙ୍କ ସ୍ତ୍ରୀ ସୁଧା ମୂର୍ତ୍ତିଙ୍କୁ ଅନ୍ତର୍ଜାତୀୟ ମହିଳା ଦିବସ ଅବସରରେ ରାଜ୍ୟସଭାକୁ ମନୋନୀତ କରାଯାଇଥିଲା