ନୂଆଦିଲ୍ଲୀ ୩୧।୦୧: ପ୍ରାୟ ୧୩ ବର୍ଷ ପରେ ଗୁରୁବାର ରଣଜୀ ଟ୍ରଫି ଖେଳିବାକୁ ଓହ୍ଲାଇଥିଲେ ବିରାଟ କୋହଲି । ତାଙ୍କର ବ୍ୟାଟିଂ ପାଳି ପଡିଥିଲା ଶୁକ୍ରବାର । ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଖେଳାଯାଉଥିବା ଏହି ମ୍ୟାଚରେ ଫ୍ଲପ୍ ହୋଇଛନ୍ତି କୋହଲି । ସେ ମାତ୍ର ୧୫ ବଲ୍ର ସାମ୍ନା କରିଛନ୍ତି । ଏହି ସମୟ ମଧ୍ୟରେ ସେ କରିଛନ୍ତି ମାତ୍ର ୬ରନ୍ । ସବୁଠାରୁ ବଡ କଥା ହେଉଛି ଏହି ଇନିଂସରେ କିଙ୍ଗ କୋହଲି ପଡିଆରେ ମାତ୍ର ୨୩ ମିନିଟ୍ ରହିଥିଲେ ।
ରେଲୱେ ବିପକ୍ଷରେ ଖେଳିବା ସମୟରେ ଜାରି ରହିଛି କୋହଲିଙ୍କ ଖରାପ ଫର୍ମ । ଦିଲ୍ଲୀର ପ୍ରଥମ ପାଳିର ୨୮ତମ ଓଭରରେ ରେଲୱେର ପେସର ହିମାଂଶୁ ସାଙ୍ଗୱାନ କୋହଲିଙ୍କୁ କରିଥିଲେ ଆଉଟ୍ । ଏହାପରେ ଫ୍ୟାନ୍ସ ଅରୁଣ ଜେଟଲି ଷ୍ଟାଡିୟମରୁ ଯିବା ଆରମ୍ଭ କରିଥିଲେ । କୋହଲି ଆଉଟ୍ ହେବା ମାତ୍ରେ ବନ୍ଦ ହୋଇଯାଇଥିଲା 'ଆରସିବି, ଆରସିବି' ଏବଂ 'କୋହଲି,-କୋହଲି' ସ୍ଲୋଗାନ ।
ଏହାପରେ ସୋଶିଆଲ୍ ମିଡିଆରେ କୋହଲିଙ୍କୁ ଟ୍ରୋଲ୍ କରିବା ଆରମ୍ଭ ହୋଇଯାଇଛି । ଜଣେ ୟୁଜର ଏକ ମିମ୍ ସେୟାର କରିଥିଲେ । ଯେଉଁଥିରେ ଲେଖାଯାଇଥିଲା ଯେ ସେ ୬ ରନରେ ଆଉଟ ହୋଇଥିଲେ, ଯାହା ଦ୍ୱାରା ଭିଡ଼ ନିୟନ୍ତ୍ରଣ ବାହାରକୁ ନ ଯାଉ । ଆଉ ଜଣେ ୟୁଜର୍ସ ଲେଖିଛନ୍ତି କୋହଲି ପୁଣି ଥରେ ରଣଜୀ ଟ୍ରଫିରେ ଫ୍ଲପ୍ । ଆଶା କରୁଛୁ ତାଙ୍କୁ ଭବିଷ୍ୟତରେ ଖେଳିବାର ସୁଯୋଗ ମିଳିବ।
ତେବେ ଏହାରି ମଧ୍ୟରେ କୋହଲିଙ୍କୁ ଆଉଟ୍ କରିଥିବା ହିମାଂଶୁ ସାଙ୍ଗୱାନ ମଧ୍ୟ ଆସିଛନ୍ତି ଚର୍ଚ୍ଚାକୁ । ତାଙ୍କ ବିଷୟରେ ଏକ ମଜାଦାର ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି । ରେଲଓ୍ବେର ୬ଟି ରଣଜୀ ମ୍ୟାଚ୍ରେ ୧୭ ପଏଣ୍ଟ ଅଛି ଏବଂ ଦିଲ୍ଲୀ ବୋନସ୍ ପଏଣ୍ଟ ସହିତ ପରାସ୍ତ କଲେ ରେଲଓ୍ବେ ନକଆଉଟ୍ରେ ପହଞ୍ଚିପାରିବ । ଦିଲ୍ଲୀ ଛଅଟି ମ୍ୟାଚ୍ରୁ ୧୪ ପଏଣ୍ଟ ପାଇଛି । ତାମିଲନାଡୁ ଛଅଟି ମ୍ୟାଚ୍ ଖେଳି ୨୫ ପଏଣ୍ଟ, ଚଣ୍ଡିଗଡ଼ ୬ଟି ମ୍ୟାଚ୍ ଖେଳି ୧୯ ପଏଣ୍ଟ, ଏବଂ ସୌରାଷ୍ଟ୍ର ୧୮ ପଏଣ୍ଟ ସହ ଲିଷ୍ଟରେ ରହିଛି।
