ନୂଆଦିଲ୍ଲୀ ୨।୪: ସଂସଦରେ ବୁଧବାର ୱକଫ ସଂଶୋଧନ ବିଲକୁ ନେଇ ମୋଦି ସରକାର ଅଗ୍ନିପରୀକ୍ଷାର ସମ୍ମୁଖୀନ ହୋଇଛନ୍ତି। ମଧ୍ୟାହ୍ନରେ ସରକାର ଯେମିତି ବିଧେୟକକୁ ସଂସଦ ପଟଳରେ ରଖିଛନ୍ତି ଏହାକୁ ବିରୋଧ କରିବା ପାଇଁ ବିପକ୍ଷ ଦଳ ମଧ୍ୟ ଅଣ୍ଟାଭିଡିଛନ୍ତି। ଏମିତିରେ ଏହି ବିଧେୟକକୁ କେନ୍ଦ୍ର ସରକାର ଗତବର୍ଷ ଅଗଷ୍ଟ ମାସରେ ଲୋକସଭାରେ ଉପସ୍ଥାପନ କରିଥିଲେ ହେଲେ ବିଧେୟକକୁ ସର୍ବସମ୍ମତିକ୍ରମେ ମିଳିତ ସଂସଦୀୟ କମିଟି (ଜେପିସି)କୁ ପଠାଇ ଦିଆଯାଇଥିଲା।
ଜେପିସିରେ ଦିଆଯାଇଥିବା କିଛି ପରାମର୍ଶକୁ ବିଧେୟକରେ ସାମିଲ କରାଯିବା ପରେ ଏହାକୁ ପୁଣି ସଂସଦରେ ଉପସ୍ଥାପନ କରିବାକୁ ମଞ୍ଜୁରୀ ଦିଆଯାଇଛି ଯାହା ଉପରେ କେନ୍ଦ୍ରୀୟ କ୍ୟାବିନେଟର ମଧ୍ୟ ମୋହର ବାଜିଛି। ଯଦି ଏହି ବିଧେୟକ ସଂସଦରେ ଗୃହୀତ ହୁଏ ତେବେ କଣ ପରିବର୍ତ୍ତନ ହେବ ଆସନ୍ତୁ ଜାଣିବା।
ସରକାର ୱକଫ ଅଧିନିୟମରେ ଅନେକ ସଂଶୋଧନ କରିଛନ୍ତି, ଯାହା ମାଧ୍ୟମରେ ୱକଫ ସମ୍ପତ୍ତିର ପରିଚାଳନାକୁ ଆଧୁନିକ ଓ ସୁବ୍ୟବସ୍ଥିତ କରିବାର କଥା କୁହାଯାଇଛି। ୱକଫ ସମ୍ପତ୍ତି ସମ୍ପର୍କିତ ମାମଲାରେ ରାଜ୍ୟ ସରକାରମାନଙ୍କ ନିୟନ୍ତ୍ରଣ ଓ ଭୂମିକା ରହିବ। ସମ୍ପତ୍ତି ୱକଫର କି ନୁହେଁ ଏହାର ନିଷ୍ପତ୍ତି ନେବା ପାଇଁ ରାଜ୍ୟ ସରକାର କଲେକ୍ଟର ପଦରୁ ଉଚ୍ଚ ପଦବୀର ଅଧିକାରୀଙ୍କୁ ନିଯୁକ୍ତ କରିପାରିବେ। ସେହିପରି ଯେଉଁମାନେ ୫ ବର୍ଷରୁ ଅଧିକ କାଳ ଧରି ଇସ୍ଲାମ ଧର୍ମ ପାଳନ କରୁଥିବେ ସେମାନେ ଚାହିଁଲେ ୱକଫକୁ ନିଜ ସମ୍ପତ୍ତି ଦାନ କରିପାରିବେ।
ଯଦି ଦାନ କରୁଥିବା ସମ୍ପତ୍ତିକୁ ନେଇ କୌଣସି ବିବାଦ ଉପୁଜେ ଏପରି ପରିସ୍ଥିତିରେ ତଦନ୍ତ ପରେ ହିଁ ଚୂଡ଼ାନ୍ତ ନିଷ୍ପତ୍ତି ନିଆଯିବ। ସେହିପରି ବିଲରେ ପୁରୁଣା ମସଜିଦ, ଦରଘା ଅଥବା ଅନ୍ୟ ଇସ୍ଲାମ ଧାର୍ମିକ ସ୍ଥଳ ସହିତ କୌଣସି ପ୍ରକାରର ଅସଦାଚରଣ ନ କରିବା ଲାଗି ବ୍ୟବସ୍ଥା ରହିଛି। ଅର୍ଥାତ ଆଇନ ପିଛିଲା ଭାବେ ଲାଗୁ ହେବ ନାହିଁ। ଜେପିସିରେ ଏନଡିଏ ସହଯୋଗୀ ଜେଡିୟୁ ଏହି ଦାବି କରିଥିଲା, ଯାହାକୁ ସଂଶୋଧନରେ ସ୍ୱୀକାର କରାଯାଇଛି।
ୱକଫ ଅର୍ଥାତ ଦାନ ସୂଚୀ ଗେଜେଟ ପ୍ରକାଶନର ୯୦ ଦିନ ମଧ୍ୟରେ ୱେବସାଇଟରେ ଅପଡେଟ କରାଯିବ। ବିଧେୟକ ଅନୁସାରେ ଅଣ ଇସ୍ଲାମ ଓ ମହିଳାଙ୍କୁ ୱକଫ ବୋର୍ଡରେ ପ୍ରବେଶ ମିଳିବ। ସେହିପରି ବୋର୍ଡରେ ୱକଫ ମାମଲା ସମ୍ପର୍କିତ ଯୁଗ୍ମ ସଚିବ ପଦର ଅଧିକାରୀ ସଦସ୍ୟ ରହିବେ।
