କୋଲକାତା: ଚାଲିଛି ଫଟାଫଟ୍ କ୍ରିକେଟ୍ ମହାସମର । ଇଣ୍ଡିଆନ୍ ପ୍ରିମିୟର ଲିଗ୍ରେ ଆଜି ଖେଳାଯାଉଛି ୧୫ତମ ମୁକାବିଲା । ଇଡେନ ଗାର୍ଡେନରେ ମୁହାଁମୁହିଁ ହୋଇଛନ୍ତି କୋଲକାତା ନାଇଟ୍ ରାଇଡର୍ସ ବନାମ ସନ୍ ରାଇଜର୍ସ ହାଇଦ୍ରାବାଦ । ଟସ୍ ଜିତି ଘରୋଇ ଦଳକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା ଏସଆରଏଚ୍ । ତେବେ ନିର୍ଦ୍ଧାରିତ କୋଡିଏ ଓଭରରେ ୬ ଓ୍ବିକେଟ୍ ହରାଇ କେକେଆର୍ ୨୦୦ ରନ୍ କରିଛି । ଫଳରେ ପ୍ୟାଟ୍ କମିନ୍ସଙ୍କ ହାଇଦ୍ରାବାଦ ସାମ୍ନାରେ ୨୦୧ ରନର ଟାର୍ଗେଟ୍ ରହିଛି ।
ପ୍ରଥମ ଇନିଂସରେ ବ୍ୟାଟିଂ ପାଇଁ ପଡ଼ିଆକୁ ଓହ୍ଲାଇ ଥିଲେ କୋଲକାତା ନାଇଟ ରାଇଡର୍ସକ ଦୁଇ ଓପନର କ୍ବିଣ୍ଟନ ଡିକକ୍ ଓ ସୁନିଲ୍ ନାରିନ୍ । ହେଲେ ହାଇଦ୍ରାବାଦ ତିନି ଓଭର ଭିତରେ ଦୁଇ ଓପନରଙ୍କୁ ଆଉଟ୍ କରି କେକେଆରକୁ ବ୍ୟାକଫୁଟକୁ ଠେଲି ଦେଇଥିଲା । ମାତ୍ର ଟିମକୁ ସାମ୍ଭାଳି ନେଇଥିଲେ ଅଧିନାୟକ ଆଜଙ୍କ୍ୟା ରାହାଣେ ଓ ଅଙ୍ଗକ୍ରିସ୍ ରଘୁବଂଶୀ । ଦୁଇ ବ୍ୟାଟର ଖେଳକୁ ୧୦ ଓଭର ପର୍ଯ୍ୟନ୍ତ ଟାଣି ନେଇଯାଇଥିଲେ । ରାହାଣେ ୩୮ ରନ୍ କରି ଅନ୍ସାରୀଙ୍କ ଶିକାର ହୋଇଥିଲେ । ସେପଟେ ଯୁବ ତାରକା ରଘୁବଂଶୀ ଦମଦାର୍ ବ୍ୟାଟିଂ ଦେଖାଇଥିଲେ । ସେ ମାତ୍ର ୩୨ ବଲ୍ ଖେଳି ୫୦ ରନ୍ ସଂଗ୍ରହ କରିଥିଲେ । ଏହାପରେ ଭେଙ୍କଟେସ୍ ଆୟର ଓ ରିଙ୍କୁ ସିଂ ଏସଆରଏଚ୍ ବୋଲରଙ୍କ ଉପରେ ପ୍ରହାର କରିଥିଲେ । ଆୟର ୨୯ଟି ବଲ୍ ଖେଳି ୨୦୬ ଷ୍ଟ୍ରାଇକ୍ ରେଟରେ ସର୍ବାଧିକ ୬୦ ରନ୍ ସଂଗ୍ରହ କରିଛନ୍ତି । ସେହିପରି ରିଙ୍କୁ ସିଂହ ୧୭ ବଲରେ ୩୨ ରନ କରିଛନ୍ତି । ହାଇଦ୍ରାବାଦ ପକ୍ଷରୁ ମହମ୍ମଦ ଶାମି, ପ୍ୟାଟ୍ କମିନ୍ସ, ଜିଶାନ ଅନସାରୀ, ହର୍ଷାଲ୍ ପଟେଲ ଓ କାମୁଣ୍ଡୁ ମେଣ୍ଡିସ୍ ଗୋଟିଏ ଲେଖାଏଁ ଓ୍ବିକେଟ୍ ନେଇଛନ୍ତି ।
