ନୂଆଦିଲ୍ଲୀ: ୪ ବର୍ଷ ପରେ ପୁଣି ଥରେ ହ୍ବାଇଟ୍ ହାଉସ୍ ଦଖଲ । ଡ୍ରୋନାଲ୍ଡ ଟ୍ରମ୍ପ ଆମେରିକାର ୪୭ତମ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି । ଡେମୋକ୍ରାଟିକ୍ ପ୍ରାର୍ଥୀ କମଲା ହାରିସଙ୍କୁ ଏକ କଡ଼ା ମୁକାବିଲାରେ ମାତ୍ ଦେଇ ବାଜି ମାରିନେଇଛନ୍ତି । ଆସୋସିଏଟ୍ ପ୍ରେସ୍ ରିପୋର୍ଟ ମୁତାବକ, ଡୋନାଲ୍ଡ ଟ୍ରମ୍ପଙ୍କୁ ୨୯୨ ଇଲେକ୍ଟୋରାଲ କଲେଜ୍ ମିଳିଥିବା ବେଳେ କମଲା ହାରିସ୍ଙ୍କୁ ୨୨୪ ନିର୍ବାଚକ ମଣ୍ଡଳୀର ଭୋଟ୍ ମିଳିଛି । ଭୋଟ୍ ଗଣିତ ପରେ କମଲା ହାରିସଙ୍କ ପ୍ରଥମ ପ୍ରତିକ୍ରିୟା ଆସିଛି । ରାଷ୍ଟ୍ରପତି ପଦ ଦୌଡ଼ରେ ପରାଜୟକୁ ସେ ସ୍ବୀକାର କରିଛନ୍ତି । ଓ୍ବାଶିଂଟନ ଡିସିରେ ଥିବା ହାଓ୍ବାର୍ଡ ୟୁନିଭରସିଟିରେ ଭାଷଣ ଦେଇ ନିଜ ସମର୍ଥକଙ୍କୁ କୃତଜ୍ଞତା ଜଣାଇଛନ୍ତି । ଆମେରିକାବାସୀଙ୍କ ସ୍ବାର୍ଥ ପାଇଁ ଲଢ଼େଇ ଜାରି ରଖିବାକୁ କହିଛନ୍ତି । ଡେମୋକ୍ରାଟିକ୍ ପାର୍ଟିର ସଦସ୍ୟମାନେ ତାଙ୍କ ଉପରେ ଭରସା କରି ଏକ ଅଭିଯାନକୁ ଆକାର ଦେବାକୁ ଚେଷ୍ଟା କରିଥିଲେ । ତେଣୁ କୃତଜ୍ଞତା ଜଣାଉଛି ବୋଲି କମଲା ହାରିସ୍ କହିଛନ୍ତି ।
କମଲା ହାରିସ୍ ଆହୁରି ମଧ୍ୟ କହିଛନ୍ତି, “ଆମେରିକା ରାଷ୍ଟ୍ରପତି ନିର୍ବାଚନର ଫଳାଫଳ ଏହା ନୁହେଁ, ଯାହା ଡେମୋକ୍ରାଟିକ୍ ପାର୍ଟିର ସଦସ୍ୟମାନେ ଚାହିଁଥିଲେ । ରେଜଲ୍ଟ ଯାହା ଆସିଛି, ସେଥିପାଇଁ ଆମେ ଲଢ଼େଇ କରିନଥିଲେ । ତାହା ନୁହେଁ ଯେଉଁ ଉଦ୍ଦେଶ୍ୟରେ ଆମେ ଭୋଟ୍ ଦେଇଥିଲେ । ହେଲେ ଆମେରିକାରେ ପ୍ରତିଶ୍ରୁତିର ରଶ୍ମି ସବୁବେଳେ ଚମକିବ । ଆମେ ହାର୍ ମାନିବା ନାହିଁ ଏବଂ ଲଢ଼େଇ ଜାରି ରଖିବା ।”
ହାଓ୍ବାର୍ଡ ବିଶ୍ବବିଦ୍ୟାଳୟରେ ସେ ନିଜ ସମର୍ଥକଙ୍କୁ ସମ୍ବୋଧନ କରି କହିଛନ୍ତି, ଆମେରିକା ନିର୍ବାଚନର ଫଳାଫଳକୁ ସ୍ବୀକାର କରିବା ଦରକାର । ସେ ପ୍ରଥମେ ନବନିର୍ବାଚିତ ରାଷ୍ଟ୍ରପତିଙ୍କ ସହିତ ଆଲୋଚନା କରି ଶୁଭେଚ୍ଛା ଜଣାଇଛନ୍ତି ବୋଲି ନିଜ ସମର୍ଥକଙ୍କୁ କହିଥିଲେ । ଏହାଛଡ଼ା କମଲା ହାରିସ୍ କହିଛନ୍ତି, ତାଙ୍କ ଟିମ୍ କ୍ଷମତାକୁ ଆସିଥିବା ଡୋନାଲ୍ଡ ଟ୍ରମ୍ପଙ୍କ ସହିତ ଶାନ୍ତିପୂର୍ଣ୍ଣ ଭାବେ ସରକାର ଚଳାଇବାରେ ସହଯୋଗ କରିବ ।....
